Psalm 51:1-19
Zumm foah-singah. En Psalm fumm Dawfit vo da brofayt Nathan zu eem kumma is noch demm es eah zu di Bathsheba ganga voah.
51 Sei gnaydich zu miah, oh Gott,noch dei shtandhaftichi-leevi;reib mei sinda ausnoch dei grohsi bamhatzichkeit.
2 Vesh mich funn awl mei shulda,un mach mich sauvah funn mei sind.
3 Fa ich kenn awl mei shulda,un mei sinda sinn immah fannich miah.
4 Geyyich dich, un dich laynich, habb ich ksindicht,un habb evil gedu fannich dei awwa;so bisht du recht vann du shvetsht,un bisht unshuldich vann du richsht.
5 Ich voah sindlich geboahra,un voah sindlich vo ich ohkfanga voah in mei muddah iahra leib.
6 Yah, du vitt voahheit havva innahlich in miah,un lansht mich deef in meim hatz fa veisheit havva.
7 Mach mich sauvah mitt hyssop, un ich va rein,vesh mich, un ich va veisah es shnay.
8 Loss mich frayt un freyyaheit heahra,loss di gnocha es du fabrocha hosht sich froiya.
9 Fashtekkel dei ksicht funn mei sinda,un reib awl mei shulda aus.
10 Shaff in miah en rein hatz, oh Gott,un mach en neiyah un en gerechtah geisht in miah.
11 Shtohs mich nett vekk funn diah,un nemm dei Heilichah Geisht nett vekk funn miah.
12 Bring di frayt funn dei saylichkeit zrikk zu miah,un hayb mich uf mitt en geisht es villing is.
13 No lann ich di ivvah-dreddah dei vayya,un sindah zayla sich bekeahra zu diah.
14 Hald mich funn bloot-shuldich sei, oh Gott,du, da Gott es mich saylich machsht,un mei zung zayld singa funn dei gerechtichkeit.
15 Oh Hah, mach mei leftz uf,so es mei maul dei lohb fakindicha kann.
16 Du bisht nett froh mitt en opfah,adda dann dayt ich diah’s bringa;brand-opfahra kfalla diah nett.
17 Di opfahra es Gott kfellich sinn, sinn en gebrochanah geisht;en gebrocha un en daymeedich hatz,oh Gott, dusht du nett fa’achta.
18 Deich dei gnawt du goot zu Zion;bau di mavvahra funn Jerusalem uf.
19 No vadda di gerechta opfahra diah kfellich,di brand-opfahra un gansi brand-opfahra.No vadda yungi bulla gopfaht uf deim awldah.
