Hiob 16:1-22
16 No hott da Hiob ksawt,
2 “Ich habb so shtoft shund oft keaht;diah sind oahrichi drayshtah.
3 Zayla eiyah lang-vindichi vadda nee nett shtobba?Vass fayld eich es diah ohhaldet shvetza?
4 Ich kend aw shvetza vi diah doond,vann diah in mei blatz veahret.Ich kend vadda geyyich eich sawwa,un mei kobb shidla geyyich eich.
5 Avvah ich dayt eich greftich macha mitt mei maul,un da drohsht funn mei leftz dayt eich bessah feela macha.
6 Vann ich shvetz dann sinn mei shmatza nett vennichah,un vann ich zrikk hayb dann gayn si nett vekk.
7 Avvah nau hott Gott mich ausgvoahra,un mei gansi family zu nix gebrocht.
8 Eah hott mich gans runslich gmacht,un’s zeikt geyyich mich.Ich binn yusht may haut un gnocha,un dess shvetzt aw geyyich mich.
9 Eah hast mich un sei zann hott mich farissa;eah beist sei zay geyyich michun vatsht mich mitt baysi awwa.
10 Leit macha iahra maul uf un shvetza geyyich mich;si shlauwa mich uf da bakka;si gayn zammah fa geyyich mich shaffa.
11 Gott hott mich ivvah-gedrayt zu ungerechti mennah,un hott mich in di hend funn di gottlohsa kumma glost.
12 Es voah am goot gay mitt miah, avvah eah hott mich fabrocha;eah hott mich gnumma beim hals un mich fashiddeld;eah hott geyyich mich gezeeld.
13 Sei sheesah sinn gans um mich rumm,unni fashtand gayn sei arrows in mei niahra,un leahra mei gall aus uf da grund.
14 Ivvah un ivvah brecht eah deich mich vi deich en vand,un shpringd geyyich mich vi en greeks-mann.
15 Ich habb sakk-glaydah ivvah mei haut gnayt,un habb mei shtann in da shtawb gedu.
16 Mei ksicht is roht funn heila,un mei awwa sinn kshvulla un dunkel.
17 Avvah mei hend henn nimmand ebbes gedu,un mei gebayt is rein.
18 Oh eaht, dekk nett mei bloot zu,un loss mei roofes kenn roo-blatz finna.
19 Even nau is mei zeiknis im himmel,un deah vo shvetzt fa mich drovva in di hay.
20 Mei freind fashpodda mich;vi ich zu Gott roof, lawft’s awwa-vassah.
21 Oh vann yusht da mensh zu Gott roofa kend,vi en mann dutt zu sei nochbah.
22 Es zayla yusht vennich yoahra fabei gay,biss ich anna gay vo ich nimmi zrikk kumma kann.”
