Vi Kansht Du Layva Fa’immah?

SHPEEL

Vass di Bivvel sawkt

Di Bivvel fashprecht: ‘Deah vo dutt vass Gott havva vill zayld layva fa’immah.’ (1 Johannes 2:17) Vass vill Gott havva es du dusht?

Lann veyyich Gott un sei Sohn, da Jesus. Da Jesus hott ksawt inna gebayt zu Gott: “Dess is ayvich layva, es si dich, da aynsisht voahlich Gott, kenna sella, un es si Jesus Christus, deah vo du kshikt hosht, kenna sella.” (Johannes 17:3) Vass missa miah du fa lanna Gott un da Jesus kenna? Miah lanna si kenna bei di Bivvel shtodya un sell apleiya in unsah layva. a Deich di Bivvel lanna miah vi Jehova denkt, da vann es layva gebt un es alles gmacht hott. (Apostelgeschichte 17:24, 25) Di Bivvel sawkt uns aw veyyich sei Sohn, da Jesus, es “di vadda fumm ayvicha layva” geteetsht hott.—Johannes 6:67-69.
Veis es du glawbsht an da Jesus sei ransom sacrifice. Da Jesus is zu di eaht kumma fa leit helfa “un fa sei layva gevva fa feel leit frei macha.” (Matthäus 20:28) Bei sei layva gevva hott da Jesus da vayk ufgmacht fa mensha so es si layva kenna fa’immah in Paradise uf di eaht. b (Psalm 37:29) Da Jesus hott ksawt: “Gott hott di veld so leeb katt es eah sei aynsishtah geboahranah Sohn gevva hott, so es awl dee vo an een glawva, nett faloahra gay sella, avvah sella ayvich layva havva.” (Johannes 3:16) Es nemd may es yusht glawva an da Jesus. Miah missa aw veisa es miah glawva an een bei tshoosa fa du vass eah geteetsht hott un aw du vass Gott havva vill.—Matthäus 7:21; Jakobus 2:17.
En goodah friendship havva mitt Gott. Gott vill havva es miah nayksht kumma zu een un sei friend vadda. (Jakobus 2:23; 4:8) Gott voah noch immah gvest un zayld noch immah sei. Eah zayld selayva nett shtauva, un eah vill aw havva es sei friends layva fa’immah. Deich di Bivvel sawkt Gott zu alli-ebbah es een sucht: “Eiyah hatza sella ayvichlich layva.”—Psalm 22:26.

Vass Mensha Denka Veyyich Layva Fa’immah

Vass mensha denka: Vass mensha doon is vass si ayvich layva gebt.

Di voahret is: Samm medical doktahs fashprecha es si kenna macha es mensha lengah layva kenna, avvah sell zayld doch nett mensha macha layva fa’immah. Yusht Gott kann uns ayvich layva gevva, koss Eah selvaht is “di shpring funn layva.” (Psalm 36:9) Eah fashprecht es “eah shlukt da doht uf fa’immah” un gebt ayvich layva zu awl mensha es faythfel sinn.—Jesoiya 25:8; 1 Johannes 2:25.

Vass mensha denka: Yusht en sirtendi satt leit kenna layva fa’immah.

Di voahret is: Gott dutt nett samm leit haychah hayva es anri. “Avvah, alli sadda leit vo Gottes-furcht in sich henn un recht doon, sinn ohgnumma bei eem.” (Apostelgeschichte 10:34, 35) Alli sadda leit es Gott heicha kenna layva fa’immah.

Vass mensha denka: Layva fa’immah zayld boring sei.

Di voahret is: Gott is da vann es uns hayst fa layva fa’immah. Eah hott leevi fa uns un vill havva es miah haebbi sinn. (Jakobus 1:17; 1 Johannes 4:8) Eah vayst es miah yusht haebbi sei kenna vann ma ebbes henn fa du es mayning hott. (Breddichah 3:12) Gott fashprecht es selli es layva uf di eaht fa’immah zayla eahvet havva es mayning hott es si un iahra family helfa zayld.—Jesoiya 65:22, 23.

Nett yusht sell, selli es layva fa’immah zayla oh’halda neiyi sacha lanna veyyich Gott un alles es eah gmacht hott. Eah hott mensha gmacht mitt en falanga fa layva fa’immah un fa lanna veyyich een, “avvah doch kann da mensh nett vissa vass Gott gedu hott fumm ohfang biss an’s end.” (Breddichah 3:10, 11) So, selli es layva fa’immah zayla di gans zeit innarestingi sacha lanna un du.

a Jehova Sei Witnesses gevva free Bivvel shtoddi programs. Fa may information, vatsh da video Vass Dutt Ohgay uf en Bivvel Shtoddi?

b Lays aw da article “Vi Dutt da Jesus Leit Sayva?”