Galater 3:1-29
3 Diah unksheidi Galaddah! Veah hott eich fahext es diah di voahheit nett heichet? Fannich eiyah aykni awwa voah Jesus Christus fakindicht es gegreitzicht.
2 Ich vill dess ay ding ausfinna funn eich: Hend diah da Geisht grikt deich’s Ksetz ausfiahra, adda deich heahra im glawva?
3 Sind diah dann so unksheit? Diah hend ohkfanga im Geisht, vellet diah nau folkumma vadda deich’s flaysh?
4 Hend diah so feel sacha glidda fa nix—vann’s aw voah fa nix?
5 Deah vo eich da Geisht gebt un shaft vundahboahri sacha unnich eich, dutt eah dess veil diah’s Ksetz ausfiahret, adda deich heahra im glawva?
6 Grawt so hott da Abraham Gott geglawbt, un’s voah eem gevva es gerechtichkeit.
7 So kennet diah sayna, es sinn yusht selli vo glawva es kinnah sinn fumm Abraham.
8 Di Shrift hott fanna naus ksenna es Gott di Heida gerecht macha zayld deich da glawva. Fasell hott eah’s Effangaylium fakindicht zumm Abraham un hott ksawt, “In diah sella awl di Heida ksaykend vadda.”
9 So dann, selli vo glawvich sinn, sinn ksaykend mitt em Abraham, deah vo glawvich voah.
10 Awl selli vo sich falossa uf’s Ksetz ausdrawwa, sinn unnich em fluch fa’s is kshrivva, “Faflucht is alli mann es nett ohhald awl di sacha du vo kshrivva sinn im buch fumm Ksetz.”
11 Nau’s is playn es nimmand gerecht vatt fannich Gott deich’s Ksetz, fa “Da gerecht mann zayld layva beim glawva.”
12 Es Ksetz hott nix zu du mitt em glawva, avvah, “Da mensh es dee sacha ausdrawkt zayld layva bei si.”
13 Christus hott uns lohs gmacht fumm fluch fumm Ksetz bei en fluch vadda fa uns—fa’s is kshrivva, “Faflucht is alli-ebbah es uf en bohm henkt”—
14 so es da sayya fumm Abraham uf di Heida kumma soll deich Jesus Christus, un so es miah, deich da glawva, da Geisht greeya sella vo fashprocha voah.
Di Fashprechunga Zumm Abraham
15 Leevi breedah, ich vill nau shvetza in en menshlichah vayk: vann en mann en bund uf shreibt, un grikt’s kseind, kann nimmand may’s nunnah drayya adda ebbes ditzu shreiva.
16 Nau di fashprechinga voahra gevva zumm Abraham un sei nohch-kummashaft. Eah hott nett ksawt zumm Abraham, “Deich dei feel nohch-kummashaft, avvah deich aynah.” Sell maynd ay mensh, un sellah is Christus.
17 Vass ich mayn is dess: Es Ksetz, vo fiah hunnaht un dreisich yoah shpaydah kumma is, kann nett vekk du mitt em bund vo gmacht voah bei Gott, un nau nunnah drayya vass fashprocha voah.
18 Fa vann di eahbshaft deich’s Ksetz kumma dayt, no veah’s nimmi deich vass fashprocha voah, avvah Gott hott em Abraham’s gevva deich en fashpreching.
Favass Es Es Ksetz Gevva Voah
19 Favass voah dann’s Ksetz gevva? Es voah ditzu gedu veyyich sinda, biss sellah sohma kumma sett vass es fashprocha voah ditzu. Es Ksetz is ausgevva vadda bei engel deich di hand funn en middel-mann.
20 Nau en middel-mann is nett en middel-mann funn yusht ay dayl, avvah Gott is yusht aynah.
21 Is es Ksetz dann geyyich dess vass Gott fashprecht? Ich dayt moll nett denka! Fa vann en Ksetz gevva gvest veah es layva gevva hett kenna, dann veah gerechtichkeit voahhaftich gevva vadda deich’s Ksetz.
22 Avvah di Shrift sawkt es alli-ebbah is unnich di sind kshlossa, so es vass fashprocha voah deich Jesus Christus, gevva sei kann zu selli vo glawva.
23 Avvah eb da glawva kumma is, voahra miah unnich em Ksetz kohva un eikshlossa biss da glawva uns gvissa voah.
24 Sellah vayk voah’s Ksetz unsah shool-meshtah gvest fa uns zu Christus bringa, so es miah gerecht vadda mechta deich da glawva.
25 Avvah nau siddah es da glawva kumma is, sinn miah nimmi unnich em shool-meshtah.
26 Diah sind awl kinnah funn Gott deich da glawva an Christus Jesus.
27 Fa so feel funn eich es in Christus gedawft sinn, henn Christus ohgezowwa.
28 Es is nett en Yutt adda en Greeyishah, es is nett en gnecht adda en freiyah mann, es is nett en mann adda en fraw; fa diah sind awl ayns in Christus Jesus.
29 Un vann diah zu Christus heahret, dann sind diah em Abraham sei sohma un sind eahvah so vi’s fashprocha voah.
