1 Thessalonicher 1:1-10
1 Paulus, Silvanus un Timotheus zu di gmay funn di Thessalonichah, vo im Gott da Faddah un im Hah Jesus Christus is. Gnawt sei zu eich, un fridda funn Gott unsah Faddah un fumm Hah Jesus Christus.
Da Glawva Funn Di Thessalonichah
2 Miah danka Gott immah fa eich awl un nayma eich in unsah gebaydah.
3 Miah meinda immah fannich unsah Gott un Faddah eiyah eahvet in glawva un leevi, un eiyah geduldichi hofning in unsah Hah Jesus Christus.
4 Diah breedah vo gleebt sinn bei Gott, miah vissa es diah raus groofa sind bei eem,
5 veil unsah Effangaylium zu eich kumma is, nett yusht in vadda, avvah aw in graft un im Heilicha Geisht mitt grohsi eahnsht. Diah visset vass fa leit es miah voahra unnich eich fa eiyah goot.
6 Diah hend uns un em Hah nohch gmacht, fa diah hend’s Vatt ohgnumma deich feel leides, un mitt frayt fumm Heilicha Geisht,
7 so es diah en foah-bild vadda sind zu awl di glawvicha in Matzedonia un Achaia.
8 Fa’s Vatt fumm Hah is nett yusht rumm heah bekand vadda deich eich in Matzedonia un Achaia, avvah eiyah glawva in Gott is aw bekand vadda ivvahrawlich. Fasell, braucha miah nix sawwa diveyya,
9 veil si selvaht fazayla zu uns vi diah uns eignumma hend, un vi diah zu Gott gedrayt sind funn abgettah, fa da levendich un voah Gott deena.
10 Si fazayla vi diah am voahra sind uf sei Sohn fumm Himmel, deah es eah uf gvekt hott funn di dohda—sell is, Jesus, deah vo uns aus em zann kalda hott es am kumma is.
