Gott hott da Abraham sei nohch-kummashaft zammah gebrocht inna folk es Eah “Israel” kaysa hott un hott si gebodda gevva. Si henn sella vatsha ivvah Gott Sei Vatt un aw ivvah da vayk fa een ohbayda, so’s nett getshaynsht vatt in ennichah vayk un shuah macha’s sacha gedu vadda vi eah sawkt. (Psalm 147:19, 20) In sellah vayk henn alli sadda leit benefidda kenna funn Israel.​—Lays 1 Mosi 22:18.

Gott hott di Kinnah-Israel gepikt fa sei witnesses sei. Bei alles es si gedu henn, veist vi’s mensha helfa dutt fa Gott sei gebodda heicha. (5 Mosi 4:6) So, deich di Kinnah-Israel henn anri lanna kenna veyyich da voah Gott.​—Lays Jesoiya 43:10, 12.

Mitt zeit, voah Israel nimmi am Gott pleesa, un Jehova hott si replayst mitt di Grishta-gmay. (Matthäus 21:43; 23:37, 38) Nau, in blatz funn di Kinnah-Israel, sinn voahri Grishta-leit witnesses fa Jehova.​—Lays Di Apostelgeschichte 15:14, 17.

Da Jesus hott selli vo een nohch kumma sinn zammah gebrocht fa si naus shikka breddicha un yingah macha funn alli sadda leit. (Matthäus 10:7, 11; 24:14; 28:19, 20) In dee letshti dawwa is dee saym eahvet am gedu vadda may es selayva voah difoah. Fa’s eahsht moll selayva, hott Jehova millions funn alli sadda leit zammah gebrocht in ay vayk funn glawva, da voah glawva. (Di Offenbarung 7:9, 10) Voahra Grishta-leit sinn zammah gebrocht inna vayk es si nannah helfa un ufbauwa kenna. In alli fasamling gans ivvah di veld, vadda si di saymi sacha gland funn di Bivvel.​—Lays Hebräer 10:24, 25.

Zrikk in di 1870’s henn en glenni drubb es am di Bivvel shtodya voahra, kshteaht di voahret finna es in di Bivvel is, avvah es faloahra gvest voah. Si henn gvist es da Jesus di leit zammah gebrocht hott inna Grishta-gmay fa breddicha, so si sinn aw zammah kumma fa shteahra breddicha veyyich Gott Sei Reich gans ivvah di veld. In 1931 henn si da nohma Jehova Sei Witnesses ohgnumma.​—Lays Di Apostelgeschichte 1:8; 2:1, 4; 5:42.

Noch es da Jesus kshtauva is, henn di Grishta-gmayna in feel lendah hilf grikt funn ay drubb es sacha regiaht hott, es gvist henn es da Jesus ivvah di Grishta-gmayna is. (Di Apostelgeschichte 16:4, 5) In da saym vayk heit, Jehova Sei Witnesses gans ivvah di veld greeya hilf funn en Drubb es Regiaht es uf gmacht is funn eldishti mitt veisheit. Si sayna ivvah di diffahndi offices funn Jehova Sei Witnesses. In dee offices sinn sacha fa di Bivvel shtodya mitt, getranslayt, geprind, un vadda nausgevva in ivvah 700 shprohcha. In sellah vayk kann di Drubb es Regiaht di Bivvel yoosa fa leit ufbauwa un si geida in ivvah en 100,000 diffahndi Grishta-gmayna gans ivvah di veld. In alli Grishta-gmay, sinn’s eldishti adda ivvah-saynah es doon vass di Bivvel foddaht fa foah gay. Mitt leevi doon dee mennah acht gevva uf Jehova sei leit.​—Lays 1 Petrus 5:2, 3.

Jehova Sei Witnesses sinn organized fa dee goodi sacha breddicha un fa yingah macha. Yusht vi di aposhtla, miah breddicha funn haus zu haus. (Di Apostelgeschichte 20:20) Miah doon aw di Bivvel shtodya mitt ennich ebbah es reeli di voahret vissa vill. Avvah Jehova Sei Witnesses sinn nett yusht en organization. Miah sinn en family mitt en Faddah es feel leevi hott fa uns. Miah sinn breedah un shveshtra es ebbes drumm gevva veyyich nannah. (2 Thessalonicher 1:3) Siddah’s Jehova sei leit organized sinn fa Gott pleesa un fa anri helfa, sinn si di haebbisht family uf di eaht.​—Lays Psalm 33:12; Di Apostelgeschichte 20:35.