Maleachi 1:1-14
1 Es vatt fumm HAH zu Israel deich da Maleachi.
Gott Sei Leevi Fa Da Jakob
2 “Ich habb eich leeb,” sawkt da HAH. “Avvah diah frohwet, ‘Vi kenna miah sayna es du uns leeb hosht?’ Voah nett da Jakob em Esau sei broodah?” sawkt da HAH. “Doch habb ich da Jakob leeb katt,
3 avvah da Esau habb ich kast, un habb sei berga zu veesht-land gedrayt un sei eahbshaft ivvah-gevva zu di vilda hund.”
4 Edom sawkt fleicht, “Miah sinn nunnah kshlauwa, avvah miah zayla sacha viddah ufbauwa.” Avvah dess is vass da Awlmechtich HAH sawkt: “Si kenna viddah bauwa, avvah ich reis es viddah nunnah. Leit zayla si’s ‘Ungettlich Land’ haysa, en leit es da HAH ayvichlich zannich is mitt.
5 Eiyah awwa zayla dess sayna, un diah zaylet sawwa, ‘Da HAH is mechtich, even draus in lendah es nett zu Israel heahra!’”
Shlechti Opfahra
6 “En sohn gebt seim faddah eah, un en gnecht eaht sei meishtah. Vann ich en faddah binn, dann vo is mei eah? Vann ich en meishtah binn, veah feicht sich veyyich miah?” sawkt da Awlmechtich HAH. “Es is eich, diah preeshtah, es mei nohma fa’achta. Avvah diah sawwet, ‘Vi henn miah dei nohma fa’acht?’
7 Diah doond unrein ess-sach uf mei awldah. Avvah diah frohwet, ‘Vi henn miah dich fa’acht?’ Veil diah sawwet es em HAH sei dish nix maynd.
8 Is es nett letz vann diah blindi, gegribbeldi un granki diahra opfahret? Bringet si moll zu selli es ovvich eich sinn! Veahra si froh mitt eich? Dayda si eich gnaydich ohsayna?” sawkt da Awlmechtich HAH.
9 “Nau frohwet moll da HAH fa gnaydich sei zu uns. Mitt so unreini opfahra funn eiyah hend, zayld eah gnaydich sei zu eich?” sawkt da Awlmechtich HAH.
10 “Oh, ich vott ayns funn eich dayt di tempel doahra zu macha, so es diah nett feiyah uf mei awldah du daydet fa nix! Diah sind miah nett kfellich,” sawkt da Awlmechtich HAH, “un ich nemm kenn opfah funn eich.
11 Mei nohma is hallich unnich di heida, fumm blatz vo di sunn ufkumd biss vo see nunnah gayt. Ivvahrawlich vadda insens un reini opfahra gopfaht zu meim nohma, veil mei nohma hallich sei zayld unnich di heida,” sawkt da Awlmechtich HAH.
12 “Avvah diah fashandet mei nohma veil diah sawwet mei dish is unheilich, un’s ess-sach druff maynd nix.
13 Diah sawwet, ‘Miah sinn dess laydich’ un drayyet eiyah naws nuff geyyich mich,” sawkt da Awlmechtich HAH. “Diah bringet en kshtohla diah adda ayns es grank un lohm is fa en opfah. Sett ich dess ohnemma funn eiyah hend?” frohkt da HAH.
14 “Faflucht is sellah uneahlich mensh es en goodah shohf-bokk in sei drubb hott es eah fashprocha hott, un gayt no un opfaht aynah zumm HAH es en faylah hott. Fa ich binn en grohsah kaynich,” sawkt da Awlmechtich HAH, “un mei nohma bringd furcht unnich di heida.”