Vass Maynd’s fa Heilich Sei?

SHPEEL

Vass di Bivvel sawkt

Heilich sei maynd vekk bleiva funn sacha es em unsauvah macht. ’S Hebrew vatt fa “heilich” kumd funn en term es maynd “sebbarayda.” So, vass heilich is is separate funn vass common is, adda sacred kalda, koss funn sauvah un pure sei.

Gott is’s mensht heilich. Di Bivvel sawkt: “Nimmand is so heilich es da HAH.” (1 Samuel 2:2) So Gott hott’s recht fa sawwa vass heilich is.

’S vatt “heilich” kann gyoost sei fa ennich ebbes es hott zu du mitt Gott, especially fa sacha es gyoost vadda fa een deena. Fa’n example, di Bivvel shvetzt funn:

Heilichi bletz: Vann da Mosi bei da hekka-putsh voah es am brenna voah, hott Gott ksawt: “Da blatz vo du am shtay bisht is heilichah grund.”—2 Mosi 3:2-5.
Heilichi fasamlinga: Di Israeliddah henn Gott gedeend bei reklah zammah kumma an “heilichi fasamlinga”.—3 Mosi 23:37.
Heilichi sacha: Sacha es gyoost voahra fa Gott deena an da tempel in Jerusalem voahra “heilicha ksha” kaysa. (1 Kaynicha 8:4) Sacha vi sell voahra supposed fa gyoost sei mitt respekt, avvah nee nett fa ohgebayda sei. a

Kenna leit es nett pirfikt sinn heilich sei?

Yau. Gott sawkt zu Christians: “Diah sellet heilich sei, fa ich binn heilich.” (1 Petrus 1:16) Avvah, mensha es nett pirfikt sinn kenda nee nett so heilich sei es Gott. Doch, selli es Gott sei gebodda heicha kenna en “heilich un en vohl-kfalla [adda acceptable] opfah” sei zu Gott. (Römer 12:1) Ebbah es boviaht heilich sei dutt dess veisa in vass eah sawkt un dutt. Fa’n example, si heicha di Bivvel koss es sawkt seind “heilich un frei funn huahrahrei” un seind “aw heilich in alles es diah doond.”—1 Thessalonicher 4:3; 1 Petrus 1:15.

Vann ma heilich is in Gott sei awwa, kenda ma sell faliahra?

Yau. Vann ebbah nimmi Gott sei gebodda nohch kumd, dann veah sellah person nimmi heilich in Gott sei awwa. Fa’n example, es buch funn Hebräer voah kshrivva zu “heilichi breedah,” avvah es sawkt aw “gevvet acht, breedah, es kens funn eich en evil un en unglawvich hatz hott es eich vekk drayt fumm levendicha Gott.”—Hebräer 3:1, 12.

Vass mensha denka veyyich heilich sei

Vass mensha denka: Es macht em may heilich bei sacha absawwa, even vann ma’s brauch, adda vann’s goot veah fa em.

Di voahret is: Di Bivvel sawkt nett es ma may heilich is bei nett goot acht gevva uf em sei body, adda even’s shawda du. (Kolosser 2:23) In blatz funn sell, Gott vill havva es miah goodi sacha enjoya. ‘Alli-ebbah sett essa un drinka un frayt finna in sei eahvet—dess is en kshenk funn Gott.’—Breddichah 3:13.

Vass mensha denka: Vann ma nett heiyaht is ma may heilich.

Di voahret is: En Christian kann diseiyda fa nett heiyahra, avvah sell in sich selvaht is nett vass ebbah heilich macht in Gott sei awwa. ’Sis voah es selli es nett heiyahra, kenna Gott deena mitt vennichah distractions. (1 Korinther 7:32-34) Avvah, di Bivvel veist es selli es keiyaht sinn kenna aw heilich sei. Aekshli, at least ayns funn da Jesus sei aposhtla voah keiyaht, da Petrus.—Matthäus 8:14; 1 Korinther 9:5.