1 Samuel 10:1-27
10 No hott da Samuel en boddel mitt ayl gnumma un hott’s uf em Saul sei kobb gleaht, hott een gekist un hott ksawt, “Hott nett da HAH dich ksalbt fa da roolah ivvah sei eahbshaft sei?
2 Noch demm es du mich falosht heit, zaylsht du zvay mennah finna nayksht an di Rachel iahra grawb an Zelzah im land funn Benjamin, un si zayla sawwa zu diah, ‘Di aysla es du ganga bisht sucha sinn kfunna vadda. Un nau hott dei faddah ufkeaht denka veyyich eena un is nau bekimmaht veyyich diah. Eah es am frohwa, “Vass soll ich du veyyich meim boo?”’
3 Du solsht no on gay funn datt biss du an da aycha-bohm kumsht es Thabor hayst. Datt zayla drei mennah dich ohdreffa es am nuff zu Gott gay sinn an Beth-El. Aynah is am drei yungi gayslen drawwa, aynah is am drei layb broht drawwa un da annah is am en boddel mitt vei drawwa.
4 Si zayla dich freindlich ohdreffa un diah zvay layb broht ohbeeda, un du solsht si nemma funn eena.
5 Noch sellem zaylsht du an da hivvel funn Gott in Gibeah kumma vo di Philishtah en greeks-camp henn. Vi du an di shtatt kumsht, zaylsht du en drubb brofayda ohdreffa es am runnah kumma sinn fumm hohcha blatz mitt grohsi un glenni harfa, un tambourines un flutes es am kshpeeld vadda sinn fannich eena un si zayla am broffetzeiya sei.
6 No zayld em HAH sei Geisht in en mechtichah vayk uf dich kumma un du zaylsht broffetzeiya mitt eena un du zaylsht en anra mann vadda.
7 Vann dee zaycha moll zu dich kumma, solsht du du vass shiklich is, fa Gott is bei diah.
8 Du solsht no fannich miah nunnah an Gilgal gay. No zayl ich nunnah kumma un brand-opfahra un dank-opfahra opfahra. Avvah du musht sivva dawk voahra biss ich zu diah kumm un diah sawk vass du du solsht.”
Da Saul Vatt Kaynich Gmacht
9 No vo da Saul sich gedrayt hott fa da Samuel falossa, hott Gott sei hatz fa’ennaht un awl selli zaycha sinn voah kumma sellah dawk.
10 Vo si an da hivvel funn Gibeah kumma sinn, hott en drubb brofayda een ohgedroffa un Gott sei Geisht is uf da Saul kumma in en mechtichah vayk, un eah hott gebroffetzeit mitt di brofayda.
11 Vo selli een ksenna henn am broffetzeiya mitt di brofayda es een eahshtah gekend henn, henn si nannah kfrohkt, “Vass hott’s gevva mitt em Kis sei boo? Is da Saul aw ayns funn di brofayda?”
12 Un aynah es datt gvoond hott, hott ksawt, “Veah is iahra faddah?” So henn leit ohkfanga sawwa, “Is da Saul aw unnich dee es brofayda sinn?”
13 Vo da Saul faddich voah broffetzeiya, is eah an da hohch blatz ganga.
14 Nau em Saul sei uncle hott een un sei gnecht kfrohkt, “Vo voahret diah?” Un si henn ksawt, “Am gukka fa aysla. Vo miah ksenna henn es si nett kfunna sei kenna, sinn miah zumm Samuel ganga.”
15 Em Saul sei uncle hott no kfrohkt, “Vass hott da Samuel ksawt zu eich?”
16 Da Saul hott ksawt, “Eah hott uns ksawt es di aysla kfunna sinn vadda.” Avvah eah hott seim uncle nett ksawt vass da Samuel ksawt hott veyyich em kaynich-reich.
17 Noch sellem hott da Samuel di leit zammah groofa zumm HAH an Mizpa.
18 Eah hott ksawt zu di Kinnah-Israel, “Dess is vass da HAH da Gott funn Israel sawkt, ‘Ich habb Israel ruff aus Egypta gebrocht, un ich habb eich aus di hand funn di Egyptah gnumma un aw aus di graft funn awl di kaynich-reicha es eich nunnah gedredda henn.’
19 Avvah heit hend diah eiyah Gott nunnah gedrayt, deah es eich frei gmacht hott funn awl eiyah noht un dreebsawl; doch hend diah ksawt, ‘Nay, setz en kaynich ivvah uns.’ So nau, veiset eich fannich em HAH bei eiyah kshlechtah un shtamma.”
20 Vo da Samuel awl di kshlechtah funn Israel nayksht gebrocht hott, dann hott’s es kshlecht fumm Benjamin gedroffa im lohs.
21 No hott eah’s kshlecht fumm Benjamin nayksht gebrocht, shtamm bei shtamm, un em Matri sei shtamm voah gedroffa. Endlich hott’s da Saul em Kis sei boo gedroffa. Avvah vo si gegukt henn fa een, henn si een nett finna kenna.
22 So henn si veidah kfrohkt fumm HAH, “Is da mann dann do?” Un da HAH hott ksawt, “Yau, eah hott sich fashtekkeld unnich di leit iahra shtoft.”
23 So sinn si kshprunga un henn een kohld, un vo eah unnich di leit kshtanna hott voah eah kobb’s lengah es ennich funn di anra leit.
24 No hott da Samuel ksawt zu awl di leit, “Saynet diah deah mann es da HAH raus glaysa hott? ’Sis geviss nimmand vi een unnich awl di leit.” No henn di leit laut gegrisha un henn ksawt, “En lang layva zumm kaynich!”
25 Da Samuel hott no di leit di adnunga fumm kaynich-reich ksawt, hott si in en buch kshrivva un hott si fannich da HAH gedu. No hott eah di leit fatt kshikt, alli-ebbah zu sei haymet.
26 Da Saul is no zu sei haus ganga in Gibea, un dayl greftichi greeks-mennah es Gott ohgraykt katt hott im hatz, sinn mitt eem ganga.
27 Avvah samm nix-nutzichi mennah henn ksawt, “Vee kann deah kall uns frei macha?” Un si henn een fa’acht un henn eem kenn kshenk gebrocht. Avvah da Saul hott nix ksawt diveyya.
