4 Mosi 13:1-33
13 Da HAH hott ksawt zumm Mosi,
2 “Shikk samm mennah fa’s land Kanaan ausgukka, dess es ich di Kinnah-Israel gevva zayl. Shikk aynah es en evvahshtah is funn alli foah-faddah shtamm.”
3 So hott da Mosi si kshikt aus di Vildahnis funn Pharan vi da HAH gebodda hott. Awl di mennah voahra evvahshti funn di Kinnah-Israel.
4 Dess voahra iahra nayma:fumm shtamm Ruben, da Sammua,em Sakkur sei boo;
5 fumm shtamm Simeon, da Saphat,em Hori sei boo;
6 fumm shtamm Juda, da Kaleb,em Jephunne sei boo;
7 fumm shtamm Isachar, da Jigeal,em Joseph sei boo;
8 fumm shtamm Ephraim, da Hosea,em Nun sei boo;
9 fumm shtamm Benjamin, da Palti,em Raphu sei boo;
10 fumm shtamm Sebulon, da Gaddiel,em Sodi sei boo;
11 fumm shtamm Manasse aus em Joseph,da Gaddi, em Susi sei boo;
12 fumm shtamm Dan, da Ammiel,em Gemalli sei boo;
13 fumm shtamm Asser, da Sethur,em Michael sei boo;
14 fumm shtamm Naphthali, da Nahebi, emVaphsi sei boo;
15 fumm shtamm Gad, da Guel, em Machi sei boo.
16 Sell sinn di nayma funn di mennah es da Mosi kshikt hott fa’s land ausgukka. Da Mosi hott em Hosea da nohma Joshua gevva.
17 Vo da Mosi si kshikt hott fa Kanaan ausgukka, hott eah ksawt, “Gaynd nuff deich’s sauda-land un no on nuff in’s hivvel-land.
18 Gaynd un saynet vi’s land is un eb di leit es datt voona shteik adda shvach sinn, un eb si feel adda vennich sinn.
19 Gukket vass fa land es si drinn voona, eb’s goot adda shlecht is. Vass fa shtett voona si drinn? Sinn si unni vanda adda eigmavvaht?
20 Vee is da grund, goot adda shlecht? Hott’s baym datt adda nett? Broviahret un bringet samm frucht fumm land.” Es voah an di zeit es di eahshta drauva zeidich voahra.
21 So sinn si nuff ganga un henn’s land ausgegukt funn di Vildahnis funn Zin biss an Rehob, vo ma zu Hamath kumd.
22 Si sinn nuff deich’s sauda-land ganga un sinn an Hebron kumma vo da Ahiman, da Sesai un da Thalmai, di nohch-kummashaft fumm Anak, voahra. (Nau Hebron voah gebaut sivva yoah eb Zoan in Egypta.)
23 No sinn si an di Valley funn Eskol kumma, un datt henn si en nasht abkshnidda mitt yusht ay hengel drauva. Zvay mennah henn deah hengel gedrawwa uf en pohl zvishich eena, mitt aw samm grannat-ebbel un feiya.
24 Sellah blatz voah di Valley funn Eskol kaysa veil di Kinnah-Israel da hengel drauva abkshnidda henn datt.
Di Mennah Kumma Zrikk Fumm Land
25 Noch fatzich dawk sinn si zrikk kumma fumm land ausgukka.
26 Si sinn zrikk zumm Mosi un em Aaron un di gans fasamling funn di Kinnah-Israel an Kades in di Vildahnis funn Pharan kumma. Si henn eena un di gans fasamling ksawt veyyich em land, un henn eena di frucht fumm land gvissa.
27 Dess is vass si em Mosi ksawt henn: “Miah sinn in’s land ganga es du uns nei kshikt hosht, un veiklich millich un hunnich lawft drinn! Do is di frucht.
28 Avvah di leit es datt voona sinn shteik, un iahra shtett sinn eigmavvaht un oahrich grohs. Un miah henn aw leit ksenna datt es funn di nohch-kummashaft fumm Anak voahra.
29 Di Amalekiddah voona im sauda-land, di Hethiddah, di Jebusiddah un di Amoriddah voona im hivvel-land, un di Kanaaniddah voona nayksht am say un am Jordan Revvah nohch.”
30 No hott da Kaleb di leit shtill gmacht fannich em Mosi un hott ksawt, “Miah sedda nuff gay un’s land ivvah-nemma, fa miah kenna’s geviss du.”
31 Avvah di mennah es nuff ganga sinn mitt eem henn ksawt, “Miah kenna selli leit nett fechta; si sinn shteikah es miah sinn.”
32 No henn si en shlecht kshvetz ausgevva unnich di Kinnah-Israel veyyich em land es si unnah-ksucht katt henn. Si henn ksawt, “Es land es miah deich ganga sinn fa’s ivvah-gukka, is en land es selli frest es drinn voona. Un awl di leit es miah ksenna henn drinn sinn oahrich grohs.
33 Miah henn aw di grohsa rawsichi leit, di Nephilim, ksenna datt (di nohch-kummashaft fumm Anak kumd funn di Nephilim). In unsah aykni awwa sinn miah vadda vi hoi-shrekka, un miah voahra aw so zu eena.”
