Vxite libro thaakwe ĩisxsa ũsyã, txãayuꞌ wala sweeneꞌta nawa Dxus yuweyuꞌ wala ĩisxsaçxawa sweeçmeneꞌ. Maiiyuꞌ Dxus yuweꞌs ahçeneꞌta, nawa pabayaꞌ ãjameeneꞌta.

Dxus yuweyuꞌ wala fxiysana vxite librote. 3500 añote txãa fxiꞌjni ũsna. Nawa Dxus yuweyuꞌ nyaafxte selpiineyuꞌ saꞌ ãçxhwa txaꞌwẽyçxa kweꞌsxtxiꞌs selpii. Txaꞌwẽy eꞌsyuꞌ kĩh yũuyaꞌwatewa ptaꞌsxiꞌk. Naa recuadro thegyaꞌ ãjaneꞌga “¿Isateyuꞌ Dxus yuwe ãçxhwa selpiimanx?”

Naa eensuyuꞌ jxukasay wala thẽysa jiꞌphun ũsneꞌtkaꞌw kĩjkĩhnawa ewmeesaçxa vxaan ũssa. Nawa isateyuꞌ Dxus eçaꞌ, ¿kweꞌsxtxiꞌs puꞌçxhyaꞌ ãjamaꞌk? ¿Idxyuꞌ maa sũhuꞌgaꞌ? Theguka Dxus yuweyuꞌ kĩhkaa kaapiyaꞌja.

JXUKAYSA JAꞌDA EW FXIꞌZEKA

“Wala yuh weçxa yujaꞌ puiimée fxiꞌzewaꞌjaꞌs pakwesáa yakhaꞌ, txãa paꞌgatey txãꞌwẽ yũusaꞌ Dxus luuçxtaꞌ naa paꞌga” (Mateo 5:9). “Jxukaysa yakh ew fxiꞌzewaꞌjçxáꞌs mpaakwewe, iꞌkweꞌsxtxi maꞌwẽ wejx ew theguna txãa yuꞌsaꞌ jxuka kxtey yuuna” (Romanos 12:18).

PUUTX YAꞌPEEYKÃHN KIꞌ VXITE YAꞌPELTUNÃYNA

“Wala yuh weçxa yujaꞌ vxitetx peeygãhna fxiꞌzesa yakhaꞌ, txãa paꞌgatey txãꞌwẽ yũusaꞌ Dxus peeygãanitx fxiꞌzeꞌ naa paꞌga” (Mateo 5:7). “Makwe ewmée nuyweꞌwetewa puutx yaꞌpeltunãyna mfxiꞌzewe. [Jeuwa] a maꞌwẽga iꞌkweꞌsxtxi peltunãy txãꞌwẽy myũuwe iꞌkweꞌsx pweꞌsx” (Kolosenses 3:13).

JXUKAYSA WALA ZXIÇXKWEÇXA JAꞌDA YAꞌFXIꞌZENA

“Saꞌ nasa maazkuẽesawa teeçx piçthẽꞌj jiꞌjçxaçxáa yuuwaꞌjaꞌs vxitçxa” (Hechos 17:26). “Txajũꞌ Pedroꞌ ptaꞌsxku: —Ãçxhaꞌ jiyuth Dxusaꞌ kim yuhnawa ahçemée, maa kiwejuweꞌsxçxawa txãꞌsna nwẽeseꞌjna ew yũuna fxiꞌzesa yuutxiꞌ jxpaꞌgaꞌçxáak” (Hechos 10:34, 35).

NAA KIWES NWEꞌWNA PHEUꞌJUN

“Y Jehová Dios procedió a tomar al hombre y a establecerlo en el jardín de Edén para que lo cultivara y lo cuidara” (Génesis 2:15) “Naapkaçxhaꞌ naa kiwete suwna ũssaweꞌsxtxiꞌs kaꞌtuꞌ ivxiituneꞌga jĩnatx weꞌwe” (Apocalipsis 11:18).

