2 Mosi 16:1-36
16 Si sinn no naus kshteaht funn Elim un di gans drubb Kinnah-Israel sinn an di Vildahnis funn Sin kumma. Dess is zvishich Elim un Sinai. Si sinn datt anna kumma uf em fuftzayda dawk im zvedda moonet noch demm es si’s land Egypta falossa katt henn.
2 Un di gans drubb Kinnah-Israel henn gegrummeld un kshvetzt geyyich da Mosi un da Aaron in di vildahnis.
3 Di Kinnah-Israel henn ksawt zu eena, “Miah vodda zu Gott miah veahra kshtauva bei em HAH sei hand zrikk im land Egypta. Datt henn miah bei di flaysh kesla kokt, un henn uns foll gessa mitt broht. Avvah diah hend uns do raus in di vildahnis gebrocht fa dee gans drubb doht fahungahra lossa.”
4 No hott da HAH ksawt zumm Mosi, “Nau gukk moll, ich reyyah broht runnah fumm himmel fa eich. Un di leit sella naus gay un en dayl zammah geddahra alli dawk. Sellah vayk vill ich si ausbroviahra fa sayna eb si doon vi ich sawk.
5 Uf em sexda dawk sella si rishta vass si rei bringa, un si sella zvay moll so feel geddahra es anri dawwa.”
6 So hott da Mosi un da Aaron ksawt zu awl di Kinnah-Israel, “Deah ohvet zayla diah vissa es es da HAH voah es eich aus em land funn Egypta gebrocht hott.
7 Un meiya-free zaylet diah di hallichkeit fumm HAH sayna, veil eah eiyah grumles keaht hott geyyich da HAH. Veah sinn miah, es diah grumlet un shvetzet geyyich uns?”
8 Da Mosi hott noch veidah ksawt, “Da HAH gebt eich flaysh fa essa ohvets un awl’s broht es diah vellet meiyets veil eah eiyah gegrummel keaht hott geyyich een. Veah sinn miah? Eiyah gegrummel voah nett geyyich uns avvah geyyich da HAH.”
9 No hott da Mosi ksawt zumm Aaron, “Sawk zu di gans drubb Kinnah-Israel, ‘Kummet nayksht fannich da HAH, fa eah hott eiyah gegrummel keaht.’”
10 Un vi da Aaron kshvetzt hott zu di gans drubb Kinnah-Israel, dann henn si noch di vildahnis gegukt, un datt hott di hallichkeit fumm HAH sich gvissa in di volk.
11 No hott da HAH kshvetzt zumm Mosi un hott ksawt,
12 “Ich habb di Kinnah-Israel iahra gegrummel keaht. Shvetz zu eena un sawk, ‘Am dushbah sellet diah flaysh essa, un meiya-free sellet diah satt sei mitt broht. No sellet diah vissa es ich da HAH eiyah Gott binn.’”
13 Sellah ohvet sinn badreeslen kumma, so feel es da bodda zu gedekt voah um di tents rumm. Un da neksht meiya voah dau uf em bodda gleyya um di tents rumm.
14 Un vo da dau faganga voah, datt uf em grund in di vildahnis voahra glenni rundi kanna gleyya es gegukt henn vi frosht.
15 Vo di Kinnah-Israel dess ksenna henn, henn si nannah kfrohkt, “Vass is dess?” Fa si henn nett gvist vass es is. No hott da Mosi ksawt zu eena, “Dess is broht, sell vass da HAH eich gevva hott fa essa.
16 Un dess is vass eah eich gebodda hott, ‘Yaydah vann soll so feel geddahra es eah brauch fa essa. Nemmet baut zvay gvoaht fa yaydah vann in eiyah tent.’”
17 No henn di Kinnah-Israel so gedu. Samm henn feel gegeddaht un samm yusht bissel.
18 Un vo si’s gmessa henn bei di gvoaht, sellah vo feel gegeddaht katt hott, hott nix ivvahrich katt, un sellah vo yusht bissel gegeddaht katt hott, hott genunk katt. Yaydah vann hott yusht gegeddaht vass eah gebraucht hott fa essa.
19 Da Mosi hott eena no ksawt, “Losset nimmand enniches ivvahrich halda biss da neksht meiya.”
20 Avvah si henn em Mosi nett keicht. Dayl henn samm ivvahrich kalda biss da neksht meiya, un’s hott veahm drinn katt un hott kshtunka. No voah da Mosi bays mitt eena.
21 Alli meiya henn si’s gegeddaht, alli-ebbah so feel es eah essa hott sella. Avvah vo di sunn hays is vadda, dann is es fashmolsa.
22 Uf em sexda dawk henn si zvay mohl so feel gegeddaht—baut fiah gvoaht fa yaydah ebbah—un di foah-gengah funn di leit sinn kumma un henn em Mosi dess ksawt.
23 No hott eah ksawt zu eena, “Dess is vass da HAH gebodda hott, ‘Meiya is da Sabbat-Dawk, en heilichah roo-dawk zumm HAH. So bakket vass diah bakka vellet, un kochet vass diah kocha vellet, un vass ivvahrich is, haldet’s biss meiya.’”
24 So henn si kalda vass ivvahrich voah biss da neksht meiya vi da Mosi ksawt hott, un’s voah nett shtinkich adda veahmich.
25 Da Mosi hott no ksawt, “Esset’s heit, fa heit is da Sabbat-Dawk zumm HAH. Diah zaylet kens finna im feld heit.
26 Fa sex dawk sellet diah’s geddahra avvah uf em sivvada dawk, da Sabbat-Dawk, zayld kens datt sei.”
27 Doch, samm funn di leit sinn naus ganga uf em sivvada dawk, avvah si henn kens kfunna.
28 No hott da HAH ksawt zumm Mosi, “Vee lang shteibahret diah eich fa mei gebodda halda un du vi ich sawk?
29 Gukket moll, da HAH hott eich da Sabbat-Dawk gevva, un fasell gebt eah eich zvay mohl so feel broht uf em sexda dawk. Alli-ebbah soll bleiva vo eah is uf em sivvada dawk, nimmand soll naus gay.”
30 No henn di leit groot uf em sivvada dawk.
31 Un’s haus funn Israel hott dess broht manna kaysa. ’S voah veis vi koriandah-sohma, un hott getayst vi hunnich kucha.
32 Da Mosi hott no ksawt, “Dess is vass da HAH gebodda hott, ‘Nemmet zvay gvoaht manna un haldet’s fa eiyah nohch-kummashaft. Dess is so si’s broht sayna kenna es ich eich gevva habb fa essa in di vildahnis vo ich eich aus Egypta gebrocht habb.’”
33 No hott da Mosi ksawt zumm Aaron, “Nemm en zvay gvoaht tsheah un fill en mitt manna. No du en fannich da HAH, so es es kalda vatt fa eiyah nohch-kummashaft.”
34 So vi da HAH da Mosi gebodda hott, hott da Aaron dess no fannich’s Zeiknis gedu, so es es kalda vatt.
35 Di Kinnah-Israel henn manna gessa fa fatzich yoah, biss si an’s land kumma sinn es leit gvoond henn. Si henn manna gessa biss si an’s land Kanaan kumma sinn.
36 ’S ksha es si gyoost henn fa manna messa, hott baut zvay gvoaht kohva.