2 Chronik 7:1-22
7 Vo da Solomon faddich voah bayda, is feiyah runnah kumma fumm himmel un hott di brand-opfahra un di anra opfahra ufgebrend, un di hallichkeit fumm HAH hott da tempel ufkfild.
2 Di preeshtah henn nett in da tempel gay kenna veil di hallichkeit fumm HAH da tempel fumm HAH ufkfild hott.
3 Vo awl di Kinnah-Israel’s feiyah ksenna henn runnah kumma un es di hallichkeit fumm HAH uf em tempel voah, henn si sich anna gegneet un henn iahra ksichtah uf da bodda gedu. Si henn gebayda un da HAH gedankt, un henn ksawt,
“Eah is goot;sei shtandhaftichi-leevi shtayt fa’immah.”
4 No hott da kaynich un awl di leit opfahra gopfaht fannich em HAH.
5 Da Kaynich Solomon hott en opfah gopfaht funn zvay un zvansich dausend oxa un en hunnaht un zvansich dausend shohf. So hott da kaynich un awl di leit da tempel funn Gott heilich eiksetzt.
6 Di preeshtah henn iahra bletz gnumma, un so henn di Lefiddah mitt em HAH sei instruments fa music shpeela, dee es da Kaynich Dawfit gmacht hott fa da HAH lohva vann eah als ksawt hott, “Sei shtandhaftichi-leevi shtayt fa’immah.” Uf di annah seit funn di Lefiddah henn di preeshtah iahra blohs-hanna geblohsa un gans Israel voah am shtay.
7 Da Solomon hott di mitt fumm foah-hohf fannich em HAH sei tempel heilich eiksetzt, un datt hott eah brand-opfahra un’s fett funn dank-opfahra gopfaht veil da bronze-alwdah es da Solomon gmacht katt hott, nett alles hayva hott kenna funn di brand-opfahra, di shpeis-opfahra un’s fett.
8 So hott da Solomon dee fesht-dawwa kalda fa sivva dawk an selli zeit un gans Israel mitt eem. Es voah en grohsi fasamling; leit sinn bei kumma funn Hamath un so veit ab es di Grikk funn Egypta.
9 Uf em achta dawk henn si di letsht fasamling katt. Fa si henn sivva dawk gnumma fa da awldah heilicha, un sivva may dawk fa di fesht-dawwa halda.
10 Uf em drei un zvansishta dawk fumm sivvada moonet hott eah di leit zrikk zu iahra haymeda kshikt. Si voahra froh un fraylich im hatz fa di gooda sacha es da HAH gedu katt hott fa da Dawfit un da Solomon un fa di leit funn Israel.
Da HAH Kumd Viddah Zumm Solomon
11 So hott da Solomon da tempel fumm HAH un’s kaynich-haus faddich gmacht. Eah hott alles gedu es eah im sinn katt hott veyyich em tempel fumm HAH un sei kaynich-haus.
12 No is da HAH zumm Solomon kumma in di nacht un hott ksawt zu eem,
“Ich habb dei gebayt keaht un habb deah blatz gnumma fa mich selvaht fa en tempel vo opfahra gmacht vadda.
13 Vann ich di himla zu mach so es es kenn reyyah gebt, adda ich mach hoi-shrekka’s land fafressa, adda en peshtelens unnich mei leit shikk,
14 vann mei leit, es gnohmd sinn bei meim nohma, sich daymeedicha un bayda, vann si mei ksicht sucha un funn iahra gottlohsi vayya vekk drayya, no heahrich si fumm himmel, fagebb iahra sinda un hayl iahra land.
15 Nau zayla mei awwa uf sei un mei oahra abheicha zu di gebaydah es gmacht vadda in demm blatz.
16 Ich habb deah tempel ohgnumma un heilich gmacht so es mei Nohma datt is fa’immah, un mei awwa un mei hatz zayla immah datt sei.
17 Un veyyich diah, vann du fannich miah lawfsht vi dei faddah da Dawfit gloffa is, un alles dusht es ich dich hays, un mei gebodda un ksetza haldsht,
18 dann setz ich dei kaynich-shtool fesht, vi ich en bund gmacht habb mitt deim faddah da Dawfit vo ich ksawt habb, ‘Du solsht immah unni fayl en mann havva es ivvah Israel roold.’
19 Avvah vann diah vekk drayyet un mei adninga un gebodda falosset es ich eich gevva habb, un diah gaynd un deenet anri gettah un baydet si oh,
20 dann zayl ich Israel ausvatzla funn meim land es ich eena gevva habb; ich shtohs deah tempel vekk funn meim ksicht es ich heilich gmacht habb fa mei Nohma, un mach een en shprich-vatt un en kshpott unnich alli leit.
21 Un veyyich demm tempel es so hohch gacht is nau, alli-ebbah es fabei gayt zayld fashtaund sei un zayld sawwa, ‘Favass hott da HAH dess gedu zu demm land un zu demm tempel?’
22 Un si zayla sawwa, ‘Veil si da HAH, da Gott funn iahra foah-feddah, falossa henn, deah es si aus em land funn Egypta gebrocht hott, un veil si anri gettah ohgnumma henn un si ohgebayda un gedeend henn—sell is favass es eah awl deah druvvel uf si gebrocht hott.’”
