Micha 4:1-13
4 In di letshta dawwa avvah,vatt da berg vo da tempel shtayt ufgebaut.Eah vatt da evvahsht unnich awl di berga,un di leit funn anri lendah kumma bei zu eem.
2 Feel heida kumma bei un sawwa,“Kummet, vella nuff an da berg fumm HAH gay,an’s Haus fumm Jakob sei Gott,so es eah uns land veyyich sei vayya,un so es miah in sei pawt lawfa kenna.”Es ksetz zayld naus gay funn Zion,un em HAH sei vatt funn Jerusalem.
3 Eah zayld richta unnich feel leit,un zayld feel mechtichi heida-lendah zanka un iahra shtreit shtobba.Si zayla iahra shvadda in blooks-peinda macha,un iahra shpiahra in sichla.Kenn folk zayld’s shvatt uf nemma geyyich en annah folk,un si zayla nee nimmi lanna fa greek macha.
4 Alli-ebbah zayld unnich sei ayknah vei-shtokk hokkaun unnich sei ayknah feiya-bohm.Nimmand zayld si macha sich feicha,fa da Awlmechtich HAH hott dess ksawt mitt seim maul.
5 Leit in anri lendah zayla iahra gettah nohch gay,avvah miah zayla lawfa im nohma fumm HAH unsah Gott fa’immah.
Da HAH Zayld Sei Leit Haym Fiahra
6 “In sellah dawk,” sawkt da HAH,“zayl ich di lohma zammah samla;selli es funn-nannah gedrivva voahra bring ich zammah,selli es ich vay gedu habb.
7 Ich gebb selli lohma en neiyah ohfang,un selli es vekk gedrivva voahra mach ich in en shteik folk.Da HAH zayld iahra kaynich sei im Berg Zion,funn sellah dawk on un fa’immah.
8 Un du, oh vatsh-tavvah funn di shohf,du shteikah hivvel fumm dochtah funn Zion;dei kaynich-reich vatt diah zrikk gevva,es kaynich-reich funn di dochtah funn Jerusalem.”
9 Favass greisht du nau so laut?Hosht du kenn kaynich?Is dei roht-gevvah kshtauva,es du shmatza hosht vi en fraw am en kind havva?
10 Du musht leida in shmatza, du dochtah funn Zion,vi en veibsmensh am en kind havva.Du musht nau aus di shtatt gay,un draus im feld voona.Du musht an Babylon gay;datt vasht du viddah frei gmacht.Datt dutt da HAH dich lohs drayya,aus di hand funn dei feinda.
11 Avvah nau sinn feel heida-leitfasammeld geyyich dich.Si sawwa, “Loss see unrein sei,vella uf Zion gukka mitt fagunsht.”
12 Avvah si vissa nett di gedanka fumm HAH,si vissa nett vass eah im sinn hott;fa eah sammeld si zammah vi shayb uf em dresha-floah.
13 “Shtay uf un dresh, du dochtah Zion,ich gebb diah eisichi hanna,un hoofs gmacht funn bronze.So es du feel heida ufmawla kansht.”Di sacha es si gnumma henn gebsht du zumm HAH;iahra keshtlich sach gebsht du zumm Hah funn di gans veld.
