2 Chronik 27:1-9
27 Da Jotham voah fimf un zvansich yoah ald vo eah kaynich is vadda, un eah voah kaynich in Jerusalem fa sechtzay yoah. Sei maemm iahra nohma voah Jerusa, em Zadok sei maydel.
2 Eah hott gedu vass recht voah zumm HAH, grawt vi sei daett da Usia gedu katt hott. Avvah eah is nett in da tempel fumm HAH ganga vi sei daett. Di leit, avvah, henn alsnoch ohkalda in iahra unreinah vayk.
3 Da Jotham hott’s Evvahsht Doah fumm tempel fumm HAH ivvah gebaut, un hott adlich eahvet gedu an di mavvah funn Ophel.
4 Eah hott shtett gebaut im hivvel-land funn Juda, un hott greeks-heisah un tavvahs gebaut in di busha.
5 Da Jotham hott greek gmacht mitt em kaynich funn di Ammoniddah un is si ivvah-kumma. Un sell yoah henn di Ammoniddah eem fimf un sivvatzich hunnaht pund silvah gevva, fuftzich dausend bushel vaytza un fuftzich dausend bushel geahsht. Di Ammoniddah henn aw sell gedu fa di nekshta zvay yoah.
6 Da Jotham is mechtich vadda veil eah shtandhaftich gloffa is fannich seim Gott da HAH.
7 Di ivvahricha sacha im Jotham sei kaynich-reich, un awl da greek es eah gmacht hott, sinn ufkshrivva in di bichah funn di kaynicha funn Israel un Juda.
8 Eah voah fimf un zvansich yoah ald vo eah kaynich is vadda un eah voah kaynich in Jerusalem fa sechtzay yoah.
9 Da Jotham hott kshlohfa mitt sei foah-feddah un voah fagrawva in di Shtatt fumm Dawfit. Sei boo da Ahas is no kaynich vadda in seim blatz.
