Jeremia 11:1-23
11 Dess is es vatt es zumm Jeremia kumma is fumm HAH; es sawkt:
2 “Heich di vadda ab funn demm bund un sawk si zu di leit funn Juda un zu awl selli es in Jerusalem voona.
3 Sawk eena, dess is vass da HAH, da Gott funn Israel, sawkt: ‘Faflucht is sellah es nett dutt vi di vadda funn demm bund sawwa,
4 di vadda es ich gebodda habb zu eiyah foah-feddah vo ich si aus Egypta gebrocht habb, aus em eisa-shmelsich offa.’ Ich habb ksawt, ‘Heichet mei shtimm ab un doond alles es ich eich gebodda habb. No zaylet diah mei leit sei un ich zayl eiyah Gott sei.
5 No zayl ich di vadda halda es ich kshvoahra habb zu eiyah foah-feddah fa eena en land gevva es millich un hunnich drinn lawft,’ so vi’s is heit.” No habb ich, da Jeremia, ksawt, “Yau, HAH, loss es so sei.”
6 Un da HAH hott ksawt zu miah, “Breddich awl dee vadda in di shtett funn Juda un in di shtrohsa funn Jerusalem: Heichet di vadda ab funn demm bund un doond si.
7 Funn di zeit es ich eiyah foah-feddah ruff aus Egypta-Land gebrocht habb biss heit, habb ich si ivvah un ivvah gvand, un ksawt, ‘Diah misset mei shtimm abheicha.’
8 Avvah si henn miah nett keicht un mich nett acht katt, avvah yaydahs funn eena is sei ayknah vayk ganga un is sei evil un fashtokt hatz nohch gloffa. Fasell habb ich awl di flucha in demm bund uf si gebrocht, selli vadda es ich si gebodda habb fa du avvah si henn si nett gedu.”
9 No hott da HAH ksawt zu miah, “Di leit funn Juda un Jerusalem henn ausgmacht unnich nannah fa geyyich mich shaffa.
10 Si sinn zrikk gedrayt zu di sinda funn iahra foah-feddah, selli es es nett gedu henn fa mei vadda abheicha. Si sinn anri gettah nohch ganga un henn si gedeend. Es haus funn Israel un’s haus funn Juda henn awl zvay’s bund gebrocha es ich gmacht habb mitt iahra foah-feddah.
11 Fasell sawkt da HAH dess, ‘Gukk moll, ich zayl evil uf si kumma lossa es si nett vekk kenna difunn. Even vann si roofa zu miah, zayl ich si nett abheicha.
12 Di shtett funn Juda un di leit funn Jerusalem zayla gay un iahra gettah ohroofa, dee es si opfahra bringa ditzu, avvah si kenna eena nett helfa in iahra zeit funn druvvel.
13 Du hosht so feel gettah es du shtett hosht, oh Juda, un di awldahra es du ufksetzt hosht fa opfahra zu sellem shandlicha abgott Baal sinn so feel es di shtrohsa in Jerusalem.’
14 Fasell, du nett bayda fa dee leit, Jeremia, un du mich nett bidda fa si, veil ich si nett ohheicha zayl vann si mich ohroofa in di zeit funn iahra druvvel.”
15 Da HAH sawkt,
“Di leit es ich leeb habb doon evili sacha,vass fa recht henn si in meim haus?Kann’s heilich opfah-flaysh eiyah shtrohf vekk nemma?Diah haldet oh ungettlichi sacha du,seddet diah no eich froiya?”
16 Da HAH hott dich als en greenah ayl-bohm kaysa,mitt shay un goot frucht.Avvah mitt di yacht funn en mechtichah shtoahm,shtekt eah een oh mitt feiyah,un sei nesht vadda fadauva.
17 Da Awlmechtich HAH es dich geblanst hott, hott evil auskshprocha geyyich dich, veil’s haus funn Israel un’s haus funn Juda evil gedu henn, un mich fazand henn bei opfahra macha zumm abgott Baal.
Em Jeremia Sei Layva In Di Kfoah
18 Da HAH hott mich vissa glost veyyich iahra shkeem un ich habb’s no gvist, veil eah miah gvissa hott vass si am du sinn.
19 Ich voah vi en daymeedich lamm es sich vekk fiahra glost hott fa kshlacht sei. Ich habb nett gvist es si en shkeem ufksetzt henn geyyich mich, un henn ksawt,
“Vella da bohm un sei frucht fadauva,vella een abhakka fumm levendicha land,so es nimmand may an sei nohma denkt.”
20 No habb ich gebayda,“Oh Awlmechtichah HAH, du gerechtah richtah,du broviahsht’s hatz un di gedanka;ich habb mei sacha ivvah-gedrayt zu diah,loss mich sayna vi du auseebsht ivvah si.”
21 So, dess is vass da HAH sawkt veyyich di mennah funn Anathoth es mei layva nemma vella un sawwa, “Du nett broffetzeiya im HAH sei nohma adda du vasht doht gmacht bei unsah hend.”
22 Fasell sawkt da Awlmechtich HAH, “Ich zayl si shtrohfa. Iahra yungi mennah vadda doht gmacht mitt em shvatt un iahra boova un mayt bei hungahs-noht.
23 Es zayld kens funn eena ivvahrich sei, veil ich en shreklich fadauves uf di leit funn Anathoth bringa zayl im yoah funn iahra shtrohf.”