Samm Christians in di eahsht century voahra able fa “shvetza mitt zunga.” Sell maynd si henn kenna en anri language shvetza unni seahsht lanna vi. Dess voah en miracle. (Apostelgeschichte 10:46) Alli-ebbah hott’s fashtay kenna es selli language gvist hott. (Apostelgeschichte 2:4-8) Shvetza in zunga voah ayns funn di gifts funn da heilich geisht es Gott gevva hott zu samm funn di Christians in di eahsht century.​—Hebräer 2:4; 1 Korinther 12:4, 30.

•  Vo un vann henn si kshteaht shvetza in zunga?

•  Vass voah da reesin fa shvetza in zunga?

•  Voah shvetza in zunga supposed fa on gay fa’immah?

•  Vann is shvetza in zunga zu en end kumma?

•  Vass veyyich shvetza in zunga heit?

•  Vi kann ma sayna veah rechti Christians sinn?

 Deah miracle hott seahsht kaebbend an en celebration funn di Jews in Jerusalem uf da meiyet funn Pingshta, adda Pentecost 33 C.E. Es voahra baut 120 funn da Jesus sei yingah es zammah kumma sinn datt un “si voahra awl kfild mitt em Heilicha Geisht un henn ohkfanga shvetza mitt anri zunga” adda anri languages. (Apostelgeschichte 1:15; 2:1-4) En grohsi drubb leit “funn awl di lendah es in di gans veld sinn” sinn zammah kumma un “dee voahra fashtaund veil alli vann funn eena si keaht hott shvetza in sei aykni shprohch.”​—Apostelgeschichte 2:5, 6.

1.   Fa veisa es Gott bei di Christians voah. In Bivvel zeida hott Gott gvissa deich miracles es eah mitt sei faythfeli leit voah so vi da Mosi. (2 Mosi 4:1-9, 29-31; 4 Mosi 17:10) In da saym vayk, shvetza in zunga hott gvissa es Gott mitt di neiy Christian congregation voah. Da Paulus hott ksawt: “Zunga sinn fa en zaycha, nett zu selli vo glawva, avvah zu selli vo nett glawva.”​—1 Korinther 14:22.

2.   Fa di Christians helfa di voahret breddicha zu awl leit. Selli es da Jesus sei yingah keaht henn shvetza henn ksawt: “Miah heahra si mitt unsah shprohcha di vundahboahri sacha funn Gott sawwa.” (Apostelgeschichte 2:11) So, noch en reesin fa deah miracle voah fa di Christians helfa fa en “zeiyah sei” adda en witness gevva gans ivvah di eaht un fa ‘yingah macha in alli lendah’ yusht vi da Jesus si ksawt hott fa du. (Apostelgeschichte 10:42; Matthäus 28:19) Baut 3,000 leit es sellah miracle ksenna henn un henn gedu vass si ksawt voahra fa du sinn da Jesus sei yingah vadda sellah saym dawk.​—Apostelgeschichte 2:41.

 Nay. Di gifts funn da heilich geisht, including shvetza in zunga, voahra gevva yusht fa selli zeit. Di Bivvel sawkt: “Di broffetzeiya zayla enda. Di shprohcha [adda zunga] zayla enda.”​—1 Korinther 13:8.

 Di gifts funn da heilich geisht voahra’s mensht zeit yusht gevva zu anri Christians es grawt datt bei di aposhtla voahra. Dess voah kammen gedu bei di aposhtla iahra hend uf si layya. (Apostelgeschichte 8:18; 10:44-46) Es seemd es di vans es dee gifts grikt henn funn di aposhtla henn nett si gevva zu anri. (Apostelgeschichte 8:5-7, 14-17) Fa’n example, en government official mecht ebbah en driver’s license gevva, avvah da vann es di license grikt, hott nett’s recht fa anri en license gevva. So, es seemd vann shvetza in zunga zu en end kumma veah vann di aposhtla un selli es da gift grikt henn funn si, kshtauva sinn.

 ’Sis playn es da miracle funn shvetza in zunga kshtobt hott an’s end funn di eahsht century C.E. Nimmand heit kann sawwa es si shvetza kenna in zunga deich da heilich geisht funn Gott. a

 Da Jesus hott ksawt ma zayld sayna kenna veah sei yingah sinn bei di leevi es si henn. ( Johannes 13:34, 35) Da Paulus hott aw ksawt es leevi is vi ma sayna kann veah rechti Christians sinn. (1 Korinther 13:1, 8) Eah hott ksawt es Gott sei geisht dayt Christians helfa qualities havva es di Bivvel hayst “di frucht fumm Geisht,” un leevi is seahsht.​—Galater 5:22, 23.