Gott is nett di shuld funn earthquakes, shlimm veddah, un sacha vi sell es haebna heit, avvah eah gebt ebbes drumm veyyich di leit es afekt sinn bei si. Feel funn’s soffahres heit kumd funn so sacha, un Gott Sei Reich zayld en end bringa zu awl dess. Biss no, dutt Gott selli kamfirta es afekt sinn bei so shlimmi sacha.​—2 Korinther 1:3.

•  Favass kenna miah shuah sei es so shlimmi sacha nett en punishment sinn funn Gott?

•  Sinn so sacha en sign es miah in di letshti dawwa sinn?

•  Vi dutt Gott selli helfa es afekt sinn bei so shlimmi sacha?

•  Kann di Bivvel em helfa reddi sei fa shlimm veddah, earthquakes, un sacha vi sell?

•  Verses funn di Bivvel fa selli kamfirt gevva es afekt sinn bei so shlimmi sacha

 Shlimm veddah, earthquakes, un sacha vi sell es miah henn nau sinn diffand funn di sacha vi sell es Gott gyoost hott in Bivvel zeida.

•   So shlimmi sacha kann ennich ebbah doht macha adda vay du, es macht nix aus veah’s is. Avvah, vann Gott so sacha gyoost hott fa punishment in Bivvel zeida, hott eah shuah gmacht es yusht selli doht gmacht voahra es nett keicht henn. Fa’n example, vann Gott Sodom un Gomorra distroit hott, hott eah shuah gmacht es da Lot un sei zvay mayt sayf voahra. (1 Mosi 19:29, 30) Gott hott sayna kenna vass fa leit es si voahra un hott yusht selli vekk gebutzt es eah gvist hott es veesht voahra.​—1 Mosi 18:23-32; 1 Samuel 16:7.

•   ’S mensht zeit haebna so shlimmi sacha mitt nett feel funn en warning. Avvah, eb Gott so sacha gyoost hott fa veeshti leit vekk butza, hott eah si en warning gevva. Di leit es keicht henn zu sei warning henn zeit katt fa vekk kumma.​—1 Mosi 7:1-5; Matthäus 24:38, 39.

•   Mensha sinn samm funn di shuld es so shlimmi sacha haebna. Vi? Bei shawda du zu di eaht, un in areas nei zeeya vo si fleicht oft shlimm veddah, earthquakes, un floods henn. (Offenbarung 11:18) Gott is nett di shuld funn di shlechti choices es mensha macha.​—Shpricha 19:3.

 Yau, prophecies funn di Bivvel veisa es zayla so shlimmi sacha haebna “in di letshti dawwa.” (Matthäus 24:3; 2 Timotheus 3:1) Fa’n example, da Jesus hott ksawt in unsah dawk zayld’s ‘hungahs-noht gevva un earthquakes sei do un datt an feel bletz.’ (Matthäus 24:7) Gott zayld glei alles vekk butza es em soffahra macht, un sell maynd aw’s shlimm veddah, earthquakes, un sacha vi sell.​—Offenbarung 21:3, 4.

•   Gott dutt selli kamfirt gevva deich di Bivvel. Di Bivvel veist es Gott ebbes drumm gebt veyyich uns un vayst vass miah am deich gay sinn vann miah soffahra. ( Jesoiya 63:9; 1 Petrus 5:6, 7) Es sawkt uns aw funn en zeit es eah fashprocha hott vann kenn so shlimmi sacha may haebna zayla.​—Gukket aw “ Verses funn di Bivvel fa selli kamfirt gevva es afekt sinn bei so shlimmi sacha.”

•   Deich sei leit dutt Gott selli helfa es hilf braucha. Gott dutt sei leit yoosa fa da example nohch kumma es da Jesus ksetzt hott. Di Bivvel sawkt es da Jesus zayld kamfirt gevva zu selli “es heila” un es “vayyi hatza” henn. ( Jesoiya 61:1, 2) Selli es Gott deena boviahra’s saym ding du.​—Johannes 13:15.

   Deich sei leit, dutt Gott aw selli es afekt sinn helfa mitt vass si reeli braucha.​—Apostelgeschichte 11:28-30; Galater 6:10.

 Yau. Di Bivvel voah nett kshrivva fa uns sawwa vass fa du in shlimm veddah, earthquakes, un sacha vi sell, avvah es kann uns helfa vissa vass fa du. Fa’n example:

•   Machet plans nau so’s diah visset vass fa du vann shlimm veddah, earthquakes, un sacha vi sell haebna. Di Bivvel sawkt: “En mann es denkt, saynd di kfoah un fashtekkeld sich.” (Shpricha 22:3) ’Sis goot fa plans macha eb ebbes shlimmes haebbend so’s miah vissa vass fa du. Plans macha maynd fleicht en emergency kit reddi greeya un diseiyda mitt em sei family vo ma anna gay zayla vann shlimmi sacha haebna.

•   Layva is may importand es sacha es ma aykend. Di Bivvel sawkt: “Miah henn nix in di veld gebrocht un’s is shuah ma kenna aw nix mitt raus nemma.” (1 Timotheus 6:7, 8) Vann ebbes shlimmes haebbend missa miah willing sei fa unsah haymet un alles es miah henn falossa so’s miah sayf sei kenna. Miah missa in meind halda es unsah layva is may importand es ennich ebbes es miah aykna.​—Matthäus 6:25.