Nahum 2:1-13
2 Sellah es ausnannah shtroit is am geyyich dich kumma,shtell dich geyyich een am greeks-haus,vatshet da vayk, machet eich shteik,yooset awl eiyah grefta.
2 (Da HAH zayld di hallichkeit fumm Jakob zrikk bringa,vi di hallichkeit funn Israel,even vann di feinda si faveesht henn,un iahra vei-shtekk fadauva henn.)
3 Di shields funn di shteiki mennah sinn roht;di greeks-gnechta iahra glaydah sinn roht.Es shtawl uf di greeks-veyya glitzaht,vann si grisht sinn fa fassich gay;iahra holsichi shpiahs sinn grisht fa fechta.
4 Di greeks-veyya rabla deich di shtrohsa,un yawwa zrikk un faddi uf em vayk.Si gukka vi en feiyahrichi flamm,si gayn zrikk un faddi vi gviddah.
5 Di hauptmennah vadda bei groofa,si shtolbahra vi si gayn.Si dumla sich nuff an di shtatt vand,un doon’s shield ovvich di blekk es di vand nunnah renna.
6 Di revvah vassah-deahra vadda uf gmacht,un di leit im kaynich-haus sinn fagelshtaht.
7 Di kaynich-fraw vatt kfanga un vekk gnumma,iahra mawda yammahra vi en daub,un si shlauwa uf iahra brisht.
8 Nineveh is vi en vassah-loch,un iahra vassah is am fatt lawfa.“Shtobbet, shtobbet,” Roofa si,avvah nimmand drayt zrikk.
9 Gaynd fa’s silvah! Nemmet’s gold!Es is kenn end zumm keshtlich sach,alli sadda sach fa em reich macha.
10 Di shtatt is grawbt un leah gmacht!Hatza shmelsa un gnee globba zammah,si ziddahra, un iahra ksichtah vadda blayich.
11 Vo is nau da blatz es da layb bleibt,sellah blatz es si di yunga kfeedaht henn,vo da faddah un di muddah-layb anna ganga sinn mitt iahra yungi,un henn sich nett feicha braucha?
12 Da layb hott genunk diahra doht gmacht fa sei yungi,un hott diahra fashtikt fa di muddah-layb.Sei voon-blatz voah ufkfild mitt dohdi diahra,un sei lechah mitt farissa flaysh.
13 “Ich binn geyyich dich,”sawkt da Awlmechtich HAH.“Ich zayl dei greeks-veyya ufbrenna in shmohk,un’s shvatt zayld dei yungi layb fressa.Ich loss nix uf di eaht fa dich zu fressa.Di shtimma funn dei botshaftahvadda nimmi keaht.”
