Offenbarung 8:1-13
8 Vo’s Lamm da sivvet seal uf gmacht hott, voah’s shtill im Himmel fa baut en halb shtund.
2 No habb ich di sivva engel ksenna es fannich Gott shtayn, un’s voahra sivva blohs-hanna gevva zu eena.
3 Un noch en engel es en goldich insens-kobli katt hott, is kumma un hott sich an da awldah kshteld. Feel insens voah eem gevva so es eah’s opfahra soll mitt di gebaydah funn awl di saylicha uf em goldicha awldah vo fannich em kaynich-shtool voah.
4 Da shmohk fumm insens, mitt di gebaydah funn di saylicha, is nuff ganga fannich Gott aus di hand fumm engel.
5 No hott da engel’s insens-kobli gnumma, hott’s kfild mitt feiyah fumm awldah un hott’s uf di eaht kshmissa. Un’s voahra shtimma, gviddah, veddah-laycha un en eaht-bayben.
Di Sivva Blohs-Hanna
6 No henn di sivva engel es di sivva blohs-hanna katt henn sich grisht fa si blohsa.
7 Da eahsht engel hott sei hann geblohsa un’s voahra shlohsa un feiyah zammah gmixt mitt bloot. Dee voahra nunnah kshmissa uf di eaht, un en driddel funn awl di baym voahra ufgebrend, un awl’s gree graws voah ufgebrend.
8 No hott da zvett engel geblohsa, un ebbes vi en grohsah berg es am brenna voah mitt feiyah voah in da say kshmissa. Un en driddel fumm say is bloot vadda,
9 en driddel funn di diahra im say sinn doht ganga, un en driddel funn di shiffa sinn gans fadauva vadda.
10 No hott da dritt engel geblohsa un’s is en grohsi shtann fumm Himmel kfalla vo am brenna voah vi en licht. Di shtann is uf en driddel funn di revvahra kfalla un uf di vassah-shpringa.
11 Da nohma funn di shtann is biddah-greidah, un en driddel fumm vassah is biddah vadda. Un feel leit sinn kshtauva fumm vassah veil’s biddah voah.
12 No hott da fiaht engel geblohsa, un en driddel funn di sunn is kshlauwa vadda, un en driddel fumm moon, un en driddel funn di shtanna. En driddel funn iahra lichtah voahra dunkel gmacht, so es en driddel fumm dawk dunkel voah, un aw en driddel funn di nacht.
13 No havvich gegukt un ich habb en engel keaht fleeya deich di mitt fumm Himmel am sawwa mitt en laudi shtimm, “Vay, vay, vay, zu selli es uf di eaht voona, veil di anri blohs-hanna geblohsa vadda zayla vo di drei engel noch blohsa zayla.”
