Offenbarung 18:1-24
18 Noch demm habb ich noch en engel ksenna runnah kumma fumm Himmel. Eah hott grohsi macht katt, un di eaht voah uf glicht mitt sei hallichkeit.
2 Eah hott mechtichlich naus gegrisha mitt en shteiki shtimm, un hott ksawt,“See is kfalla, see is kfalla,di grohs Babylon is kfalla.See is di haymet vadda funn deivela,un alli grauslichah geisht bleibt datt,un aw alli unreinah un hassichah fokkel.
3 Di leit in alli lendah henn gedrunkafumm vei funn iahra zann un huahrahrei.Di kaynicha funn di eaht henn huahrahrei gedrivva mitt iahra,un di kawf-leit funn di eaht sinn reich vadda funn iahra grohsah vohlusht.”
4 No habb ich noch en shtimm fumm Himmel keaht sawwa,“Kummet raus funn iahra, mei leit,so es diah nett en dayl hend mitt iahra sinda,un es diah nett ennichs funn iahra blohwa greeyet.
5 Fa iahra sinda sinn uf gepeild biss an da Himmelun Gott denkt an iahra evili verka.
6 Gevvet zrikk zu iahra vi see gevva hott;betzawlet see zvay mohl zrikkfa vass see gedu hott.Fillet zvay mohl’s kobli es see kfild hott.
7 Gevvet iahra so feel shmatza un druvvel zrikkes see sich selvaht hallichkeit un lushtheit gevva katt hott.In iahra hatz braekt see,‘Ich binn en kaynich-fraw;ich binn kenn vitt-frawun zayl nee nett dreebsawl sayna.’
8 Fasell, kumma iahra blohwa:doht, dreebsawl,un hungah in ay dawk.See vatt ufgebrend mitt feiyah,fa mechtich is Gott da Hah es see richta dutt.”
9 Di kaynicha funn di eaht vo huahrahrei gedrivva henn mitt iahra un en dayl katt henn in iahra lushtboah layva, zayla da shmohk sayna funn iahra am ufbrenna. No doon si veina un heila ivvah see.
10 Si zayla veit vekk shtay un sich feicha veyyich iahra shtrohf, un zayla sawwa,“Vay, vay, du grohsi shtatt Babylon!Du mechtichi shtatt!In ay shtund is dei gericht kumma.”
11 Di kawf-leit funn di eaht zayla veina un heila ivvah see veil nimmand di kawf-leit iahra sacha may kawft—
12 sacha funn gold un silvah, koshtboahri shtay un pearls, fei linnen un purpel duch, seida un roht duch, alli sadda goot-shmakkich hols, alli sadda sacha gmacht funn ivory, deiyah hols, kubbah, eisa, un marbel,
13 sacha vi cinnamon, shpeis, shmiah, insens, vei, ayl, fei mayl, vaytza, fee, shohf, geil, veyya, gnechta, un di sayla funn mensha.
14 “Di frucht es dei sayl glusht hott difoah is funn diah vekk ganga. Awl di shayni un reichi sacha sinn fatt, un du zaylsht si nee nimmi finna.”
15 Di kawf-leit funn dee sacha, selli es reich vadda sinn funn iahra, zayla veit vekk shtay un sich feicha veyyich iahra shtrohf. Si zayla veina un heila,
16 un zayla naus greisha,“Vay, vay, zu di grohs shtatt,vo geglayt voah in fei linnen, purpel un roht duch,un voah gedekt mitt gold, koshtboahri shtay un pearls!
17 In ay shtund is awl dee reichheit zu nix kumma.”
Awl di shiff-meishtah, di mennah fumm say, di shiff-gnechta un di kawf-leit es sich falossa uf shiffah henn veit vekk kshtanna,
18 un voahra am heila vi si da shmohk ksenna henn funn iahra am brenna, un henn ksawt, “Vass fa shtatt is vi dee grohs shtatt?”
19 Si henn shtawb uf iahra kebb kshmissa diveil es si am veina un heila voahra un henn ksawt,“Vay, vay zu di grohs shtatt,in dee vo awl di leit mitt shiffahreich vadda sinn deich iahra feel sach.In ay shtund is see zu nix gebrocht vadda.
20 Froi dich ivvah see, Himmel,un diah saylichi un aposhtla un brofayda,fa Gott hott si kshtrohft fa vass si gedu hott zu eich!”
21 No hott en mechtichah engel en shtay vi en meel-shtay uf gnumma un hott en in da say kshmissa un hott ksawt,“Grawt vi sell, mitt gvald,soll di grohs shtatt Babylon nunnah kshmissa vaddaun zayld nimmi kfunna sei.
22 Di yacht funn di harf-shpeelah, di singah,di peifah un di blohs-hann blohsahzayla nimmi keaht sei in diah.Kenn shaff-leit funn ennichi eahvet vadda may kfunna in diah.Un di yacht fumm meel-shtay vatt nee nimmi keaht in diah.
23 Di helling funn en licht soll nee nimmi sheina in diah,un di shtimm fumm hochtzich-mann un en hochtzich-maydelvatt nimmi keaht in diah;fa dei kawf-leit voahra di grohsa leit funn di eaht.Di leit in alli lendah voahra fafiaht deich dei hexahrei.
24 In iahra voah’s bloot funn di brofayda un di saylichi kfunna,un awl selli es doht gmacht voahra uf di eaht.”
