Hiob 11:1-20
11 No hott da Zophar funn Naamah andvat gevva un hott ksawt,
2 “Sella awl dee vadda gay unni andvat?Muss ebbah es feel shvetzt, immah recht sei?
3 Sett awl dei kshvetz alli-ebbah shtill macha?Sett nimmand dich zanka vann du shpotsht?
4 Du sawksht dess vass du glawbsht es di voahheit is,un es du bisht unshuldich in Gott sei awwa.
5 Avvah ich vott Gott dayt shvetza,un dayt sei leftz uf macha geyyich dich,
6 un dayt diah di himlish veisheit veisa.Di voah veisheit hott may es ay seit,so fashtay dess, Gott hott even samm funn dei sinda fagessa.
7 Kansht du di deefa sacha funn Gott ausfinna?Kansht du ausfinna alles es zu vissa is veyyich em Awlmechticha?
8 So sacha sinn haychah es da himmel, vass kansht du du?Si sinn deefah es es grawb, vass kansht du vissa?
9 Si messa lengah es di eaht,un braydah es da say.
10 Vann eah kumd un dutt ebbah eishtekka,un dutt een no richta, veah kann een shtobba?
11 Eah vayst vann leit falsh sinn,un vann eah evil saynd, nemd eah nett acht difunn?
12 En leah-kebbichah mensh kann grawt so vennich shmeaht vadda,es en mensh geboahra sei kann zu en vildah aysel.
13 Vann du dei hatz recht setsht,un dei hend naus shtreksht zu eem,
14 vann du di sind in dei hand vekk dusht,un kenn evil alawbsht in dei tent,
15 no kansht du dei ksicht uf hayva unni shohm,un kansht shtandhaftich uf shtay unni dich feicha.
16 Du kansht dei druvvel fagessa,un’s yusht meinda es vi vassah es fabei gloffa is.
17 Dei layva zayld hellah sei es di mitt fumm dawk,un’s dunkla zayld sei es vi meiyets.
18 No vatt dei glawva shteik veil du hofning hosht,du guksht um dich rumm un zaylsht in fridda roowa.
19 Du layksht dich anna, un nimmand macht es du dich feichsht,un feel leit frohwa fa dei hilf.
20 Avvah di awwa funn di gottlohsa gukka unni’s fashtay,si kenna nett lohs glost sei;iahra letshti hofning is yusht fa iahra letshtah ohften shnaufa.”
