2 Mosi 39:1-43
39 Funn blohwah, purpelah un rohdah goahn henn si di deensht-glaydah gmacht es gyoost voahra am deensht im heilicha tempel-tent. Si henn aw di heilichi glaydah gmacht fa da Aaron so vi da HAH em Mosi gebodda gevva katt hott.
2 Si henn da preeshtah-shatz gmacht aus blohwah, purpelah un rohdah goahn, mitt goldichah naytz un fei getwist linnen duch.
3 Si henn’s gold auskemmaht in sheets un henn’s no ufkshnidda in feini fawda. Dee henn si no nei kshaft mitt em blohwa, purpela un rohda goahn in’s fei linnen duch. Dess voah gedu bei goodi ausnayyah.
4 Si henn shuldah shtraebs gmacht fa da preeshtah-shatz. Dee voahra fesht gmacht an di evvahshta endah funn di zvay shtikkah fa si zammah binna ivvah yaydah shuldah.
5 ’S duch-belt es um da bauch rumm gayt, voah fesht gmacht am preeshtah-shatz, un voah shay gmacht aus di saym satt duch; naymlich, goldichah naytz, blohwah, purpelah un rohdah goahn un fei getwist linnen duch, so vi da HAH da Mosi gebodda katt hott.
6 Si henn keshtlichi onyx-shtay in gold ksetzt, un henn di Kinnah-Israel iahra nayma in di shtay kshnidda so vi en shtay-shneidah dutt in en seal.
7 Si henn di shtay no fesht gmacht an di shuldah shtraebs fa ohdenkes-shtay fa di Kinnah-Israel, so vi da HAH da Mosi gebodda hott.
8 Gegawbdi shaff-leit henn no’s brusht-shtikk gmacht. Si henn’s gmacht vi da preeshtah-shatz funn goldichah naytz, blohwah, purpelah un rohdah goahn un fei getwist linnen duch.
9 ’S voah nein zoll bei nein zoll shkveah. Si henn’s zvay faldich ivvah-nannah gedu un en sakk raus gmacht.
10 Si henn no fiah roiya keshtlichi shtay druff gnayt. In di eahsht roi voah en ruby, en topaz un en emerald-shtay gvest.
11 In di zvett roi voah en turquoise, en sapphire un en diamond shtay gvest.
12 In di dritt roi voah en jacinth, en agate un en amethyst shtay gvest.
13 Un in di fiaht roi voah en beryl, en onyx un en jasper shtay gvest. Dee shtay voahra awl in gold nei ksetzt.
14 Es voahra zvelf shtay, aynah fa yaydah nohma funn di Kinnah-Israel. Da nohma funn ay shtamm funn di Kinnah-Israel voah uf yaydah shtay kshnidda so vi ma dutt uf en seal.
15 Si henn kedda gmacht funn pyuah gold fa’s brusht-shtikk. Si henn si zammah kflochta vi en shtrikk.
16 Si henn keshtlichi shtay in zvay goldichi shtikkah ksetzt un aw zvay goldichi rings. Si henn di zvay rings in di zvay evvahshta ekkah fumm brusht-shtikk gedu.
17 Di zvay goldichi kedda voahra fesht gmacht an di rings in di ekkah fumm brusht-shtikk.
18 Di zvay anra endah funn di kedda voahra fesht gmacht an di zvay goldichi shtikkah mitt keshtlichi shtay drinn, fanna uf di shuldah shtraebs fumm preeshtah-shatz.
19 Si henn zvay goldichi rings gmacht un henn si fesht gmacht an di inseit funn di zvay unnahshta ekkah fumm brusht-shtikk neksht zumm preeshtah-shatz.
20 No henn si zvay anri goldichi rings gmacht un henn si fesht gmacht am unnahsht end funn di shuldah shtraebs, fanna nayksht am sohm yusht ovvich em duch-belt fumm preeshtah-shatz.
