4 Mosi 14:1-45
14 No henn di leit funn di gans fasamling ohkfanga laut heila un si henn di gans nacht keild.
2 Un awl di Kinnah-Israel henn gegrummeld geyyich da Mosi un da Aaron, un di gans fasamling hott ksawt zu eena, “Miah vodda miah veahra kshtauva in Egypta adda in dee vildahnis.
3 Favass is da HAH am uns zu dess land bringa yusht so es miah umkumma mitt em shvatt? Miah vadda grawbt funn unsah veivah un kinnah. Veah’s nett bessah vann miah zrikk an Egypta gay dayda?”
4 Si henn ksawt zu nannah, “Vella en hauptmann ivvah uns setza un zrikk an Egypta gay.”
5 No is da Mosi un da Aaron uf iahra ksicht kfalla fannich awl di Kinnah-Israel es fasammeld voahra datt.
6 Da Joshua, em Nun sei boo, un da Kaleb, em Jephunne sei boo, dee es unnich selli voahra es es land ausgegukt henn, henn iahra glaydah farissa.
7 Si henn ksawt zu di Kinnah-Israel es fasammeld voahra, “Es land es miah deich ganga sinn is en oahrich goot land.
8 Vann miah em HAH kfellich sinn, dann fiaht eah uns in sell land un gebt’s zu uns, en land es millich un hunnich drinn lawft.
9 Avvah gaynd nett geyyich da HAH. Un feichet eich nett veyyich di leit fumm land, fa si zayla sei vi broht zu uns. Si henn nimmand fa si heeda, avvah miah henn da HAH. Feichet eich nett veyyich eena.”
10 Avvah di gans fasamling hott ohkfanga shvetza fa si shtaynicha. No hott di hallichkeit fumm HAH sich gvissa am fasamling-tent zu awl di Kinnah-Israel.
11 Un da HAH hott ksawt zumm Mosi, “Vee lang zayla dee leit mich fa’eiyahra? Vee lang zayla si’s nett du fa an mich glawva, noch awl di zaycha es ich gedu habb unnich eena?
12 Ich zayl si shlauwa mitt peshtelens un si ausreiva, avvah ich mach dich in en leit es graysah un shteikah is es si.”
13 Avvah da Mosi hott ksawt zumm HAH, “No heahra di Egyptah diveyya! Du hosht dee leit ruff aus eena gebrocht mitt dei graft.
14 Un si zayla di leit funn demm land sawwa diveyya. Si henn nau shund keaht es du, oh HAH, mitt dee leit bisht, un es du, oh HAH, ksenna voahsht ksicht zu ksicht un dei volk ivvah si bleibt. Si henn keaht es du fannich eena heah gaysht deich da dawk in en volklichah poshta, un in en feiyahrichah poshta deich di nacht.
15 Vann du dee leit awl umbringsht an ay zeit, dann zayla di heida es awl dess keaht henn veyyich diah sawwa,
16 ‘Da HAH hott dee leit nett in’s land bringa kenna es eah eena fashprocha hott un es eah kshvoahra hott fa du. So hott eah si kshlachta in di vildahnis.’
17 Nau loss em HAH sei graft gvissa sei, grawt vi du ksawt hosht:
18 ‘Da HAH is geduldich mitt grohsi bamhatzichkeit, un fagebt sinda un ivvah-dreddes. Avvah eah lost di shuldicha nett unkshtrohft gay; eah shtrohft di kinnah fa di sinda funn iahra feddah biss an di dritt un fiaht sett nohch-kummashaft.’
19 So nau fagebb di sinda funn dee leit mitt dei shtandhaftichi-leevi, grawt vi du si fagevva hosht funn di zeit es si Egypta falossa henn biss nau.”
20 Da HAH hott no ksawt, “Ich habb si fagevva, so vi du kfrohkt hosht.
21 Avvah so voah es ich layb, un so voah es di hallichkeit fumm HAH di gans eaht fild,
22 nett ayns funn di mennah es mei hallichkeit un zaycha ksenna henn es ich gedu habb in Egypta un in di vildahnis, dee es miah nett keicht henn, un henn mich dee zeyya mohl fasucht,
23 nett ayns funn eena zayld’s land sayna es ich fashprocha habb un kshvoahra habb fa gevva zu iahra foah-feddah. Nimmand es mich fa’eiyaht hott zayld’s sayna.
