Römer 10:1-21
10 Leevi breedah, mei hatzlichah vinsh un gebayt zu Gott fa di leit funn Israel is es si saylich vadda dayda.
2 Ich gebb eena zeiknis es si eahnshtlich sinn fa Gott, avvah iahra eahnsht is nett gebaut uf rechti eisicht.
3 Fa diveil es si Gott sei gerechtichkeit nett fashtayn, un vella iahra aykni gerechtichkeit ausshaffa, dann henn si sich nett unnich di gerechtichkeit funn Gott gevva.
4 Christus is es end fumm Ksetz, un veah an een glawbt is gerecht.
Di Saylichkeit Is Fa Alli-Ebbah
5 Da Mosi shreibt deahra vayk veyyich di gerechtichkeit fumm Ksetz: “Da mensh es dee sacha dutt zayld datt dibei layva.”
6 Avvah di gerechtichkeit es kumd deich da glawva sawkt dess: “Sawk nett in deim hatz, ‘Veah soll nuff in da Himmel gay?’ (sell is, fa Christus runnah bringa),
7 adda, ‘Veah soll nunnah in’s deefa gay?’ (sell is, fa Christus ruff hohla funn di dohda).”
8 Avvah vass sawkt’s? “Es Vatt is nayksht bei diah, uf dei leftz un in deim hatz”—sell is, es Vatt fumm glawva es miah breddicha.
9 Fa vann du bekensht mitt deim maul es Jesus da Hah is, un glawbsht in deim hatz es Gott een uf gvekt hott funn di dohda, dann vasht du saylich.
10 Mitt em hatz dutt en mann glawva un vatt gerecht, un mitt em maul dutt en mann bekenna un vatt saylich.
11 Fa di Shrift sawkt, “Veah an een glawbt, zayld nett zumm shohm gebrocht sei.”
12 Es is kenn unnahshitt zvishich di Yudda un di Greeyisha. Fa da saym Hah is Hah ivvah alli-ebbah, un is reich zu awl selli es een ohroofa.
13 Fa, “Veah-evvah es da nohma fumm Hah ohrooft zayld saylich vadda.”
14 Avvah vi sella si deah ohroofa es si nett droh geglawbt henn? Un vi sella si an deah glawva es si nett keaht henn difunn? Un vi sella si heahra unni en breddichah?
15 Un vi sella si breddicha unni es si kshikt sinn? So vi’s kshrivva shtayt, “Vi leeblich sinn di fees funn selli es fridda un goodi sacha breddicha.”
16 Avvah si henn nett awl’s Effangaylium keicht, fa da Jesaia sawkt, “Hah, veah hott geglawbt vass miah gebreddicht henn?”
17 So dann, da glawva kumd deich heahra, un heahra kumd deich’s Vatt Gottes.
18 Ich sawk avvah, henn si nett keaht? Yoh, si henn. Es is kshrivva,“Iahra shtimm is naus ganga in di gans eaht,un iahra vadda zumm end funn di veld.”
19 Ich frohk viddah, hott Israel nett fashtanna? Am eahshta blatz hott da Mosi ksawt,“Ich zayl eich fagunshtlich macha deich en leit es nix sinn,un deich en leit es nix fashtayn, zayl ich eich zannich macha.”
20 Avvah da Jesaia hott grawt fanna rumm ksawt,“Ich voah kfunna bei selli es mich nett ksucht henn;ich habb mich gvissa zu selli es miah nett nohch kfrohkt henn.”
21 Avvah zu Israel sawkt eah,“Da gans dawk lang habb ich mei hend naus kshtrektzu en leit es dikk-kebbich sinn un es zrikk shvetza.”
