Markus 4:1-41
4 No hott Jesus viddah ohkfanga si lanna nayvich em say. Un’s henn so feel leit sich fasammeld datt es eah in en boat ganga is un hott datt nei kokt uf em say. Un awl di leit voahra nayvich em say uf em land.
2 Un eah hott si feel sacha gland mitt gleichnisa, un in seinra breddich hott eah ksawt zu eena,
3 “Heichet moll! Aynah es sohma sayt is naus ganga fa sayya.
4 Un vi eah ksayt hott is samm sohma am vayk nohch kfalla; no sinn di fekkel kumma un henn’s ufkfressa.
5 Anrah sohma is uf shtaynichi bletz kfalla vo nett feel grund voah, un deah is kshvind uf kumma veil ah kenn deefah grund katt hott.
6 Avvah no is di sunn uf kumma un hott’s favelkt, un veil’s nett feel vatzla katt hott is es fadatt.
7 Anra sohma is unnich di danna kfalla un di danna sinn ufgvaxa un henn’s fashtikt, un no hott’s kenn frucht gevva.
8 Anra sohma is uf goodah bodda kfalla un is uf kumma, is gvaxa un hott frucht grikt. Samm hott dreisich mohl so feel gevva, samm sechtzich, un samm en hunnaht mohl so feel.”
9 Un Jesus hott ksawt, “Deah vo oahra hott, loss een heahra.”
10 No vo eah laynich voah mitt selli vo bei eem voahra, un aw di zvelfa, henn si een kfrohkt veyyich dee gleichnis.
11 Un eah hott eena ksawt, “Es is eich gevva fa di fashtekkelda sacha fumm Reich-Gottes vissa, avvah fa dee vo draus sinn kumd alles deich gleichnisa.
12 ‘So es si oahrich gukka kenna avvah nett sayna,un es si goot heahra kenna avvah nett fashtay,adda si mechta sich bekeahra un no fagevva greeya.’”
13 No hott eah si kfrohkt, “Fashtaynd diah dee gleichnis nett? Vi kennet diah dann di anri gleichnisa fashtay?
14 Deah vo da sohma sayt, sayt’s Vatt.
15 Un dess sinn selli am vayk nohch vo’s Vatt ksayt voah. Vann si moll keaht henn no kumd da Satan kshvind un nemd sell Vatt vekk vo ksayt voah in iahra hatza.
16 Un dee leit sinn vi da shtaynich grund vo da sohma nei ksayt voah. Vann si’s Vatt heahra, grawt nemma si’s geahn oh,
17 un si henn kenn vatzla in sich, avvah si shtayn uf fa en veil; no, vann dreebsawl kumd adda si fafolkt vadda veyyich em Vatt, grawt falla si vekk.
18 Un in anri is es Vatt ksayt es vi unnich danna. Si heahra’s Vatt aw,
19 avvah si vadda uf gnumma mitt di veld, mitt em lusht fa reich vadda, un mitt em lusht fa alli sadda sacha havva. Dee sacha kumma rei un fashtikka sell Vatt es es kenn frucht grikt.
20 Samm sinn vi da goot grund es ksayt voah mitt sohma. Si sinn selli es es Vatt heahra, nemma’s ei un bringa frucht; dayl dreisich, dayl sechtzich, un dayl en hunnaht mohl so feel.”
En Licht Unnich En Bushel-Koahb
21 No hott eah si kfrohkt, “Vatt en licht raus gebrocht fa unnich en bushel-koahb du, adda fa unnich’s bett du? Dutt ma nett en licht uf en dish shtella?
22 Fa’s vatt nix fashtekkeld avvah so es es viddah kfunna vadda soll, un’s vatt nix hinna rumm kalda es es nett viddah raus kumma soll.
23 Vann ennich ebbah oahra hott fa heahra, loss een heahra.”
24 Un eah hott ksawt, “Gevvet acht vass diah heahret; vi diah ausmesset, so vatt’s viddah zrikk gmessa zu eich, un may vatt gevva zu eich vo heahra.
25 Fa sellah vo hott, zayld gevva greeya; un sellah vo nett hott, zayld gnumma greeya vass bissel es eah hott.”
En Gleichnis Veyyich Sohma Am Vaxa
26 No hott Jesus ksawt, “Es Reich-Gottes is vi vann en mann sohma uf da bodda shmeist,
27 un eah shlohft nachts un shtayt uf dawks, un da sohma kumd uf un vaxt avvah da mann vayst nett vi.
28 Di eaht bringd frucht raus funn sich selvaht, seahsht da shtengel, no da kolva un endlich di kanna im folla kolva.
29 Avvah vann di frucht moll zeidich is, no shikt eah kshvind di sichel naus veil’s zeit is fa di eahn.”
En Gleichnis Veyyich Em Moshtaht Sohma
30 No hott eah ksawt, “Mitt vass kenna miah’s Reich-Gottes fagleicha, un vass fa en gleichnis sella miah macha?
31 Es is vi en moshtaht sohma, vo vann ah ksayt vatt, is ah da glensht sohma uf di eaht.
32 Avvah vann ah moll ksayt is, vaxt ah uf un vatt graysah es awl di greidah. Un eah shikt grohsi nesht naus so es di fekkel funn di luft iahra neshtah bauwa kenna in seim shadda.”
33 Mitt feel so gleichnisa hott eah eena’s Vatt ksawt vi si’s einemma henn kenna.
34 Eah hott nett kshvetzt zu eena unni deich gleichnisa, avvah vann si als laynich voahra hott eah alles ausglaykt zu sei yingah.
Jesus Macht Da Shtoahm Shtill
35 Un sellah dawk, vo ohvet kumma is, hott Jesus ksawt zu di yingah, “Vella nivvah uf di annah seit gay.”
36 Un si henn di drubb leit datt glost, un henn een mitt sich gnumma grawt vi eah datt im boat voah. Un’s voahra aw anri boats bei eem.
37 Un’s is en grohsah vind-shtoahm uf kumma un di vella sinn in’s boat nei geblohsa biss es boat am uf filla voah.
38 Avvah eah voah hinna im boat mitt en kissi am shlohfa. Un si henn een uf gvekt un henn ksawt zu eem, “Meishtah, gebsht du nix drumm vann miah umkumma?”
39 No is eah vakkah vadda, hott da vind gezankt un hott ksawt zumm say, “Ruich! Sei nau shtill!” Un da vind hott sich glaykt, un’s voah ivvahrawlich gans shtill.
40 No hott eah ksawt zu eena, “Favass feichet diah eich? Hend diah kenn glawva?”
41 Un si voahra vundahboah fagelshtaht un henn ksawt zu nannah, “Veah is dess dann, es even da vind un da say eem heicha doon?”
