2 Thessalonicher 1:1-12
1 Paulus, Silvanus un Timotheus zu di gmay funn di Thessalonicha, vo in Gott da Faddah un im Hah Jesus Christus sinn.
2 Gnawt un fridda sei zu eich funn Gott unsah Faddah un em Hah Jesus Christus.
Es Gericht Es Kumd Vann Christus Moll Kumd
3 Miah sedda immah Gott danka fa eich, leevi breedah, vi’s sich heaht, veil eiyah glawva am vundahboah vaxa is, un di leevi es alli-ebbah hott fa nannah is am graysah vadda.
4 Fasell, shvetza miah eich uf in di gmayna funn Gott fa eiyah geduld un glawva in alles es diah deich machet, un di dreebsawl es diah drinn sind.
5 Dess sawkt uns es Gott sei gericht recht is, so es diah’s veaht gezayld sind fa’s Kaynich-Reich funn Gott, dess vass diah am leida sind difoah.
6 So, Gott saynd’s es en gerecht ding fa selli leida macha vo eich leida macha.
7 Avvah diah vo am dreebsawl leida sind zaylet roo greeya mitt uns vann Jesus, da Hah, sich moll veist fumm Himmel mitt sei mechtichi engel.
8 Eah kumd mitt feiyah-flamm un shtrohft selli vo Gott nett bekenna, un vo’s Effangaylium funn unsah Hah Jesus nett heicha.
9 Si zayla kshtrohft vadda mitt ayvich fadeahves, un vekk kalda vadda funn Gott sei ksicht un sei hallichi macht,
10 vann eah moll kumd fa hallichkeit greeya funn awl sei saylichi leit. Un awl di glawvicha zayla fashtaund sei ivvah een in sellem dawk. Dess nemd eich ei, veil diah geglawbt henn vass miah eich ksawt henn.
11 Fasell, doon miah immah bayda fa eich es unsah Gott eich’s veaht find funn seim beroof. Miah bayda es eah awl eiyah goodi falanga un alli eahvet funn glawva folfild mitt graft.
12 Dess is so es da nohma funn unsah Hah Jesus heilich gmacht vatt in eich un diah in eem, deich di gnawt funn unsah Gott un em Hah Jesus Christus.
