2 Chronik 23:1-21
23 Im sivvada yoah hott da Joiada sich moot ufkshaft, un hott en bund gmacht mitt di hauptmennah ivvah drubba funn en hunnaht; naymlich, da Asaria, em Jeroham sei boo, da Ismael, em Johanan sei boo, da Asaria, em Obed sei boo, da Maaseia, em Adaia sei boo, un da Elifaphat, em Sichri sei boo.
2 Si sinn gans deich Juda ganga un henn di Lefiddah zammah ksammeld funn awl di shtett in Juda, un awl di evvahshta feddah funn di families funn Israel, un si sinn an Jerusalem kumma.
3 No hott di gans fasamling en bund gmacht mitt em kaynich im tempel funn Gott. Da Joiada hott ksawt zu eena, “Nau gukket moll, em kaynich sei boo soll kaynich sei, so vi da HAH ksawt hott veyyich em Dawfit sei nohch-kummashaft.
4 Nau dess is vass diah du sellet: En driddel funn eich preeshtah un Lefiddah es als kumma uf em Sabbat-Dawk sella doah-heedah sei,
5 en driddel sella am kaynich-haus sei, un en driddel am Grund-Doah; awl di anra leit sella im foah-hohf fumm HAH sei tempel sei.
6 Nimmand soll in da tempel fumm HAH gay vi yusht di preeshtah un di Lefiddah es am deena sinn. Si daufa nei gay veil si heilich gmacht sinn. Awl di anra mennah sella da blatz vatsha vo da HAH si anna gedu hott.
7 Di Lefiddah sella um da kaynich rumm sei, yaydahs mitt sei greeks-ksha in di hand. Ennich ebbah es in da tempel nei gayt muss doht gmacht sei. Bleivet nayksht beim kaynich vo-evvah es eah hee gayt.”
8 Di Lefiddah un awl di mennah funn Juda henn no alles gedu es da Joiada gebodda hott. Yaydahs hott sei mennah gnumma—selli es am rei kumma voahra fa iahra deensht uf em Sabbat, un aw selli es am naus gay voahra nohch iahra deensht uf em Sabbat—fa da Joiada hott kens funn di drubba iahra zeit abgevva.
9 No hott da preeshtah Joiada di hauptmennah, es ivvah drubba funn en hunnaht voahra, di shpiahs un di grohsa un glenna shields gevva es als zumm Kaynich Dawfit keaht henn, un es im tempel funn Gott kalda voahra.
10 Eah hott awl di leit an iahra blatz gedu; yaydahs funn eena mitt sei greeks-ksha in di hand hott sich um da kaynich rumm kshteld. Si voahra nayksht am awldah fumm tempel in en lein funn di saut seit zu di natt seit fumm tempel.
11 No henn si em kaynich sei boo raus gebrocht, henn da krohn uf sei kobb, henn eem’s zeiknis-buch gevva un henn een kaynich gmacht. Da Joiada un sei boova henn een no ksalbt, un henn ksawt, “Lang soll da kaynich layva!”
12 Vo di Athalia di yacht keaht hott funn di leit am shpringa un am greisha fa da kaynich lohva, is see zu eena ganga am tempel fumm HAH.
13 See hott gegukt, un datt voah da kaynich am shtay bei em kaynich-poshta vo ma nei gayt, un di hauptmennah un di hanna-blohsah voahra nayvich em kaynich. Awl di leit fumm land voahra fraylich un am blohs-hanna blohsa. Di singah mitt iahra music-instruments voahra am foah gay. No hott di Athalia iahra glaydah farissa un hott naus gegrisha, “Fafiahrah! Fafiahrah!”
14 Da preeshtah Joiada hott no di hauptmennah naus gebrocht es ivvah drubba funn en hunnaht voahra, un ivvah sei greeks-gnechta voahra, un hott ksawt zu eena, “Bringet see raus zvishich di roiya greeks-gnechta, un machet ennich ebbah doht mitt em shvatt es iahra nohch kumd.” Fa da preeshtah hott ksawt katt, “Machet see nett doht im tempel fumm HAH.”
15 So henn si see fesht gnumma, un vo si an da blatz kumma sinn vo di geil nei gayn uf da kaynich-haus grund, datt henn si see doht gmacht.
16 Da Joiada hott no en bund gmacht zvishich sich selvaht, awl di leit un em kaynich, es si em HAH sei leit sei zayla.
17 No sinn awl di leit an’s haus fumm Baal ganga un henn’s zammah grissa. Si henn di awldahra un abgettah fabrocha, un henn da Baal preeshtah, Matthan, doht gmacht fannich em awldah.
18 Da Joiada hott no di preeshtah es Lefiddah voahra ivvah’s haus fumm HAH ksetzt. Da Dawfit hott’s ufksetzt katt es si ivvah da tempel fumm HAH sei sella fa brand-opfahra macha zumm HAH, so vi’s kshrivva is im Ksetz fumm Mosi. Si henn dess du sella mitt frayt un singes so vi da Dawfit gebodda katt hott.
19 Eah hott aw di doah-heedah an di doahra fumm HAH sei tempel gedu, so es nimmand nei gay soll es unrein is.
20 Eah hott di hauptmennah ivvah drubba funn en hunnaht, di evvahshti, di roolahs funn di leit un awl di leit fumm land gnumma un hott da kaynich aus em tempel fumm HAH gebrocht. Si sinn no in’s kaynich-haus ganga deich’s Evvahsht Doah un henn da kaynich uf da kaynich-shtool kokt,
21 un awl di leit henn sich kfroit. Un di shtatt voah shtill, veil di Athalia doht gmacht voah mitt em shvatt.
