Hiob 31:1-40
31 “Ich habb en bund gmacht mitt mei awwa,es ich nett an en yung maydel gukk mitt lusht.
2 So vass is em Gott funn ovva-heah sei dayl zu miah,adda mei eahbshaft fumm Awlmechticha drovva in di hay?
3 Kumma nett shlechti sacha uf di ungerechta,un fadauves uf selli es letz doon?
4 Dutt eah nett mei vayya sayna,un mei shritt zayla?
5 Vann ich in falshheit gloffa binn,adda mei foos fafiahres nohch ganga is,
6 dann loss Gott mich veeya uf en eahlichi vohk;no vayst eah es ich unshuldich binn.
7 Vann mei shritt fumm vayk gedrayt is,vann mei hatz mei awwa nohch ganga is,adda vann mei hend fadrekt vadda sinn,
8 dann loss mich sayya un ebbah shunsht’s frucht essa,un loss sell es vaxt fa mich aus di vatzel ufgrobt vadda.
9 Vann deich en veibsmensh mei hatz glusht hott,adda vann ich gvoaht habb an mei nochbah sei deah,
10 dann loss mei fraw mawla fa ebbah shunsht,un loss anri mennah shlohfa mitt iahra.
11 Fa sell veah en shand gvestun en sind es gricht sei muss.
12 Es veah vi en feiyah es alles fabrend,un dayt alles fadauva es ich habb.
13 Vann ich’s recht funn mei gnecht adda mawt fa’acht habb,vann si en glawk geyyich mich gebrocht henn,
14 dann vass kend ich du vann Gott fannich miah shtayt?Vass fa andvat gebb ich eem vann eah mich richt?
15 Hott nett sellah es mich gmacht hott in mei muddahs-leib, mei gnechta aw gmacht?Hott nett Gott uns awl gmacht im muddahs-leib?
16 Vann ich ennich ebbes zrikk kohva habb funn di oahma,un habb di awwa funn di vitt-veivah glost shvach vadda,
17 vann ich mei broht selvaht gessa habb,un nett aw samm gevva habb zumm kind unni eldra,
18 (fumm yungem uf habb ich een ufgezowwa vi sei daett,un ich habb immah acht gevva uf di vitt-veivah.)
19 Vann ich ennich ebbah ksenna habb am shtauva veil eah kenn glaydah katt hott,adda en mann ksenna habb in noht unni ebbes fa sich zu dekka,
20 un eah hott mich nett ksaykendfa een voahm macha mitt di vull funn mei shohf,
21 vann ich mei hand uf kohva habb geyyich selli unni eldra,diveil ich gvist habb es ich eena helfa kann am shtatt-doah,
22 dann loss ebbah mei oahm fabrecha,loss en aus em shuldah grissa sei.
23 Fa ich feich mich veyyich Gott sei shtrohf ivvah mich,un sei hallichkeit dayt mich halda funn so sach du.
24 Vann ich mei fadrauwa in gold gedu habb,un zu fei gold ksawt habb, ‘Du bisht mei drohsht,’
25 vann ich mich kfroit habb veil ich so reich binn,un veil ich so feel zammah ksammeld habb,
26 vann ich an di sunn gegukt habb es am sheina voah,adda da moon am gay in hallichkeit,
27 un mei hatz is no ivvah-gnumma mitt demm,un ich habb si geaht mitt en kuss funn mei hand,
28 dann veahra awl selli sinda nohtvendich gvest fa gricht sei,fa ich veah nett shtandhaftich gvest zu Gott drovva in di hay.
29 Habb ich mich kfroit vann’s shlecht ganga is mitt mei feind,adda voah ich froh vann eah druvvel grikt hott?
30 Nay, ich habb nee nett mei maul glost sindicha,bei vinsha es en fluch uf een kumd.
31 Henn di mennah funn mei haus-halding nett ksawt,‘Veah kann ebbah finna es sich nett ufkfild hott mitt sei flaysh?’
32 Kenn fremdah hott missa nachts draus in di shtrohs shlohfa,fa ich habb mei deah uf gmacht zu leit vekk funn haym.
33 Habb ich mei sinda zu gedekt vi mensha doon,un si fashtekkeld in mei hatz,
34 veil ich mich kfeicht habb veyyich di leit,un so en angsht katt habb funn iahra kshvetzah,es ich shtill voah un nett aus em haus ganga binn?
35 Oh, vann ich yusht ebbah hett fa mich abheicha!Gukket moll, do is mei nohma uf babiah, loss da Awlmechtich miah andvat gevva,loss sellah es mich pshuldicht’s uf babiah shreiva.
36 Ich dayt geviss dess uf mei shuldah veahra,ich dayt’s even uf mei kobb binna vi en krohn.
37 Ich dayt eem sawwa veyyich alli shritt es ich gnumma habb,un vi en roolah dayt ich nuff zu eem gay.
38 Dutt mei land geyyich mich rohda,un di blooks-feicha mitt-nannah heila;
39 habb ich’s frucht gessa unni’s betzawla,adda di gnechta glost fahungahra?
40 Vann ich habb, dann loss di danna uf kumma im blatz funn vaytza,un’s veetz im blatz funn geahsht.”
Di vadda fumm Hiob shtobba do.
