Psalm 40:1-17
Zumm foah-singah. En Psalm fumm Dawfit.
40 Ich habb geduldich gvoaht uf da HAH;eah hott sich gedrayt, un mei roofes keaht.
2 Eah hott mich ruff aus em kfeahlich loch gezowwa,aus em shleim un drekk.Eah hott mei fees uf en felsa kshteld,so es ich uf haddah grund lawfa kann.
3 Eah hott en nei leet in mei maul gedu,en leet fa unsah Gott lohva.Feel zayla sayna un sich feicha,un zayla iahra fadrauwa in da HAH du.
4 Ksaykend is da mann es sei fadrauwes in da HAH dutt;sellah es sich nett falost uf di shtolsa,adda uf selli es rumm gayn mitt di falshheit.
5 Feel, oh HAH mei Gott,sinn di vundahboahri sacha es du gedu hosht,un aw dei gedanka veyyich uns.’Sis nimmand gleich zu diah.Vann ich dee sacha sawwa un fazayla vett,veahra si zu feel fa zayla.
6 Shlacht-opfahra un shpeis-opfahra sinn diah nett kfellich,avvah mei oahra hosht du uf gmacht.Brand-opfahra un sind-opfahra hosht du nett kfrohkt difoah.
7 No habb ich ksawt, “Gukk moll, ich kumm,im buch is es kshrivva veyyich miah.
8 Ich froi mich fa dei villa du, oh mei Gott,dei Ksetz is in meim hatz.”
9 Ich habb gerechtichkeit gebreddicht in di grohs fasamling.Gukk moll, ich hald mei maul nett zu,un dess vaysht du, oh HAH.
10 Ich habb dei gerechtichkeit nett fashtekkeld kalda in meim hatz;dei shtandhaftichkeit un saylichkeit shvetz ich diveyya,ich hald dei grohsi leevi un voahheitnett funn di grohs fasamling.
11 Du haldsht dei bamhatzichkeit nett funn miah, oh HAH,loss dei leevi un dei voahheit di gans zeit mich heeda.
12 So feel evil es nett gezayld sei kann is um mich rumm;mei sinda henn mich ivvah-gnumma,un ich kann nett sayna.Si sinn may es di hoah uf meim kobb,un mei hatz hott moot faloahra.
13 Loss es kfellich sei zu diah, oh HAH, fa mich frei setza;dummel dich, oh HAH, un helf miah.
14 Loss selli sich shemma un fashtatzt sei,es mei layva nemma vella un mich umbringa.Loss selli zrikk gedrayt sei un fashohmd sei,es gleicha dayda mich sayna unglikk havva.
15 Loss selli fashtaund sei veyyich iahra ayknah shohm,es sawwa zu miah, “Aha, aha!”
16 Avvah loss selli es dich sucha,sich froiya un froh sei fa dich.Loss selli es dei saylichkeit leeb henn,immah sawwa, “Da HAH sei hohch glohbt!”
17 Ich binn oahm un in noht;avvah da Hah denkt an mich.Du bisht mei hilf un machsht mich frei,oh mei Gott, fasaum dich nett.
