Jeremia 36:1-32
36 Im fiahda yoah es da Joiakim, em Josia sei boo, da kaynich funn Juda voah, is dess vatt fumm HAH zumm Jeremia kumma:
2 “Nemm en buch un shreib awl di vadda nei es ich ksawt habb veyyich Israel, Juda un awl di anra lendah, siddah es ich ohkfanga habb shvetza zu diah an di zeit fumm Josia biss nau.
3 Fleicht vann di leit funn Juda heahra veyyich awl di shreklicha sacha es ich uf si bringa zayl, dann drayt yaydahs funn eena vekk funn sei ungettlichah vayk; no fagebb ich iahra ungettlichkeit un iahra sinda.”
4 No hott da Jeremia da Baruch, em Neria sei boo, groofa, un diveil es da Jeremia di vadda ksawt hott es da HAH eem gevva katt hott, hott da Baruch si in’s buch kshrivva.
5 No hott da Jeremia ksawt zumm Baruch, “Ich binn do eikshpatt; ich kann nett im HAH sei haus gay.
6 So uf en fasht-dawk gay du un lays di vadda fumm HAH zu di leit fumm buch es du kshrivva hosht diveil es ich si foahksawt habb. Lays si zu awl di leit funn Juda es bei kumma funn iahra shtett.
7 Fleicht bringa si iahra gebaydah fannich da HAH un yaydahs drayt funn sei ungettlichi vayya, fa em HAH sei gleet un zann es eah auskshprocha hott geyyich dee leit is grohs.”
8 Da Baruch, em Neria sei boo, hott alles gedu es da brofayt Jeremia een gebodda hott fa du; eah hott di vadda fumm HAH aus em buch glaysa im HAH sei haus.
9 Im neinda moonet fumm fimfda yoah es em Josia sei boo da Joiakim kaynich funn Juda voah, voah en zeit ausgevva fa fashta fannich em HAH. Dess voah ausgevva fa awl di leit in Jerusalem un awl selli es bei kumma sinn funn di shtett in Juda.
10 No, diveil es awl di leit am abheicha voahra, hott da Baruch di vadda fumm Jeremia glaysa. Eah hott dess gedu im HAH sei haus funn di shtubb es zumm Gemaria, em Saphan sei boo, keaht hott. Da Saphan voah en evvahshtah shreivah. Em Gamaria sei shtubb voah im evvahshta foah-hohf beim Neiya Doah im HAH sei haus.
11 Vo da Michaia, em Gemaria sei boo es em Saphan sei boo voah, dee vadda fumm HAH keaht hott aus em buch,
12 is eah nunnah im shreivah sei shtubb ganga im kaynich-haus. Datt voahra awl dee evvahshti am hokka: da Elisama da shreivah, da Delaia em Semaia sei boo, da Elnathan em Achbor sei boo, da Gemaria em Saphan sei boo, un da Zedekia em Hanania sei boo mitt awl di anra evvahshti.
13 Vo da Michaia eena alles ksawt katt hott es eah da Baruch keaht hott laysa fumm buch zu di leit,
14 henn awl di evvahshti da Judi zumm Baruch kshikt. (Da Judi voah em Nethania sei boo, un eah voah em Selemia sei boo, un eah voah em Chusi sei boo.) Si henn em Judi ksawt fa em Baruch sawwa, “Bring’s buch es du raus glaysa hosht difunn zu di leit un kumm.” So is da Baruch, em Neria sei boo, zu eena ganga mitt em buch in sei hand.
15 Si henn ksawt zu eem, “Hokk dich anna un lays es zu uns.” So hott da Baruch’s buch glaysa zu eena.
16 Vo si awl di vadda keaht henn, henn si nannah ohgegukt un henn sich kfeicht. Si henn ksawt zumm Baruch, “Miah missa awl dee vadda zumm kaynich nemma.”
17 No henn si da Baruch kfrohkt, “Sawk uns, vi is es zu ganga es du awl dee vadda kshrivva hosht? Hott da Jeremia si foahksawt zu diah?”
18 Da Baruch hott ksawt, “Yau, eah hott awl dee vadda foahksawt zu miah un ich habb si in’s buch kshrivva mitt dinda.”
19 No henn di evvahshti ksawt zumm Baruch, “Gay du un da Jeremia un fashteklet eich. Losset nimmand vissa vo diah sind.”
Es Buch Vatt Fabrend
20 Noch demm es si’s buch im shreivah Elisama sei shtubb gedu katt henn, sinn si zumm kaynich ganga im foah-hohf un henn eem alles fazayld.
21 Da kaynich hott no da Judi kshikt fa’s buch hohla. Da Judi hott’s fumm shreivah Elisama sei shtubb gebrocht, un hott’s glaysa zumm kaynich diveil es awl di evvahshti nayvich eem kshtanna henn.
22 Es voah da neind moonet un da kaynich voah am in sei vindah shtubb hokka mitt en feiyah am brenna in en feiyah-kessel fannich eem.
23 Vann da Judi als zvay adda drei bleddah glaysa katt hott, hott da kaynich si abkshnidda mitt en glay messah un hott si in’s feiyah kshmissa im feiyah-kessel biss es gans buch ufgebrend voah im feiyah.
24 Da kaynich un awl sei evvahshti es awl dee vadda keaht henn, henn sich nett kfeicht adda iahra glaydah farissa.
25 Da Elnathan, da Delaia un da Gemaria henn broviaht da kaynich halda funn’s buch fabrenna, avvah eah hott si nett abkeicht.
26 In blatz funn sellem hott da kaynich en gebott gevva zu seim boo da Jerahmeel, zumm Seraia, em Asriel sei boo un zumm Selemia, em Abdeel sei boo fa da Baruch da shreivah un da Jeremia da brofayt fesht nemma. Avvah da HAH hott si fashtekkeld.
Es Buch Vatt Ivvah Kshrivva
27 Noch demm es da kaynich’s buch fabrend hott mitt di vadda es da Baruch kshrivva hott vi da Jeremia si ksawt hott, is dess vatt fumm HAH zumm Jeremia kumma:
28 “Nemm noch en buch un shreib awl di vadda nei es im eahshta buch voahra, sell es da Joiakim, da kaynich funn Juda, fabrend hott.
29 Un sawk dess zumm Joiakim, da kaynich funn Juda, ‘Dess is vass da HAH sawkt: Du hosht’s buch fabrend un hosht ksawt, “Favass hosht du in’s buch kshrivva es da kaynich funn Babylon kumma zayld un dess land fadauva so es kenn mensha adda fee may drinn sinn?”
30 So fasell sawkt da HAH dess veyyich em Kaynich Joiakim funn Juda: Kens funn sei nohch-kummashaft zayld uf em kaynich-shtool fumm Dawfit hokka, sei leib zayld naus kshmissa vadda in di hitz deich da dawk un da frosht deich di nacht.
31 Ich zayl een, sei nohch-kummashaft un sei gnechta shtrohfa fa iahra ungettlichkeit. Ich zayl awl’s shreklich fadauves uf si kumma lossa es ich auskshprocha habb geyyich si, veil si miah nett keicht henn. Dess kumd uf si, uf di leit es in Jerusalem voona un uf di leit funn Juda.’”
32 So hott da Jeremia noch en buch gnumma un hott’s zumm shreivah Baruch, em Neria sei boo, gevva. No vi da Jeremia kshvetzt hott, hott da Baruch awl di vadda in’s buch kshrivva es da Joiakim, da kaynich funn Juda, fabrend katt hott. Un’s voahra feel gleichlichi vadda ditzu gedu es da Jeremia eem gevva hott.