2 Mosi 19:1-25
19 Im dridda moonet noch demm es di Kinnah-Israel aus Egypta ganga sinn, uf sellah saym dawk, sinn si in di Vildahnis funn Sinai kumma.
2 Noch demm es si naus kshteaht sinn funn Raphidim, sinn si in di Vildahnis funn Sinai kumma un henn iahra tents uf gedu in di vildahnis fannich em berg.
3 No is da Mosi nuff zu Gott ganga, un da HAH hott zu eem groofa fumm berg un hott ksawt, “Dess is vass du sawwa solsht zumm haus fumm Jakob, un vass du di Kinnah-Israel sawwa solsht:
4 ‘Diah selvaht henn ksenna vass ich gedu habb zu di Egyptah, un vi ich eich gedrawwa habb uf awdlah-flikkel, un habb eich zu miah selvaht gebrocht.
5 So nau vann diah mei shtimm heichet un mei bund haldet, dann sellet diah mei aykni leit sei unnich awl di leit. Di gans eaht is mei,
6 avvah diah sellet en preeshtahlich Kaynich-Reich sei fa mich un en heilich folk.’ Dess sinn di vadda es du sawwa solsht zu di Kinnah-Israel.”
7 So is da Mosi zrikk ganga un hott awl di eldishti funn di leit zammah groofa, un hott awl di vadda fannich si glaykt es da HAH eem gebodda hott.
8 No henn awl di leit andvat gevvah un henn ksawt, “Alles es da HAH ksawt hott zayla miah du.” Da Mosi hott no zumm HAH di andvatt gebrocht es di leit ksawt katt henn.
9 No hott da HAH ksawt zumm Mosi, “Nau gukk moll, ich zayl zu diah kumma in en dikki volk, so es di leit heahra kenna vann ich shvetz zu diah, un es si an dich glawva fa’immah.” No hott da Mosi em HAH ksawt vass di leit ksawt katt henn.
10 Da HAH hott no ksawt zumm Mosi, “Gay zu di leit un mach si heilich heit un meiya. Si sella iahra glaydah vesha,
11 un sich rishta fa da dritt dawk. Da dritt dawk kumd da HAH nunnah uf da Berg Sinai diveil es awl di leit vatsha.
12 Du solsht en meik macha um da berg rumm es di leit nett fabei gay sella. Sawk eena, ‘Vatshet eich es diah nett nuff uf da berg gaynd, adda even’s unnahsht end ohrayya doond. Ennich ebbah es dutt vatt geviss doht gmacht.
13 Kenn hand soll sellah mensh ohrayya, un eah soll veiklich kshtaynicht sei adda deich kshossa sei; dess is eb’s en diah is adda en mensh is, eah soll nett layva.’ Yusht vann’s shohf-bokk hann moll lang geblohsa vatt, sella si nuff an da berg gay.”
14 No is da Mosi nunnah zu di leit ganga fumm berg un hott di leit heilich gmacht, un si henn iahra glaydah gvesha.
15 Eah hott no ksawt, “Rishtet eich fa da dritt dawk; gaynd nett nei zu eiyah veivah.”
16 No uf’m meiya fumm dridda dawk voah’s am dimla un gviddahra, un’s voah en dikki volk ivvah da berg. En laut blohs-hann hott geblohsa, un awl di leit henn geziddaht.
17 No hott da Mosi di leit raus gebrocht vekk funn iahra tents fa Gott ohdreffa, un si henn unna am berg kshtanna.
18 Da Berg Sinai voah zu gedekt mitt shmohk veil da HAH runnah kumma is in feiyah. Da shmohk is in di hay ganga vi funn en grohsah offa, un da gans berg hott veesht kshiddeld.
19 Vo’s blohs-hann laudah un laudah vadda is hott da Mosi kshvetzt, un Gott sei shtimm hott eem andvat gevva.
20 Da HAH is no runnah kumma ovva uf da Berg Sinai, un eah hott da Mosi ruff groofa ovva uf da berg. No is da Mosi nuff ganga.
21 Da HAH hott no ksawt zumm Mosi, “Gay nunnah un vann di leit. Dess is so es si iahra vayk nett deich sheeva fa da HAH sayna un feel funn eena umkumma dideich.
22 Un even di preeshtah es nayksht zumm HAH kumma missa sich heilich macha, shunsht brecht da HAH raus uf si.”
23 No hott da Mosi ksawt zumm HAH, “Di leit kenna nett ruff an da Berg Sinai kumma, fa du selvaht hosht uns gvand, ‘Mach en lein um da berg rumm es di leit nett fabei gay kenna, un mach’s heilich.’”
24 Da HAH hott no ksawt, “Gay nunnah un bring da Aaron zrikk ruff mitt diah. Avvah di preeshtah un di leit sella sich nett deich sheeva fa ruff zumm HAH kumma, adda eah brecht sich raus uf si.”
25 No is da Mosi nunnah ganga un hott di leit dess ksawt.