2 Kaynicha 12:1-21
12 Im sivvet yoah fumm Jehu in Israel, is da Joas kaynich vadda in Juda. Eah voah kaynich in Jerusalem fa fatzich yoah. Sei maemm iahra nohma voah Zibia; see voah funn Beer-Seba.
2 Da Joas hott gedu vass recht voah in di awwa fumm HAH awl sei dawwa, veil da preeshtah Joiada een gland hott.
3 Avvah di hohcha-bletz voahra nett vekk gedu. Di leit henn ohkalda opfahra un brand-opfahra brenna datt.
4 Da Joas hott ksawt zu di preeshtah, “Samlet awl’s geld es rei gebrocht vatt fa en heilich opfah fa da tempel fumm HAH—es geld fumm tax un aw’s geld es frei-villich gevva vatt zumm tempel.
5 Awl di preeshtah sella’s geld greeya funn di geld-handlah, un’s yoosa fa da tempel fixa un ufhalda.”
6 Avvah im drei un zvansisht yoah fumm Kaynich Joas, henn di preeshtah alsnoch da tempel nett ivvah kfixt katt.
7 So hott da Kaynich Joas da Joiada un di anra preeshtah bei groofa un si kfrohkt, “Favass sind diah nett am da tempel fixa? Funn nau on sellet diah nimmi’s geld zu eich nemma funn di geld-handlah, avvah diah sellet’s ivvah-gevva fa da tempel fixa.”
8 Di preeshtah voahra aynich es si nimmi geld nemma zayla funn di leit, un es si selvaht nimmi faseiya sella es da tempel kfixt vatt.
9 No hott da preeshtah Joiada en box gnumma un hott en loch in da dekkel geboaht. Eah hott di box nayvich da awldah gedu uf di rechts seit vo leit in da tempel fumm HAH gayn. Di preeshtah es di deah keet henn, henn awl’s geld in di box gedu es rei in da tempel fumm HAH gebrocht voah.
10 Vann si als ksenna henn es adlich geld in di box voah, is em kaynich sei shreivah un da hohchen-preeshtah kumma un henn’s geld gezayld es kfunna voah im tempel fumm HAH un henn’s in sekk gedu.
11 Vann si moll alles gezayld katt henn, henn si’s zu di ivvah-saynah funn di eahvet fumm tempel gevva. Si henn’s no ausgedayld zu di leit es kshaft henn am tempel fumm HAH—di shreinah un zimmah-mennah,
12 di mavvahrah un shtay-hakkah. Si henn hols un kakti shtay gekawft fa em HAH sei tempel ivvah ufbauwa, un henn betzawld fa alles es nohtvendich voah fa da tempel ivvah fixa.
13 Es geld es rei in da tempel gebrocht voah, voah nett gyoost fa silvah shisla, veecha-trimmahs, shpritza-bowls, blohs-hanna adda ennichi anri sacha macha aus silvah adda gold fa da tempel fumm HAH.
14 Sell geld voah zu di shaff-leit gevva, un si henn’s gyoost fa da tempel ivvah fixa.
15 Di mennah es dess geld gevva voah ditzu henn nett braucha en rechning gevva vi’s geld gyoost voah fa di shaff-leit betzawla, veil si awl eahlich voahra.
16 Es geld fa di shuld-opfahra un sind-opfahra voah nett in da tempel fumm HAH gebrocht veil sell zu di preeshtah keaht hott.
17 No an selli zeit is da Hasael, da kaynich funn Syria, nuff ganga, hott kfochta mitt Gath un hott di shtatt ivvah-gnumma. No hott eah sich gedrayt fa gay un Jerusalem fechta.
18 Avvah da Joas, da kaynich funn Juda, hott awl di heilicha sacha gnumma es sei foah-feddah, da Josaphat, da Joram un da Ahasia, di kaynicha funn Juda, heilich gmacht katt henn, mitt awl di kshenkah es eah selvaht heilich gmacht katt hott, un awl’s gold in di geld-shtubba fumm HAH sei tempel un im kaynich-haus, un hott’s awl zumm Hasael, da kaynich funn Syria kshikt. No is da Kaynich Hasael un sei greeks-gnechta vekk ganga funn Jerusalem.
19 Nau veyyich di ivvahricha sacha im Joas sei kaynich-reich, un vass eah gedu hott, sinn si nett ufkshrivva im buch fumm shreives veyyich di kaynicha funn Juda?
20 Sei evvahshti gnechta henn ausgmacht fa sich ufshtella geyyich een, un henn een doht gmacht am haus Millo uf em vayk noch Silla.
21 Selli evvahshti es een doht gmacht henn voahra em Simeath sei boo, da Josachar, un em Somer sei boo, da Josabad. Eah is kshtauva un voah fagrawva mitt sei foah-feddah in di shtatt fumm Dawfit. Sei boo, da Amazia, is no kaynich vadda in seim blatz.