VXUÇXA WALA YAHKXMEE KAZX YŨUNISASWA TXAꞌWẼY YAHKXMEE

“Mpaꞌyajkxwe, naa kiwete jiꞌphuniçxáꞌs yaakxnisaꞌs. Txãꞌwẽmeꞌ naa kiwete kĩjkĩhwa jiꞌphuçxaçxáa txãꞌwẽ ĩtxĩ yaꞌfxiꞌzeꞌçmeꞌ” (Lukas 12:15). “Txãa paꞌga iꞌkweꞌsxaꞌ Dxus jĩiyãꞌjçxaꞌ, ptamsa maꞌtx yuu meeçxaꞌ ptamsamée maꞌtx yuu nawa kazx yuuna fxiꞌzeniꞌs jxuka nvxihtçxa ũusteçxáa yuhwa yaakxwaꞌj jiꞌphmeeiꞌkwe. Saꞌ Dxus yuꞌs yahkxmée jiꞌphu wẽeniçxáꞌs yaakxwaꞌj jiꞌphmeeiꞌkwe. Kĩhwa kazxsa yuꞌsaꞌ kxsuswaꞌjçxáa yuhwa jiꞌphmeeiꞌkwe” (Efxesios 5:3).

KULE FXIꞌZEWE TXAꞌWẼY WALA MJĨIWAꞌJA

“Kĩhtewa ewçxáa fxiꞌze wẽeçxa bagaçxte yuhwa pkalte yuꞌ fxiꞌzesameethaꞌw, naa paꞌga kweꞌsx paꞌgate Dxus yakh mpuutxweꞌwewe” (Hebreos 13:18). “Pesweesawa Dxusna jiyunijũyãꞌjaꞌ, pesweewaꞌjmeꞌ, wejxwa pesweemée kuseju mjĩiçxa vxite peejiina fxiꞌzesatxwa puꞌçxna fxiꞌzewaꞌjaꞌ” (Efxesios 4:28).

PEEJXSATXIꞌS PUꞌÇXHNA

“Naꞌwẽ yũuwaꞌjaꞌswa neeweꞌweçthaꞌw yakhthẽꞌjweꞌsxtxi: Mjĩiyaꞌ waꞌlsatx myuꞌkxpehwe. Dxusna açxamée çxhãçxha yaakxsatxiꞌ mekçxhããçxhaꞌjwe. Dxusna ew jiimeesatxwa mpuꞌçxwe. Jxukaysatx peeygãawaꞌjaꞌs mjiꞌphuwe” (1 Tesalonicenses 5:14). “Dxus dxiꞌpte kĩhte yuhwa jxpumbamée ew fxiꞌzesaꞌ naꞌwẽ yũuwaꞌjaꞌ: Nmiꞌ jiꞌphmée puuplesatx puꞌçxna nxuste fxiꞌzesatx kvxiisxaꞌjna luuçx wakçxahtxwa txãꞌwẽy yũuwaꞌjaꞌ, saꞌ naa kiwete ewmeesa peekx ũuste khẽeweꞌsxte wala jxpaꞌyakxwaꞌjaꞌ” (Santiago 1:27).

Dxus yuweyuꞌ ĩꞌneeçxa ptaꞌsxiꞌçmeeneꞌ isate jxuka kxtey yũuwaꞌjne kaapiyaꞌja, Dxus yuwe kaapiyaꞌjnisa nasa jxukaysa kxtey yũuwaꞌjça naa kiwete wejx yuhwa thẽysa yaꞌjiꞌphumeena. Dxus eçte yuꞌkxpehnisa jiꞌphunisa isateyuꞌ naa eente wejxkwe isate selpiina, açyuꞌ ¿Dxus eçaꞌs idxaꞌs maꞌw puꞌçxhiꞌk?

Dxus yuweꞌs wẽseꞌjçxayuꞌ txãjx yuꞌkxpehnisatxi kxtey yũun ũsteyuꞌ wala ew fxiꞌzewaꞌjna, txãꞌwmee yũu wala thẽysa jiꞌphun ũsunaꞌw thẽysaçxa jiꞌphun fxiꞌzen ũste, ¿Dxus yuwe puꞌçxhmaꞌk? Nawa piçthẽꞌj jiisa naꞌwne weꞌwe: “Nawa maawa jiyuwaꞌjsa yuutxiꞌ Dxusaꞌ kaajiyuꞌjuna adx maꞌwẽsatewa jĩk” (Mateo 11:19). Dxus yuwete yuꞌkxpehnisa ew jiyu wẽeçxa kweꞌsxyuꞌ jxuka kxtey yũuwaꞌj jiꞌphneꞌtkaꞌw txãꞌw yũumeeçxayuꞌ selpii maꞌk yuu selpiimee maꞌk yuu nawa jiyumeenaꞌw. Teeçx uꞌy ejemplote jiyuka.

