2 Mosi 17:1-16
17 Di gans drubb funn di Kinnah-Israel is no naus kshteaht funn di Vildahnis funn Sin. Si sinn ganga funn blatz zu blatz vi da HAH si gebodda hott. No henn si iahra tents uf gedu an Raphidim, avvah’s voah kenn vassah fa di leit zu drinka.
2 Si henn kshtreit mitt em Mosi un henn ksawt, “Gebb uns vassah so es miah drinka kenna.” No hott da Mosi ksawt, “Favass shtreida diah mitt miah? Favass broviahra diah da HAH?”
3 Avvah di leit voahra dashtich fa vassah un henn gegrummeld geyyich da Mosi, un henn ksawt, “Favass hosht du uns ruff aus Egypta gebrocht? Voah’s so es du uns, unsah kinnah un unsah fee fadashta lossa kansht?”
4 No hott da Mosi naus groofa zumm HAH, “Vass soll ich du mitt dee leit? Es nemd nett feel may biss si mich shtaynicha.”
5 No hott da HAH ksawt zumm Mosi, “Gay fannich di leit un nemm samm eldishti funn Israel mitt diah. Nemm da shtokk in dei hand es du da revvah kshlauwa hosht mitt, un gay.
6 Nau heich moll, ich zayl fannich diah shtay datt uf em shtay an Horeb. Du solsht da shtay shlauwa, un vassah zayld raus kumma, so es di leit drinka kenna.” No hott da Mosi dess gedu fannich di eldishti funn Israel.
7 Eah hott sellah blatz no Massa un Meribah kaysa veil di Kinnah-Israel kshtreit henn, un da HAH ausbroviaht henn bei sawwa, “Is da HAH do unnich uns adda nett?”
8 No is da Amalek kumma un hott kfochta mitt Israel an Raphidim.
9 Da Mosi hott no ksawt zumm Joshua, “Lays samm mennah raus fa uns, un gay naus un fecht da Amalek. Meiya zayl ich drovva uf em hivvel shtay mitt da shtokk funn Gott in mei hand.”
10 No hott da Joshua gedu vi da Mosi eem ksawt hott, un hott kfochta mitt em Amalek, avvah da Mosi, da Aaron un da Hur sinn nuff uf da hivvel ganga.
11 So lang es da Mosi sei hand uf kohva hott, voah Israel am beeda, avvah vann sei hand nunnah ganga is dann voah Amalek am beeda.
12 Endlich sinn em Mosi sei hend shveah vadda. No henn si en shtay grikt, henn en unnich da Mosi un eah hott sich druff kokt. Da Aaron un da Hur henn no em Mosi sei hend uf kohva, aynah uf ay seit, un da annah uf di annah seit. Sellah vayk voahra sei hend uf kohva biss di sunn-unnah ganga is.
13 So is da Joshua da Amalek un sei leit ivvah-kumma mitt em shvatt.
14 Da HAH hott no ksawt zumm Mosi, “Shreib dess in en buch es en zrikk-denkes, un sei shuah es da Joshua’s heaht. Ich zayl even’s ohdenkes fumm Amalek folshtendich ausreiva unnich em gansa himmel.”
15 Da Mosi hott no en awldah gebaut un hott’n, “Da HAH is Mei Banner” kaysa.
16 Eah hott ksawt, “Veil da HAH kshvoahra hott, dann zayld da HAH fechta geyyich da Amalek funn nohch-kummashaft zu nohch-kummashaft.”