1 Mosi 22:1-24
22 No, samm zeit shpaydah, hott Gott da Abraham ausbroviaht. Eah hott ksawt zu eem, “Abraham!” Un eah hott ksawt, “Do binn ich.”
2 No hott Gott ksawt, “Nemm dei boo, dei aynsishtah boo, da Isaac es du leeb hosht, un gay inʼs land Moriah. Datt opfah een es en brand-opfah uf ayns funn di hivla es ich diah sawwa zayl.”
3 Free da neksht meiya is da Abraham uf kshtanna un hott sei aysel ufksaddeld. Eah hott zvay funn sei gnechta un sei boo, da Isaac, mitt sich gnumma. Vo eah genunk hols kakt katt hott fa en brand-opfah is eah naus kshteaht fa da blatz es Gott eem ksawt katt hott.
4 Uf em dridda dawk hott da Abraham ufgegukt un hott da blatz ksenna veit ab.
5 Un da Abraham hott ksawt zu di yunga mennah, “Bleivet do beim aysel diveil ich un da boo datt nivvah gayn. Miah gayn fa bayda, no kumma miah zrikk zu eich.”
6 Da Abraham hottʼs hols faʼs brand-opfah uf sei boo da Isaac gedu, un eah selvaht hottʼs feiyah unʼs messah gedrawwa. Sellah vayk sinn di zvay funna on gloffa.
7 No hott da Isaac kshvetzt zu sei faddah, da Abraham, un hott ksawt, “Mei faddah!” Eah hott ksawt, “Do binn ich, mei sohn.” Da Isaac hott no ksawt, “Do is es feiyah unʼs hols avvah vo is es lamm faʼs brand-opfah?”
8 Da Abraham hott ksawt, “Gott selvaht zayld seiya fa en lamm faʼs brand-opfah, mei sohn.” Un di zvay sinn mitt-nannah on ganga.
9 No sinn si an da blatz kumma es Gott eem ksawt katt hott. Da Abraham hott no en awldah gebaut un hottʼs hols druff glaykt. Eah hott no sei boo da Isaac gebunna un hott een ufʼs hols glaykt.
10 No hott da Abraham sei hand naus glangd un hottʼs messah gnumma fa sei boo doht macha.
11 Avvah da engel fumm HAH hott naus groofa fumm himmel, un hott ksawt, “Abraham, Abraham!” Eah hott ksawt, “Do binn ich.”
12 Un eah hott ksawt, “Layk dei hand nett uf da boo, un du eem nix. Nau vays ich es du Gott firchsht, veil du nett dei boo, dei aynsishtah boo, zrikk kohva hosht funn miah.”
13 Da Abraham hott no ufgegukt un datt in di hekka hott eah en shohf-bokk ksenna, kfanga bei sei hanna. Da Abraham is ganga un hott da shohf-bokk gnumma, un hott een ufgopfaht fa en brand-opfah in blatz funn sei sohn.
14 No hott da Abraham sellah blatz gnohmd, un hottʼn “Da HAH Zayld Seiya” kaysa. Un heit is es alsnoch ksawt, “Da HAH seikt uf seim hivvel.”
15 No hott da engel fumm HAH es zvett moll da Abraham groofa fumm himmel,
16 un hott ksawt, “Ich shveah bei mich selvaht, sawkt da HAH, es veil du dess gedu hosht un hosht nett dei boo, dei aynsishtah boo, zrikk kohva,
17 dann zayl ich dich oahrich saykna. Ich mach dei nohch-kummashaft sich fameahra es si so feel sinn es di shtanna im himmel un da sand am say nohch. Dei nohch-kummashaft zayld shtett ivvah-nemma un in di doahra funn iahra feinda hokka.
18 Un deich dei nohch-kummashaft zayla awl di leit in di lendah funn di eaht ksaykend sei veil du mei shtimm abkeicht hosht.”
19 So is da Abraham viddah zrikk zu sei yungi mennah ganga, un si zammah sinn zrikk an Beer-Seba ganga. Un da Abraham hott an Beer-Seba gvoond.
20 Noch dee sacha is es ksawt vadda zumm Abraham, “Gukk moll, di Milka hott aw kinnah katt bei deim broodah da Nahor.
21 Da Uz voah da elsht, sei broodah voah da Bus, un no voah da Kemuel, (eah voah da faddah fumm Aram),
22 un da Chesed, da Haso, da Phildas, da Jedlaph un da Bethuel.”
23 Da Bethuel is shpaydah da faddah vadda funn di Rebekka. Di Milka hott dee acht boova katt beim Abraham sei broodah, da Nahor.
24 Sei nayva-fraw iahra nohma voah Rehuma, un see hott dee boova katt bei eem: da Tebah, da Gaham, da Thahas un da Maacha.
