Jesoiya 45:1-25
45 “Dess is vass da HAH sawkt zumm Cyrus, sei ksalbdah,deah es ich gnumma habb bei sei rechtsi hand,so es eah di heida-lendah ivvah-nemd fannich eem,un di kaynicha iahra greeks-ksha nemd funn eena,so es di deahra uf sinn fannich eem,un di doahra nett zu sinn:
2 Ich zayl fannich diah heah gay,un di berga ayva macha.Ich fabrech di bronze doahra,un shneit di eisicha rikkel deich.
3 Ich gebb diah keshtlichi sacha fumm dunkla,keshtlichi sacha in fashtekkeldi bletz,so es du vaysht es ich da HAH binn,da Gott funn Israel, deah es dichgroofa hott bei deim nohma.
4 Fa di sayk fumm Jakob mei gnecht,un Israel es ich raus glaysa habb,dann roof ich dich bei deim nohma,un gebb diah en nohma mitt grohsi eah.Ich du dess even vann du mich nett kensht.
5 Ich binn da HAH, un’s is kenn anrah,es hott kenn Gott unni yusht mich;ich gebb diah graft,even vann du mich nett kensht,
6 so es leit vissa kenna, fumm blatz es di sunn ufkumd,biss vo see unnah gayt,es es kenn anrah hott vi yusht mich.Ich binn da HAH, un’s hott kenn anrah.
7 Ich mach di helling un aw’s dunkla,ich mach fridda un aw druvvel.Ich, da HAH, du awl dee sacha.
8 Diah himla funn ovva-heah, reyyahret gerechtichkeit,losset di volka’s runnah reyyahra.Loss di eaht sich uf macha,un loss saylichkeit uf kumma,un gerechtichkeit mitt vaxa.Ich, da HAH, habb dess kshaffa.”
Gott Is Awlmechtich
9 “Vay zu sellah es zatt mitt seim Ksheftah,sellah es yusht en eahdich ksha isunnich di anra ksharra uf em bodda.Dutt da clay sawwa zumm heffa-machah,‘Vass bisht du am macha?’adda, sell vass am gmacht vadda is,‘Eah hott kenn hend’?
10 Vay zu sellah es sawkt zu seim daett,‘Favass hosht du mich gmacht?’adda zu sei maemm,‘Favass hosht du mich geboahra?’
11 Dess is vass da HAH sawkt,deah es heilich is un es Israel gmacht hott:Veyyich di sacha es noch am kumma sinn,doond diah mich frohwa veyyich mei kinnah,adda miah sawwa vass zu du mitt mei hend?
12 ’Sis mich es di eaht gmacht hott,un ich habb di leit kshaffa es drinn sinn.Mei aykni hend henn di himla auskshtrekt,un ich hayb di shtanna im blatz.
13 Ich habb een (da Cyrus) uf gvekt fa mei gerechtichkeit veisa;ich mach awl sei vayya ayva.Eah zayld mei shtatt bauwa,un mei kfangani frei macha,avvah eah grikt nix un vatt nett betzawld difoah;”so sawkt da Awlmechtich HAH.
14 Dess is vass da HAH sawkt:“Di sacha funn di Egyptah un di Kushiddah,un di grohsa leit funn Seba,zayla zu diah kumma un zayla dei sei.Si zayla diah nohch kummaun zayla in kedda sei.Si zayla sich nunnah bikka zu diah,un dich bidda un sawwa,‘Gott laynich is mitt diah,un’s hott kenn anrah gott.’”
15 Du bisht geviss en Gott es sich fashtekkeld,du, da Gott un Heiland funn Israel.
16 Awl di abgettah-machah zayla sich shemma,si zayla awl zammah fashohmd vadda.
17 Avvah Israel zayld frei gmacht sei beim HAH,dess zayld en ayvichi frei-shtelling sei.Du zaylsht nee nimmi fashohmdadda gedaymeedicht vadda deich di gans ayvichkeit.
18 Dess is vass da HAH sawkt,deah es di himla kshaffa hott,eah is da Gott es di eaht kshaybt un gmacht hott,un es see gegrund hott.Eah hott see nett gmacht fa leah sei,avvah so es leit drinn sei sella.Eah sawkt,“Ich binn da HAH, un’s hott kenn anrah.
19 Ich habb nett hinna rumm kshvetzt,funn eiyets es es dunkel is;ich habb nett ksawt zumm Jakob sei nohch-kummashaft,‘Suchet mich vo nix is.’Ich binn da HAH un sawk di voahheit;ich sawk vass recht is.
20 Fasamlet eich zammah un kummet,kummet zammah diah es ivvahrich sind funn di heida.Selli es holsichi abgettah rumm drawwa vissa nix;si bayda zu en gott es nett helfa kann.
21 Kummet zammah un machet ausvass diah foah bringa vellet.Veah hott dess foahksawt lang zrikk,un veah hott dess fakindicht an selli zeit?Voah’s nett mich, da HAH?Es hott kenn Gott unni mich,en gerechtah Gott un Heiland;es hott kennah unni mich.
22 Drayyet zu miah un vaddet saylichawl diah biss an’s end funn di eaht,fa ich binn Gott, un’s hott kenn anrah.
23 Ich habb kshvoahra bei miah selvaht;’s vatt funn gerechtichkeit is aus meim maul ganga,un dess zayld nett zrikk gedrayt sei.Fannich miah zayld alli gnee sich beeya,un alli zung zayld shveahra.
24 Si zayla sawwa veyyich miah,‘Yusht im HAH laynich is gerechtichkeit un macht.’”Awl selli es bays voahra geyyich een,zayla zu eem kumma un sich shemma.
25 Avvah awl di nohch-kummashaft funn Israel,zayld gerecht kfunna sei im HAH,un zayld sich froiya.
