Jeremia 19:1-15
19 Dess is vass da HAH sawkt: “Gay un kawf en eahdichah tsheah fumm heffa-machah. Nemm edlichi eldishti funn di leit un funn di preeshtah,
2 un gay naus deich’s doah es Fabrochani-Heffa hayst an’s Deich funn Ben-Hinnom. Datt breddich di vadda es ich diah sawk,
3 un sawk, ‘Heichet’s vatt fumm HAH ab, diah kaynicha funn Juda un diah leit funn Jerusalem. Dess is vass da Awlmechtich HAH, da Gott funn Israel, sawkt: Heichet moll, ich zayl en shreklich fadauves uf deah blatz bringa, so shlimm es di oahra funn alli-ebbah es heaht difunn rabla zayla.
4 Di leit do henn mich falossa un henn deah blatz en blatz funn fremdi gettah gmacht. Si henn opfahra gopfaht zu gettah es si, iahra feddah un di kaynicha funn Juda nee nett gekend henn, un si henn deah blatz ufkfild mitt unshuldich bloot.
5 Si henn awldahra zumm Baal gebaut in di hohcha-bletz so es si iahra kinnah opfahra kenna im feiya zumm abgott Baal. Dess is ebbes es ich si nett gebodda habb adda ksawt habb, un’s is miah nett even in di sinn kumma.
6 So gevvet acht, di dawwa sinn am kumma, sawkt da HAH, vann di leit deah blatz nimmi Thopheth adda’s Deich funn Ben-Hinnom haysa zayla avvah’s Deich funn Shlawdah.
7 In demm blatz zayl ich Juda un Jerusalem shtobba funn di sacha du es si ausrichta vella, un mach si falla unnich em shvatt fannich iahra feinda un bei di hend funn selli es iahra layva vekk nemma vella. Ich gebb iahra dohdi leivah fa ess-sach zu di fekkel funn di luft un di diahra uf di eaht.
8 Ich reis dee shtatt zammah nunnah un mach si en blatz funn shpott; alli-ebbah es fabei gayt is fashtaund un fashpott si veil si so fadauva is.
9 Ich mach si’s flaysh funn iahra kinnah essa, un si zayla aw nannah iahra flaysh essa vann si moll eikshpatt vadda in iahra shtett bei iahra feinda es si doht macha vella.’
10 No solsht du da eahdich tsheah fabrecha fannich di mennah es mitt diah gayn,
11 un du solsht sawwa zu eena, ‘Dess is vass da Awlmechtich HAH sawkt: Ich zayl dee leit un dee shtatt fabrecha grawt vi deah eahdich tsheah fabrocha is un nimmi zammah gedu sei kann. Si zayla di dohda fagrawva in Thopheth biss kenn blatz may datt is.
12 Dess is vass ich du zayl zu demm blatz un zu di leit es do voona, sawkt da HAH. Ich mach dee shtatt vi Thopheth.
13 Awl di heisah funn Jerusalem un di kaynich-heisah funn Juda zayla unrein gmacht sei vi da blatz funn Thopheth, veil si opfahra gopfaht henn zu di shtanna uf iahra dechah un drink-opfahra gopfaht henn zu anri gettah.’”
14 Da Jeremia is no zrikk ganga funn Thopheth, vo da HAH een anna kshikt katt hott fa broffetzeiya. Eah is ganga un hott sich in da foah-hohf fumm tempel kshteld, un hott ksawt zu awl di leit,
15 “Dess is vass da Awlmechtich HAH, da Gott funn Israel, sawkt: ‘Heichet moll, ich zayl uf dee shtatt un awl di shtetlen drumm rumm, awl di heslichi sacha kumma lossa es ich fashprocha habb geyyich si, veil si sich kshteibaht henn un’s nett gedu henn fa mei vadda abheicha.’”