24 Avvah mei gnecht da Kaleb hott en anra geisht un folkt miah folshtendich nohch; fasell, zayl ich een in’s land bringa es eah nei ganga is, un sei nohch-kummashaft zayld’s eahva.
25 Nau siddah es di Amalekiddah un di Kanaaniddah drunna in di valleys voona, dann drayyet rumm meiya un gaynd naus in di vildahnis uf em vayk noch em Rohda Say.”
26 Da HAH hott no ksawt zumm Mosi un em Aaron:
27 “Vee lang zayla dee ungettlichi leit grumla geyyich mich? Ich habb da glawk un’s grumles funn dee Kinnah-Israel keaht.
28 So, sawk eena, ‘So shuah es ich layb, sawkt da HAH, dann zayl ich grawt du zu eich vi ich eich keaht habb sawwa:
29 Eiyah dohdi leivah zayla falla in di vildahnis, alli-ebbah es gnambaht voah funn zvansich yoah ald adda drivvah, un es gegrummeld hott geyyich mich.
30 Nett ayns funn eich zayld in’s land gay es ich kshvoahra habb fa eich en haymet macha, unni yusht da Kaleb em Jephunne sei boo, un da Joshua em Nun sei boo.
31 Avvah eiyah kinnah es diah ksawt hend es eich kshtohla vadda zayla, ich zayl si in’s land bringa es diah nunnah gedrayt hend, un si zayla fraylich sei drinn.
32 Avvah eiyah leivah zayla falla in di vildahnis.
33 Eiyah kinnah zayla shohf-heedah sei do in di vildahnis fa fatzich yoah, un zayla betzawla fa eiyah unglawva biss eiyah dohdi leivah awl do in di vildahnis leiya.
34 Fa fatzich yoah, ay yoah fa alli dawk es diah’s land ausksucht hend, zayla diah eiyah shuld drawwa. No finnet diah aus vi’s is vann ich geyyich eich binn.’
35 Ich, da HAH, habb kshvetzt, un ich zayl voahlich dee sacha du zu dee ungettlicha leit, dee es zammah ganga sinn geyyich mich. Si zayla umkumma in dee vildahnis; do zayla si shtauva.”
36 Selli mennah es da Mosi kshikt katt hott fa’s land ausgukka, un es zrikk kumma sinn un di leit gmacht henn grumla geyyich een bei shlechti sacha sawwa veyyich em land,
37 selli mennah es shlecht kshvetzt henn veyyich em land voahra nunnah kshlauwa un sinn kshtauva fannich em HAH mitt en veeshti granket.
38 Funn selli mennah es ganga sinn’s land ausgukka, yusht da Joshua, em Nun sei boo, un da Kaleb, em Jephunne sei boo, sinn levendich geblivva.
39 Vo da Mosi dess ksawt hott zu di Kinnah-Israel, dann henn si oahrich keild.
40 Free da neksht meiya sinn si ufkshtanna un sinn nuff geyyich’s hohch hivvel-land ganga. Si henn ksawt, “Do sinn miah, miah henn ksindicht, avvah nau gayn miah nuff in da blatz es da HAH uns fashprocha hott.”
41 Avvah da Mosi hott ksawt, “Favass doond diah nau em HAH sei gebott ivvah-dredda? Dess zayld nett ausshaffa fa eich.
42 Gaynd nett nuff, fa da HAH is nett bei eich. Diah vaddet nunnah kshlauwa bei eiyah feinda.
43 Di Amalekiddah un di Kanaaniddah zayla datt sei fannich eich. Veil diah vekk gedrayt sind fumm HAH, dann is eah nett bei eich, un diah zaylet umkumma bei em shvatt.”
44 Avvah di leit sinn yusht on ganga geyyich em hohcha hivvel-land, even vann di Bundes-Lawt fumm HAH un da Mosi in di camp geblivva sinn.
45 No sinn di Amalekiddah un di Kanaaniddah es datt im hivvel-land gvoond henn, runnah kumma un henn si kshlauwa un si gyawkt gans biss an Horma.
