LESSON 4
See Hott Iahra Daett un Jehova Haebbi Gmacht
Vass is da Jephthah am fashprecha zu Jehova?
Es voah nett eesi, avvah da Jephthah sei maydel hott gedu vass iahra daett fashprocha hott
Saynsht du’s maytli in’s piktah?— Iahra daett hayst Jephthah. Di Bivvel sawkt uns nett vi see hayst, avvah miah vissa es see hott iahra daett un Jehova haebbi gmacht. Vella lanna veyyich see un iahra daett, da Jephthah.
Da Jephthah voah en goodah mann un hott en latt zeit kshpend sei maytli lanna veyyich Jehova. Eah voah aw en shteikah mann un en goodah leader. Di Israeliddah henn een kfrohkt fa foah gay un fechta geyyich iahra enemies.
Da Jephthah hott gebayda es Gott een helft beeda. Da Jephthah hott fashprocha es vann eah beeda dutt un moll haym kumd, zayld eah da eahsht mensh es aus sei haus kumd gevva zu Jehova. No dayt sellah mensh shaffa in Gott sei tempel-tent fa’s ivvahrich funn sei layva. Zrikk no, voah da tempel-tent da blatz vo leit anna ganga sinn fa Gott deena. Da Jephthah hott no di fecht gebodda! Vo eah haym kumma is, vaysht du veah seahsht aus sei haus kumma is?—
Da Jephthah sei maydel! See voah sei aynsisht kind, un nau muss eah see fatt shikka. Dess hott een reeli sad gmacht. Avvah fagess nett, eah hott dess fashprocha. Sei maydel hott grawt ksawt: ‘Daett, du hosht dess fashprocha zu Jehova, so du musht’s du.’
Alli yoah sinn da Jephthah sei maydel iahra friends kumma see psucha
Da Jephthah sei maydel voah aw sad. See hott nett daufa heiyahra un en family havva vann see moll in da tempel-tent is. See hott Jehova haebbi macha vella bei geahn du vass iahra daett fashprocha hott. Sell voah may importand zu see es heiyahra un en family havva. So, see hott iahra haymet falossa un in da tempel-tent gvoond fa’s ivvahrich funn iahra layva.
Denksht du see hott iahra daett un Jehova haebbi gmacht bei vass see gedu hott?— Yau, see hott! Vann du heichsht un leevi hosht fa Jehova, kansht du sei vi da Jephthah sei maydel. Du zaylsht aw Jehova un dei maemm un daett reeli haebbi macha.
LAYS IN DEI BIVVEL
^ par. 11 In’s original Hebrew shreives, veist dee shrift es da Jephthah sei maydel in da tempel-tent gvoond hott fa’s ivvahrich funn iahra layva un voah nett keiyaht.
