Di goodi sacha kumma funn Jehova, “da haebbi Gott” es havva vill es families haebbi sinn. (1 Timotheus 1:11, NWT ) Eah hott keiyaht layva kshteaht. Fa’n family fa leevi shpiahra un haebbi sei, missa di eldra keiyaht sei. Grishta-leit sedda di laws heicha vo si voona, veyyich da registration fa keiyaht sei.​—Lays Lukas 2:1, 4, 5.

Gott vill havva vann en manskal un veibsmensh keiyaht vadda, selli si bei nannah bleiva so lang es si layva. Jehova vill havva es mann un fraw faythfel sinn zu nannah. (Hebräer 13:4) Eah hast divorce. (Maleachi 2:16) Vann ayns funn si nett faythfel bleibt un shlohft mitt ebbah shunsht, dann dutt Jehova da annah alawva fa’n divorce greeya un viddah heiyahra.​—Lays Matthäus 19:3-6, 9.

Jehova hott mansleit un veibsleit gmacht fa en hilf sei zu nannah vann si moll keiyaht sinn. (1 Mosi 2:18) Da mann sett am foahgay sei in di family. ’S is uf zu een fa macha es di family hott vass si braucha fa layva un aw si lanna veyyich Gott. Di leevi es eah hott fa sei fraw sett macha’s eah may drumm gebt veyyich see es eah dutt veyyich sich selvaht. Mann un fraw sedda leevi un respekt havva fa nannah. ’S is kenn mann un fraw es pirfikt is, so’s is nohtvendich fa lanna vi fa fagevva so’s ma en haebbi keiyaht layva havva kann.​—Lays Epheser 4:31, 32; 5:22-25, 33; 1 Petrus 3:7.

Vann diah druvvel hend in eiyah keiyaht layva, sedda diah awl zvay boviahra leevi veisa zu nannah. (1 Korinther  13:4, 5) In blatz funn ufgevva, di Bivvel sawkt’s is bessah fa bei nannah bleiva un boviahra di druvla ausshaffa es keiyahri leit oft henn.​—Lays 1 Korinther 7:10-13.

Jehova vill havva es diah haebbi sind. Eah sawkt eich da besht vayk vi fa eiyah yungi dawwa enjoya. Eah vill havva es diah lannet funn eiyah eldra vo veisheit henn un vissa vass diah am deich gay sind. (Kolosser 3:20) Jehova vill havva es diah visset vi goot es shpiaht fa sacha du fa Gott un sei Sohn da Jesus.​—Lays Breddichah 11:9–12:1; Matthäus 19:13-15; 21:15, 16.

Diah seddet hatt shaffa so’s eiyah kinnah ess-sach, glaydah, un en blatz henn fa voona. (1 Timotheus 5:8) Fa eiyah kinnah fa haebbi sei missa diah si aw lanna fa Gott leeva un lanna funn een. (Epheser 6:4) Vann diah veiset es diah leevi hend fa Gott dann kann’s eiyah kinnah helfa fa’s saym ding du. Vann di sacha es diah eiyah kinnah lannet, kumd funn di Bivvel, dann kann’s si helfa inna goodah vayk.​—Lays 5 Mosi 6:4-7; Shpricha 22:6.

Es dutt kinnah helfa un si goot shpiahra macha vann diah si sawwet vann si ebbes goodes gedu henn. Vann si letz doon muss ma si famohna un fleicht aw shtrohfa so’s si du vella vass recht is. Vann si lanna funn sell dann kann’s si halda funn sacha du es si shawda dutt un si hald funn haebbi sei. (Shpricha 22:15) Avvah vann kinnah kshtrohft sei missa dann sett’s nett gedu sei inna roffah adda veeshtah vayk.​—Lays Kolosser 3:21.

Jehova Sei Witnesses poblisha bichah es kshrivva sinn fa eldra un kinnah helfa. Dee bichah sinn gebayst uf di Bivvel.​—Lays Psalm 19:7, 11.