Römer 3:1-31
3 Vass henn dann di Yudda ivvah anri? Adda vass goot is di beshneidung?
2 Feel in alli vayya. Am eahshta blatz, di Yudda voahra fadraut mitt di Vadda funn Gott.
3 So vass veyyich samm es nett glawva? Kann iahra unglawva da glawva funn Gott zu nix macha?
4 Ich dayt moll nett denka! Loss Gott voah kfunna sei, un alli mensh en leeyah; so vi’s kshrivva shtayt,“So es du gerecht kfunna vasht in dei vadda,un es du ivvah-kumsht vann du gricht vasht.”
5 Avvah vann unsah ungerechtichkeit Gott sei gerechtichkeit raus bringd, vass sella miah sawwa? Sella miah sawwa Gott is ungerecht veil eah sei zann uf uns bringd? (Ich shvetz vi mensha shvetza.)
6 Ich dayt nett denka! Vi annahshtah kann Gott di veld richta?
7 Ebbah mecht sawwa, “Vann mei falshheit Gott sei voahheit raus bringd un gebt eem hallichkeit, favass binn ich alsnoch am gricht vadda es en sindah?”
8 Un favass nett sawwa—vi samm leit gleshtaht henn un uns letz geblaymd henn fa ksawt havva—“Losset uns evil du so es goodes raus kumd difunn.” Iahra fadamnis is fadeend.
Nimmand Is Gerecht
9 Vass sawwa miah dann? Sinn miah bessah vi si? Goah nett! Fa miah henn difoah shund gvissa es di Yudda un di Greeyisha awl unnich sinda sinn.
10 Grawt vi’s kshrivva shtayt,“Es is nimmand gerecht, nay, nett aynah;
11 es is nimmand es fashtayt,un nimmand es Gott sucht.
12 Si henn awl vekk gedrayt,si sinn awl zammah, letz ganga;es is nimmand es goot dutt, nay, nett aynah.
13 Iahra hals is en grawb vo uf is;mitt iahra zunga doon si fafiahra;shlanga-gift is unnich iahra leftz.
14 Iahra meilah sinn foll fluches un biddahri vadda.
15 Iahra fees sinn kshvind fa bloot fageesa.
16 Hinnich eena in iahrem vayk lossa si shawda un aylend.
17 Un da vayk funn fridda vissa si nett.
18 Es is kenn furcht funn Gott fannich iahra awwa.”
19 Nau miah vissa es vass-evvah es es Ksetz sawkt, dess sawk’s zu selli vo unnich em Ksetz sinn. Dess is so es alli maul shtill gmacht vatt, un di gans veld shuldich vatt fannich Gott.
20 Fasell, kann nimmand gerecht gmacht sei fannich eem bei di sacha du im Ksetz. Fa deich’s Ksetz kumd di eisicht funn sinda.
Gerechtichkeit Deich Glawva
21 Avvah nau is di gerechtichkeit vo funn Gott kumd raus gebrocht vadda unni’s Ksetz, un’s Ksetz un di Brofayda gevva zeiknis zu demm.
22 Dess is di gerechtichkeit funn Gott deich da glawva an Jesus Christus vo kumd zu alli-ebbah un uf alli-ebbah es glawbt, fa’s is kenn unnahshitt.
23 Fa alli-ebbah hott ksindicht, un langd nett di hallichkeit funn Gott.
24 Avvah unni’s fadeena sinn si gerecht gmacht bei sei gnawt, deich di frei-shtelling vo kumd deich Christus Jesus.
25 Gott hott een foah-kshteld es en opfah fa sinda deich da glawva in sei bloot. Eah hott dess gedu fa sei gerechtichkeit veisa, veil eahshtah in sei geduld hott eah di sinda fa en zeit ivvah-gegukt.
26 Eah hott dess gedu fa sei gerechtichkeit veisa an deahra zeit, so es eah gerecht is, un macht aw selli gerecht vo an Jesus glawva.
27 Vass is dann veyyich unsahm gebraekk? Es is faddich gmacht. Deich vass fa Ksetz? Deich’s Ksetz funn di verka es miah doon? Nay, avvah deich’s Ksetz funn glawva.
28 So macha miah aus es da mensh gerecht vatt unni deich di verka vass miah doon fumm Ksetz, avvah yusht laynich deich da glawva.
29 Is Gott yusht da Gott funn di Yudda? Is eah nett aw da Gott funn di Heida? Yoh, eah is geviss aw da Gott funn di Heida,
30 siddah es es yusht ay Gott hott, un eah macht di beshniddana gerecht bei em glawva, un aw dee vo nett beshnidda sinn, deich da glawva.
31 Doon miah dann’s Ksetz nix veaht macha deich da glawva? Ich dayt moll nett denka! Miah gevva em Ksetz sei rechtah blatz.
