2 Mosi 8:1-32
8 No hott da HAH ksawt zumm Mosi, “Gay zumm Pharao un sawk zu eem, ‘Dess is vass da HAH sawkt, “Loss mei leit gay so es si mich deena kenna.
2 Avvah vann du’s nett dusht fa si gay lossa, dann mach ich fresh ivvah’s gans land kumma.
3 Da revvah zayld shvoahma mitt fresh un si zayla ruff kumma in dei haus, in dei bett-shtubb, in dei bett, in di heisah funn dei gnechta, uf dei leit, in eiyah bakk-effa un in eiyah dayk-shisla.
4 Sellah vayk zayla di fresh ruff kumma uf dich un dei leit un uf awl dei gnechta.”’”
5 No hott da HAH ksawt zumm Mosi, “Sawk zumm Aaron, ‘Shtrekk dei hand naus mitt deim shtokk ivvah di revvahra, ivvah di grikka, un ivvah di vassah-lechah, un mach di fresh ruff kumma ivvah’s land Egypta.’”
6 So hott da Aaron sei hand ivvah’s vassah funn Egypta kshtrekt, un di fresh sinn ruff kumma un henn’s land funn Egypta zu gedekt.
7 Un di hexah henn’s saym ding gedu mitt iahra hexahrei. Si henn aw di fresh gmacht ruff kumma uf’s land Egypta.
8 No hott da Pharao da Mosi un da Aaron bei groofa un hott ksawt, “Bitt da HAH es eah dee fresh vekk nemd funn miah un mei leit. No loss ich di leit gay, so es si opfahra kenna zumm HAH.”
9 Da Mosi hott no ksawt zumm Pharao, “Di eah is dei fa sawwa vann ich bayda soll fa dich un dei gnechta un dei leit, so es diah un eiyah heisah lohs sind funn di fresh, un viddah yusht im revvah sinn.”
10 Da Pharao hott ksawt, “Meiya.” Da Mosi hott ksawt, “’S zayld sei vi du sawksht, so es du vissa solsht es es nimmand hott vi da HAH unsah Gott.
11 Di fresh zayla dich, dei heisah, dei gnechta un dei leit falossa, un zayla yusht viddah im revvah sei.”
12 Da Mosi un da Aaron sinn no vekk fumm Pharao ganga. Un da Mosi hott zumm HAH gebayda veyyich di fresh es eah uf da Pharao gebrocht hott.
13 Un da HAH hott gedu vass da Mosi een kfrohkt hott. Di fresh sinn doht ganga in di heisah, di haus-hohfa un di feldah.
14 Si henn si in heifa gedu un’s land hott kshtunka.
15 Avvah vo da Pharao ksenna hott es si frei voahra funn di fresh, hott eah sei hatz viddah hatt gmacht un eena nett keicht. Dess voah grawt vi da HAH ksawt katt hott.
Da Blohk Funn Shtech-Mukka
16 No hott da HAH ksawt zumm Mosi, “Sawk zumm Aaron, ‘Shtrekk dei shtokk naus un shlakk da shtawb funn di eaht, so es da shtawb shtech-mukka vatt gans deich’s land Egypta.’”
17 Si henn no so gedu. Da Aaron hott sei hand naus kshtekt mitt sei shtokk un hott da shtawb funn di eaht kshlauwa, un’s voahra shtech-mukka uf di leit un em fee. Awl da shtawb is shtech-mukka vadda deich’s gans land funn Egypta.
18 Di hexah henn broviaht shtech-mukka macha mitt iahra hexahrei, avvah si henn nett kenna. So voahra shtech-mukka uf di mensha un uf em fee.
19 No henn di hexah ksawt zumm Pharao, “Dess is da fingah funn Gott.” Avvah em Pharao sei hatz voah hatt gmacht, un eah hott eena nett keicht, grawt vi da HAH ksawt katt hott.
Da Blohk Funn Mukka-Shvoahms
20 Da HAH hott no ksawt zumm Mosi, “Shtay uf free meiyets un veis dich zumm Pharao vi eah an’s vassah gayt. Sawk zu eem, ‘Dess is vass da HAH sawkt, “Loss mei leit gay, so es si mich deena kenna.
21 Vann du mei leit nett gay losht, dann shikk ich shvoahma funn mukka uf dich un dei gnechta, uf dei leit un in iahra heisah. Di heisah funn di Egyptah zayla foll shvoahms funn mukka sei un aw da grund vo si sinn.
22 Avvah in sellah dawk zayl ich en unnahshitt macha im land Goshen vo mei leit sinn. Datt zayla kenn mukka sei, un deich sell kansht du vissa es ich da HAH in di mitt funn di eaht binn.
23 Ich mach en unnahshitt zvishich mei leit un dei leit. Deah zaycha zayld meiya sei.”’”
24 No hott da HAH so gedu. Es sinn grohsi shvoahma mukka im Pharao sei heisah un in sei gnechta iahra heisah kumma. Un’s land voah fasaut bei dee shvoahma funn mukka im gansa land Egypta.
25 No hott da Pharao da Mosi un da Aaron bei groofa un hott ksawt, “Gaynd un opfahret zu eiyah Gott do im land.”
26 Avvah da Mosi hott ksawt, “Es is nett recht fa so do. Di opfahra es miah opfahra zu unsah gott veahra grausam zu di Egyptah. Vann miah opfahra dayda vass grausam is fannich iahra awwa, dayda si uns nett shtaynicha?
27 Miah missa drei dawk ay vayk in di vildahnis nei gay un zumm HAH unsah Gott opfahra vi eah uns gebodda hott.”
28 No hott da Pharao ksawt, “Ich loss eich gay so es diah opfahra kennet zumm HAH eiyah Gott in di vildahnis. Avvah diah daufet nett veit vekk gay. Baydet fa mich.”
29 Da Mosi hott ksawt, “Ich gay naus funn diah vekk. Un ich zayl bayda zumm HAH es di shvoahma funn mukka da Pharao, sei gnechta, un sei leit falossa sella meiya. Yusht loss da Pharao uns nett viddah ohfiahra un di leit nett gay lossa opfahra zumm HAH.”
30 No is da Mosi fumm Pharao vekk un hott gebayda zumm HAH.
31 Da HAH hott no gedu vi da Mosi kfrohkt hott, un hott di shvoahma funn mukka fumm Pharao, funn sei gnechta un funn sei leit vekk gnumma. Nett ayni voah ivvahrich.
32 Avvah da Pharao hott viddah sei hatz hatt gmacht, un hott di leit nett gay glost.