21 Si henn di rings fumm brusht-shtikk zu di rings fumm preeshtah-shatz gebunna mitt blohwi shnuah. Dess hott si fesht gmacht am duch-belt un hott’s brusht-shtikk kalda funn naus shvinga vekk fumm preeshtah-shatz. Dess voah vi da HAH em Mosi gebodda gevva katt hott.
22 Si henn no da ausahsht rokk unnich em preeshtah-shatz alles aus bloh duch gmacht.
23 Si henn en loch ovva in da rokk gmacht un henn en sohm drumm rumm gnayt so es es nett fareist.
24 Si henn grannat-ebbel gmacht aus blohwah, purpelah un rohdah goahn un fei getwist linnen duch, un henn si um da sohm unna am rokk rumm gnayt.
25 Si henn no bells aus pyuah gold gmacht un henn si fesht gmacht zvishich di grannat-ebbel gans um da sohm rumm.
26 Si henn di bells un di grannat-ebbel alli annah vann um da sohm fumm ausahrah rokk rumm gnayt. Da preeshtah hott deah rokk gvoahra vann eah da HAH gedeend hott grawt vi da HAH em Mosi gebodda gevva katt hott.
27 Si henn aw rekk gmacht aus fei linnen duch es unnich di ausahra rekk ganga sinn fa da Aaron un sei boova.
28 Di kobb-dichah, di kobb-banda un di hossa voahra awl gmacht aus fei getwist linnen duch.
29 Si henn’s belt gmacht aus fei getwist linnen duch un’s ausgnayt mitt blohwa, purpelah un rohdah goahn. Dee sacha voahra alles gmacht so vi da HAH da Mosi gebodda hott.
30 Si henn en glay dellah gmacht aus fei gold fa da heilich krohn, un henn dee vadda nei kshnidda vi ma dutt uf en seal: “HEILICH ZUMM HAH”
31 No henn si en blohwi shnuah droh fa’s am kobb-duch fesht macha. Dess voah vi da HAH da Mosi gebodda hott.
32 So voah endlich awl di eahvet fumm tempel-tent un aw da fasammling tent faddich gmacht. Di Kinnah-Israel henn alles gedu grawt vi da HAH em Mosi di gebodda gevva katt hott.
33 No henn si da tempel-tent zumm Mosi gebrocht. Si henn awl dess sach zu eem gebrocht: da tent un awl’s sach inseit, di hohka, di beaht, di braces, di poshta un di fees;
34 ’s dach es gmacht is aus roht kfeahbdi shohf-bokk-haut, ’s dach funn badger-haut un’s curtain fannich em Heilichshta Blatz,
35 di Bundes-Lawt mitt iahra pohls un da gnawda-shtool,
36 da dish, awl’s ksha es mitt em dish gayt, un’s shau-broht,
37 da pyuah goldich lichtah-shtaend mitt sei roi lichtah un awl sei ksha, un’s ayl fa’s licht,
38 da goldich awldah, ’s salb-ayl un’s goot-shmakkich insens, ’s curtain ivvah di deah fumm tent,
39 da bronze-alwdah mitt sei bronze grate, di pohls un awl’s ksha es mitt em awldah gayt, di vesh-shissel un iahra shtaend,
40 di curtains fa da hohf mitt sei poshta un fees, ’s curtain fa’s doah zumm hohf mitt sei shtrikk un tent-shtikkel, un awl’s ksha fa da deensht fumm tempel-tent, sell is da fasamling-tent,
41 di glaydah fa da deensht im Heilicha-Blatz, sell is, di heilicha glaydah fa da preeshtah Aaron un di glaydah fa sei boova vann si iahra preeshtah-deensht ausfiahra.
42 Di Kinnah-Israel henn awl selli eahvet gedu grawt vi da HAH da Mosi gebodda katt hott.
43 Da Mosi hott di eahvet ivvah-gegukt, un hott ksenna es si’s gedu katt henn grawt vi da HAH gebodda hott. No hott da Mosi si ksaykend.
