Philipper 2:1-30
2 Vann diah ennichi famohning hend in Christus, vann diah ennichah drohsht hend in leevi, vann diah en dayl hend im Geisht, vann diah hatzlichi leevi un bamhatzichkeit hend,
2 dann folfillet mei frayt bei eiseida mitt-nannah, bei en gleichani leevi havva, un bei gans aynich sei mitt ay meind.
3 Doond nix deich shtreit adda eah-geitz, avvah deich daymoot achtet anri haychah es eich selvaht.
4 Loss yaydah funn eich nett yusht ausgukka fa sei aykni sacha, avvah aw fa di sacha funn anri.
5 Seind psunna mitt di saym meind es in Christus Jesus voah,
6 deah vo di folshtendich naduah katt hott funn Gott,un hott sich nett eigedenkt es en rawvah fa Gott gleich sei.
7 Avvah eah hott sich leah gmacht,hott di naduah funn en gnecht ohgnummaun is in di gleichnis funn en mensh gmacht vadda.
8 Eah hott sich kfunna vi en mensh,hott sich daymeedich gmacht,un hott Gott keicht biss an da doht;un sell voah da doht uf em greitz.
9 Fasell hott Gott een hohch uf kohva,un hott eem da nohma gevva vo ovvich alli nohma is,
10 so es am nohma funn Jesus alli gnee sich beeya soll,im Himmel, uf di eaht un unnich di eaht.
11 Un alli zung soll bekenna es Jesus Christus da Hah is,zu di hallichkeit funn Gottda Faddah.
Sheinet Vi Lichtah In Di Veld
12 So, mei beleebdi breedah, grawt vi diah immah keicht hend, so doond nau aw, nett yusht vann ich datt binn, avvah feel may vann ich nett datt binn, shaffet eiyah saylichkeit aus mitt angsht un ziddahra.
13 Fa’s is Gott vo in eich shaft, so es diah du vellet, un aw doond vass een froh macht.
14 Doond alles unni grumla adda zadda,
15 so es diah unshuldich un rein sind, vi kinnah funn Gott unni faylah unnich en ungettlichi un sindlichi leit. Diah sheinet vi lichtah in di veld zu eena,
16 vi diah’s Vatt funn layva uf hayvet. No kann ich froh sei veyya eich uf em dawk funn Christus veil ich nett kshprunga binn fa nix, adda kshaft habb fa nix.
17 Avvah even vann ich ufgopfaht va vi en drink-opfah uf da opfah un deensht vass kumd funn eiyahm glawva, dann binn ich froh un froi mich mitt eich awl.
18 Un diah seddet aw froh sei un eich froiya mitt miah.
Da Timotheus Un Da Epaphroditus
19 Ich hoff im Hah Jesus fa da Timotheus glei zu eich shikka, so es ich aw moot grikk vann ich heah vi’s is mitt eich.
20 Ich habb nimmand shunsht es is vi eah is, vo nadiahlich seiya vill fa eich.
21 Fa si gukka awl aus fa iahra aykni sacha, nett fa di sacha funn Jesus Christus.
22 Avvah diah visset vi da Timotheus sich ufgedrawwa hott. So vi en boo mitt seim daett, so hott eah kshaft mitt miah in di eahvet fumm Effangaylium.
23 Fasell vill ich een zu eich shikka so kshvind es ich vays vi’s gay zayld mitt miah.
24 Un ich habb en fadrauwa im Hah es ich selvaht aw glei kumma zayl.
25 Ich habb’s nohtvendich kfunna fa da Epaphroditus zu eich shikka. Eah is mei broodah, mitt-helfah un mitt-shtreidah, avvah eiyah aposhtel fa mei noht faseiya.
26 Eah hott en falanga katt fa eich awl, un voah oahrich bekimmaht, veil diah keaht henn es eah grank voah.
27 Un eah voah grank, nayksht am doht. Avvah Gott voah bamhatzich zu eem, un nett yusht zu eem, avvah zu miah aw, so es ich nett ay dreebsawl ivvah di annah habb.
28 Fasell binn ich may ayfeldich fa een shikka so es diah eich froiya kennet vann diah een viddah saynet, un ich binn no vennichah bekimmaht.
29 So nemmet een oh im Hah in alli frayt, un doond sohwichi vi een hohch achta.
30 Fa eah voah shiah doht deich di eahvet funn Christus, un hott sei layva in di kfoah gedu fa miah helfa in eiyahm blatz.
