1 Korinther 6:1-20
6 Vann ennich ebbah unnich eich ebbes geyyich en anra hott, vi dauf eah’s fannich en ungerechtah richtah nemma, un nett fannich dee vo heilich sinn?
2 Vissa diah nett es dee vo heilich sinn di veld richta zayla? So vann di veld gricht vadda zayld bei eich, sind diah nett goot genunk fa di glenshti sacha richta?
3 Vissa diah nett es miah di engel richta zayla? Vi feel may, di sacha funn demm layva!
4 Vann diah so sacha hend zu richta es funn demm layva is, nemmet’s fannich even dee vo’s vennichsht sinn in di gmay.
5 Ich sawk dess so es diah eich shemma sellet. Is nimmand unnich eich es veisheit hott? Adda is nimmand in di gmay es richta kann zvishich zvay breedah?
6 In blatz funn sellem, ay broodah nemd da annah in di court, un dess is noch fannich unglawvichi.
7 Nannah in di courts nemma is en grohsah faylah mitt eich. Favass nett yusht leevah’s ohnemma vann’s eich letz gedu vatt? Vann diah grawbt vaddet, favass nett yusht’s ohnemma?
8 In blatz funn sellem, doond diah letz un rawvet nannah, even eiyah aykni breedah in di gmay.
9 Vissa diah nett es di ungerechta es Reich-Gottes nett eahva zayla? Seind nett fafiaht; nett di huahrah, adda di abgettishi, adda di aybrechah, adda dee vo shanda dreiva, mennah mitt mennah un veibsleit mitt veibsleit,
10 adda di deeb, adda di greedicha, adda siffah, adda leshtahrah, un nett di rawvah zayla’s Reich-Gottes eahva.
11 Un sell is vass samm funn eich voahra. Avvah diah sind gvesha, diah sind heilich gmacht, diah sind gerecht vadda deich da nohma fumm Hah Jesus un deich da Geisht funn unsahm Gott.
Unsah Leib Sett Gott Hallicha
12 Diah sawwet, “Alles is alawbt fa mich.” Yau, avvah nett alles is goot fa eich. Alles mecht alawbt sei fa mich, avvah ich loss nix mei meishtah vadda.
13 Ess-sach is fa da mawwa, un da mawwa is fa ess-sach; avvah Gott zayld vekk du mitt’na awl zvay. Es leib is nett fa huahrahrei dreiva avvah fa da Hah, un da Hah is fa’s leib.
14 Gott hott unsah Hah uf gvekt funn di dohda, un eah vekt uns aw uf deich sei graft.
15 Visset diah nett es eiyah leib en shtikk funn Christus sei leib is? Soll ich en shtikk funn Christus sei leib nemma un’s en shtikk funn en huah iahra leib macha? Selayva nett!
16 Visset diah nett es deah vo sich zu en huah bind is ay leib mitt iahra? Fa Gott hott ksawt, “Di zvay sella ay flaysh sei.”
17 Veah avvah sich zu em Hah bind, eah is ay geisht mitt eem.
18 Haldet eich vekk funn huahrahrei. Alli anri sind es da mensh dutt is autseit seim leib; avvah deah vo huahrahrei dreibt dutt sindicha geyyich sei ayya leib.
19 Visset diah nett es eiyah leib en tempel is fumm Heilicha Geisht vo in eich is, deah vo diah hend funn Gott? Diah sind nett eiyah ayya,
20 fa diah voahret deiyah gekawft. Fasell fakleahret Gott in eiyahm leib un in eiyahm geisht, fa si heahra zu Gott.
