Es sinn leit in alli glawva es du vella vass recht is. Sinn miah nett frohwa es Gott so leit saynd un ebbes drumm gebt veyyich si? Avvah’s is shawt es feel veeshti sacha shund gedu voahra bei leit mitt en glawva. (2 Korinther 4:3, 4; 11:13-15) Mitt vass ma heaht funn di news, samm funn di diffahndi glawva supporda greek un feel veeshti sacha es leit shund gedu henn zu anri. Samm doon even part nemma in kinnah veesht yoosa un si shawda du. Leit es glawva an Gott un du vella vass recht is, sinn vay gedu im hatz bei so sacha!​—Lays Matthäus 24:3-5, 11, 12.

Da recht glawva gebt Gott di eah in alles’s dutt un lohbt een, vo falshi glawva doon vass nett pleesing is zu een. Si doon leit sacha lanna es nett in di Bivvel sinn, so vi sacha es nett voah sinn veyyich Gott un veyyich selli vo kshtauva sinn. Avvah Jehova vill havva es leit di voahret vissa veyyich een.​—Lays Ezekiel 18:4; 1 Timotheus 2:3-5.

Miah kenna frohwa sei es Gott nett getrikt is bei di diffahndi glawva vo sawwa es si leevi henn fa een, avvah reeli si henn leevi fa dee veld es da Satan am fafiahra is. (Jakobus 4:4) Di Bivvel hayst awl falshi glawva, “DI GROHS BABYLON.” Noch di Sindfloot, voah Babylon di shtatt vo falshi glawva kshteaht henn. Glei zayld Gott ennichah glawva es leit fafiaht un si nunnah lawt, bletzlich zu’n end bringa.​—Lays Di Offenbarung 17:1, 2, 5, 16, 17; 18:8.

Avvah, Jehova hott nett fagessa veyyich di leit es du vella vass recht is, vo alsnoch in dee falshi glawva sinn gans ivvah di veld. Eah is am so leit zammah bringa bei si di voahret lanna.​—Lays Micha 4:2, 5.

Jehova gebt ebbes drumm veyyich leit es di voahret vissa vella un du vella vass recht is. Eah vill havva es si iahra falshi glawva falossa. Leit es leevi henn fa Gott doon geahn tshaynshes macha fa een pleesa.​—Lays Di Offenbarung 18:4.

Noch es da Jesus kshtauva is, henn di Aposhtla di leit gland vass di Bivvel sawkt. Awl selli vo du henn vella vass recht is, voahra frohwa fa dee sacha heahra. Jehova hott si en neiyah vayk gland fa layva. En bessahrah vayk fa layva, mitt may mayning un en hofning. Si sinn en goodah example fa uns heit, koss vann si di goodi sacha keaht henn, henn si ebbes gedu diveyya bei Jehova’s eahsht halda in iahra layva.​—Lays 1 Thessalonicher 1:8, 9; 2:13.

Selli vo falshi glawva falossa, kenna part sei funn Jehova sei family es een deena dutt. Eah dutt si geahn einemma. Vann du dusht vass Jehova havva vill, dann zayld eah dei friend sei, du griksht en neiyi family es feel leevi hott un aw Jehova deend, un du kansht layva fa’immah.​—Lays Markus 10:29, 30; 2 Korinther 6:17, 18.

’S is goot es awl di falshi glawva vekk gebutzt vadda zayla. No zayld nimmand uf di eaht letz gyoost vadda adda nunnah glawda sei. Falshi glawva zayla selayva nett viddah mensha fafiahra un si funn-nannah dreiva. Alli ebbah es laybt zayld no mitt nannah da aynsisht voah Gott deena.​—Lays Di Offenbarung 18:20, 21; 21:3, 4.