Matthäus 7:1-29
7 “Richtet nett, adda diah selvaht vaddet aw gricht.
2 Fa grawt vi diah anri richtet, so zaylet diah aw gricht vadda. Es vatt eich gmessa grawt vi diah messa doond fa anri.
3 Favass saynsht du da shliffah in deim nochbah sei awk, un saynsht nett da balka in deim aykna awk?
4 Adda vi daufsht du sawwa zu deim nochbah, loss mich da shliffah aus dei awk macha, un an di saym zeit hosht du en balka in deim aykna awk?
5 Du heichlah; du seahsht da balka aus deim aykna awk macha, no kansht du bessah sayna fa da shliffah aus deim nochbah sei awk macha.
6 Gevvet nett sell vass heilich is zu di hund, un shmeiset nett eiyah keshtlichi sacha zu di sei, shunsht doon si’s fadredda mitt di fees un no rumm drayya un eich fareisa.”
Frohwa, Sucha Un Ohglobba
7 “Frohwet, no vatt’s eich gevva; suchet, no zaylet diah finna; globbet oh, no vatt’s uf gmacht zu eich.
8 Alli-ebbah es frohkt, zayld greeya, un alli-ebbah es sucht, zayld finna. Un deah vo ohglobt, zu eem vatt’s uf gmacht.
9 Is ennichah mann unnich eich es sei boo en shtay gebt vann eah frohkt fa broht?
10 Adda vann eah frohkt fa en fish, gebt eah eem en shlang?
11 So dann, vann diah vo sindlich sind, visset vi goodi kshenkah zu eiyah kinnah gevva, vi feel may dutt eiyah Faddah im Himmel goodi sacha gevva zu denna vo een frohwa.
12 Vass-evvah es diah havva vellet es leit doon zu eich, so sellet diah du zu eena. Es Ksetz un di Brofayda doon eishtimma mitt sellem.”
Es Eng Doah
13 “Gaynd nei deich’s glay doah. Es doah is grohs un da vayk is brayt es zu di fadamnis gayt, un’s sinn feel leit es datt nei gayn.
14 Avvah’s doah is glay un da vayk is eng es zumm ayvich layva gayt, un’s sinn vennich leit es es finna.”
En Bohm Un Sei Frucht
15 “Gevvet acht fa di falsha brofayda. Si kumma zu eich in shohf glaydah avvah innahlich sinn si velf es eich fareisa vella.
16 An iahra frucht sellet diah si kenna. Kann ebbah drauva greeya funn danna, adda feiya funn dishtla?
17 So alli goodah bohm hott goodi frucht, avvah en shlechtah bohm hott shlechti frucht.
18 En goodah bohm kann nett shlechti frucht havva, un en shlechtah bohm kann nett goodi frucht havva.
19 Alli bohm es nett goodi frucht hott zayld abkakt vadda un vatt in’s feiyah kshmissa.
20 So sellet diah si kenna bei iahra frucht.
21 Nett alli-ebbah es sawkt, ‘Hah, Hah,’ zu miah, zayld in’s Himmel-Reich kumma. Yusht dee vo meim Faddah im Himmel sei villa doon, zayla nei kumma.
22 Es zayla feel leit sawwa zu miah an sellem dawk, ‘Hah, henn miah nett gebreddicht in deim nohma? Henn miah nett baysi geishtah ausgedrivva in deim nohma? Un henn miah nett feel vundahboahri sacha gedu in deim nohma?’
23 No zayl ich grawt raus sawwa zu eena, ‘Ich vays nix funn eich, diah sindah, gaynd vekk funn miah!’”
Fuddahs Uf Felsa Un Uf Sand
24 “So veah-evvah es mei vadda heaht un dutt si, een doon ich fagleicha zu en mann mitt veisheit es sei haus uf en felsa gebaut hott.
25 No hott’s hatt greyyaht un’s vassah is hohch vadda, un da vind hott veddah sell haus geblohsa, avvah’s is nett zammah kfalla, veil’s uf da felsa gebaut voah.
26 Un veah-evvah es mei vadda heaht un dutt si nett, een doon ich fagleicha zu en mann unni veisheit es sei haus uf da sand gebaut hott.
27 No hott’s hatt greyyaht un’s vassah is hohch vadda, un da vind hott veddah sell haus geblohsa, un’s is zammah kfalla un voah alles fadauva.”
28 Vo Jesus faddich voah dee sacha sawwa, voahra di leit oahrich fashtaund ivvah vass eah si gland hott.
29 Fa eah hott si gland vi ebbah es es recht hott diveyya, un nett vi di shrift-geleahrah.
