Jesoiya 27:1-13
27 In sellem dawkzayld da HAH da Leviathan shtrohfa mitt sei shvatt,mitt sei shreklichi, grohsi un shteiki shvatt.Eah shtrohft da Leviathan, selli grumm un shlichtich shlang,un macht sell dracha-diah im say doht.
Em HAH Sei Vei-Goahra, Israel
2 In sellem dawk,“Sing en leet veyyich en blesiahlichah vei-goahra.
3 Ich, da HAH, gebb acht druff,ich vessah een di gans zeit.Ich heet een dawk un nacht,so es nimmand ebbes dutt zu eem.
4 Ich binn nimmi bays,avvah vann ich danna un hekka finna dayt in mei vei-goahra,no dayt ich geyyich si gay un’s dayt greek gevva,un ich dayt si alles fabrenna.
5 Vann di feinda funn mei vei-goahrahavva vella es ich si heeda du,dann loss si fridda macha mitt miah,yau, loss si fridda macha mitt miah.”
Shtrohfa Un Fagevva
6 In di dawwa am kumma zayld da Jakob eivatzla,Israel zayld bleeya un gree vadda,un zayld di gans veld filla mitt frucht.
7 Hott da HAH Israel so hatt kshlauwa es selli vo Israel kshlauwa henn?Voah Israel doht gmacht vi selli es Israel doht gmacht henn?
8 Du hosht Israel kshtrohft bei see vekk funn haym shikka,du hosht see vekk gnumma mitt en heslichah vind,vi uf en dawk vann da hays east vind blohst.
9 Dess is dann vi em Jakob sei sind fagevva vatt,un dess zayld di frucht difunn sei, es sei sinda vekk gnumma voahra:Vann eah moll di awldah-shtay macht viufgmawlani kallich-shtay,un kenn Ashera-poshta un insens awldahramay datt shtayn.
10 Di fashteikt shtatt shtayt laynich,di leit sinn fatt un see is falossa vi di vildahnis;di kelvah vayda datt; si layya sich anna,un fressa di bleddah funn di nesht.
11 Vann di nesht drukka sinn brecha si ab,un di veibsleit kumma un macha feiyah mitt’na.Fa dess is en leit es sacha nett fashtayn,so zayld sellah es si gmacht hott kenn bamhatzichkeit havva,un sellah es si kshaffa hott zayld nett gnaydich sei zu eena.
12 In sellem dawk zayld da HAH frucht dresha fumm Euphrates Revvah biss an di Grikk funn Egypta, un diah, Kinnah-Israel, vaddet zammah ksammeld ayns bei ayns.
13 In sellem dawk zayld en grohs blohs-hann blohsa. Un selli es am shtauva voahra im land Assyria un selli in Egypta es ausgedrivva voahra, zayla kumma un da HAH deena uf em heilicha berg an Jerusalem.