Teeçx uꞌy Diana b yasesa, txãjx jiꞌphuniꞌs jxuka nviitne: nmiꞌwa nviitne, luuçx, yattsu jiꞌphuni jxuka nviitune. Txãa uꞌyyuꞌ wala thẽysaçxa jiꞌphun ũsçxa, ¿kim puꞌçxhiꞌk sũhne yaatxi?

Dianayuꞌ txãa nxuswa eençxa wala jiꞌphun ũste. Dxus yuweyuꞌ wala puꞌçxhine: “Nawa kuskus fxiꞌzewaꞌjaꞌs jiimée iꞌkwe. Kweꞌsx ĩtxi fxiꞌzeniꞌ naꞌwẽsaçxáꞌ: Yuꞌ ahwa maꞌwẽga tudteçxáa vxaaçxaꞌ ẽekhẽe pçuꞌ, txãꞌwẽysaçxáꞌ ĩtxi fxiꞌzenisaꞌ” (Santiago 4:14).

Thẽysa jiꞌphun ũsçxa Dxus yuwete yuꞌkxpehnisa pakweçxa, Diana puꞌçxhniꞌs uyne kweꞌsxwa txaꞌwẽy uyuunaꞌw. Dxus yuꞌkxpehnnisa Dxus yuweyuꞌ Dianaꞌsçxa puꞌçxhiꞌçmeene nasa mazkwesa maꞌw thẽysa fxiꞌzenwa jiꞌphun ũstxna. Nawa Dxus yuweꞌs yuꞌkxpehnisate pakweçxa, Dianaꞌs maꞌwne yaꞌpuꞌçxh txaꞌwẽy jxukasay yaꞌpuçxhitxwa uyuutxna. Dxus yuweyuꞌ vxite libro naꞌwsameena txãayuꞌ seena txaçxh fxiꞌjnisana nawa, ãçxhpkaçx txãayuꞌ wala selpiin ũsna yuꞌkxpehwa, txaꞌwẽy nasaweꞌsxtxi ew fxiꞌzekahn. ¿Kĩh yũuçxa Dxus eçaꞌ fxiyki vxite librote? ¿Isateyuꞌ Dxus kaaũusutheꞌjnisamanx? (1 Tesalonicenses 2:13).

Açyuꞌ naa eentepkaçxwa kweꞌsxtxiyuꞌ wala selpiina ũsna maa thẽysa jiꞌphtewa. Dianawa txaꞌwẽy thẽysa jiꞌphuçxa, naꞌwne paapẽy ¿maꞌw yũukith? Ãçxhaꞌ jxuka vxituꞌk sũhçxa. Dxus eçaꞌs lẽeyçxa txãayuꞌ txãjx uꞌjuwaꞌjaꞌs pheuꞌjne kxtey wẽseꞌjn kaahçxa. Ãçxh eente kweꞌsxtxiwa txaꞌwẽy puꞌçxhwaꞌjsa.

Naa Dxus eçyuꞌ seena jxthuhthesa, maa maa eentewa jxuka puꞌçxhwaꞌjsa. Dxus eçyuꞌ naꞌwku yuꞌkxpehe:

1. paꞌyakx ũswaꞌj jiꞌphneꞌtkaw

2. thẽysa jiꞌphçxawa dud dudçxawa pheuꞌjn uꞌjwaꞌj jiꞌphneꞌtkaꞌw

3. wẽt fxiꞌze wẽeçxayuꞌ ewçxa yahkxna uꞌjuwaꞌjna

Wejxkwe jiyu wẽeçxayuꞌ naa revistaꞌs lẽeyçxayuꞌ ew piyan uꞌjweneꞌkwe.