Jeremia 26:1-24
26 Glei noch demm es da Joiakim, em Josia sei boo, kaynich vadda is funn Juda, is dess vatt fumm HAH zu miah kumma:
2 “Dess is vass da HAH sawkt: Shtay im foah-hohf fumm HAH sei haus un shvetz zu awl di shtett funn Juda es kumma fa Gott deena im HAH sei haus. Sawk eena alles es ich dich gebodda habb. Fafayl nett ay vatt!
3 Fleicht heicha si ab un yaydahs funn eena drayt funn sei evilah vayk. No brauch ich dess fadauves nett uf si bringa es ich im sinn katt habb fa di evila sacha es si gedu henn.
4 Sawk eena, ‘Dess is vass da HAH sawkt: Vann diah mich nett abheichet un mei ksetz haldet es ich fannich eich gedu habb,
5 un vann diah di vadda nett abheichet funn mei gnechta di brofayda es ich ivvah un ivvah zu eich kshikt habb un diah hend nett keicht,
6 dann mach ich dess haus vi Silo, un dee shtatt vatt en fluch-vatt unnich awl di heida uf di eaht.’”
7 Di preeshtah, di brofayda un awl di leit henn da Jeremia keaht selli vadda sawwa im HAH sei haus.
8 Avvah vo da Jeremia faddich voah awl di leit sawwa alles es da HAH een gebodda katt hott fa sawwa, henn di preeshtah, di brofayda un awl di leit een fesht gnumma un henn ksawt, “Du musht doht gmacht sei!
9 Favass hosht du gebroffetzeit im HAH sei nohma es dess haus sei zayld vi Silo, un dee shtatt leah sei zayld un nimmand drinn voona zayld?” No sinn awl di leit zammah geyyich da Jeremia kumma im HAH sei haus.
10 Vo di evvahshti funn Juda dee sacha keaht henn, sinn si aus em kaynich-haus nuff am HAH sei haus ganga. No henn si iahra bletz gnumma am Neiya Doah zumm HAH sei haus.
11 Di preeshtah un brofayda henn no ksawt zu di evvahshti un awl di leit, “Deah mann sett doht gmacht sei veil eah geyyich dee shtatt gebroffetzeit hott. Diah hend’s keaht mitt eiyah aykni oahra!”
12 No hott da Jeremia ksawt zu di evvahshti un awl di leit: “Da HAH hott mich kshikt fa awl di sacha broffetzeiya geyyich dess haus un dee shtatt es diah keaht henn.
13 So fabessahret eiyah vayya un vass diah doond, un heichet em HAH eiyah Gott. No dutt da HAH dess fadauves nett uf eich bringa es eah geyyich eich gedroit hott.
14 Avvah veyyich miah, ich binn in eiyah hend; doond mitt miah vass eich goot un recht dinkt.
15 Avvah seind shuah funn demm, vann diah mich doht machet, dann sind diah am unshuldich bloot uf eich selvaht un uf dee shtatt bringa. Un dess gayt aw fa selli es in di shtatt voona, veil da HAH mich kshikt hott fa awl dee vadda sawwa es diah awl si heahra kennet.”
16 No henn di evvahshti un awl di leit ksawt zu di preeshtah un brofayda, “Deah mann sett nett doht gmacht sei. Eah hott kshvetzt zu uns im nohma fumm HAH unsah Gott.”
17 Dayl funn di eldishti fumm land sinn no ufkshtanna un henn zu di gans fasamling funn di leit ksawt,
18 “Vo da Hiskia da kaynich funn Juda voah hott da Micha funn Moresheth gebroffetzeit. Eah hott awl di leit funn Juda ksawt, ‘Dess is vass da Awlmechtich HAH sawkt:
Zion zayld geblookt sei vi en feld,Jerusalem vatt vi en shtay haufa,un da tempel hivvel vatt ivvah-gvaxa mitt baym.’
19 Hott da Hiskia, da kaynich funn Juda, adda ennich ebbah shunsht in Juda da Mica doht gmacht? Hott nett da Hiskia sich kfeicht un hott da HAH ohgebayda? Un hott nett da HAH eigevva so es eah nett’s fadauves ausgedrawwa hott es eah auskshprocha katt hott uf si? Miah do sinn am uns rishta fa en shreklichi sach uf uns selvaht bringa!”
20 (Nau’s voah en anra mann es gebroffetzeit hott im HAH sei nohma. Sei nohma voah Uriah, em Semaia sei boo funn Kiriath-Jearim. Eah hott di sayma sacha gebroffetzeit geyyich dee shtatt un dess land es da Jeremia hott.
21 Vo da Kaynich Joiakim, sei gnechta un di evvahshti sei vadda keaht henn, hott da kaynich vella een doht macha. Avvah da Uriah hott keaht difunn. Eah hott sich kfeicht un is noch Egypta ganga.
22 Avvah da Kaynich Joiakim hott da Elnathan, em Achbor sei boo, un edlichi anri mennah zu Egypta kshikt.
23 Si henn da Uriah aus Egypta gebrocht un henn een zumm Kaynich Joiakim gnumma. Eah hott een doht gmacht mitt em shvatt un hott een in en grawb kshmissa vo di oahma fagrawva vadda.)
24 Avvah veil da Ahikam, em Saphan sei boo, ufkshtanna hott fa da Jeremia, dann henn si een nett ivvah-gedrayt zu di leit fa doht gmacht sei.