Psalm 86:1-17
En gebayt fumm Dawfit.
86 Heich mich ab, oh HAH, un gebb miah andvat,fa ich binn oahm un in noht.
2 Heet mei sayl, fa ich gebb mich zu diah;helf deim gnecht, oh mei Gott,fa ich faloss mich uf dich.
3 Sei gnaydich zu miah oh HAH,fa ich roof zu diah da gans dawk lang.
4 Mach di sayl funn deim gnecht froh,fa zu diah, oh Hah, doon ich bayda.
5 Du, oh Hah, bisht goot un immah grisht fa fagevvamitt shtandhaftichi-leevi zu selli es dich ohroofa.
6 Heich mei gebayt ab, oh HAH;heich mei shtimm ab vi ich dich ohbitt.
7 Im dawk funn meim druvvel zayl ich dich ohroofa,fa du gebsht miah andvat.
8 Unnich di gettah hott’s nimmand vi dich, oh Hah,un’s hott kenn verka vi deini.
9 Awl di heida es du gmacht hoshtzayla kumma un dich ohbayda, oh HAH,un zayla dei nohma fagleahra.
10 Du bisht grohs un dusht vundahboahri verka;du laynich bisht Gott.
11 Lann mich dei vayk, oh HAH,so es ich in dei voahheit lawfa kann.Mach mei hatz aynich,so es ich dei nohma firchta du.
12 Ich gebb dank zu diah, oh Hah, mei Gott, mitt mei gans hatz,un gebb eah zu deim nohma fa’immah.
13 Dei shtandhaftichi-leevi geyyich miah is grohs,un du hosht mei sayl aus em deefa grawb kalda.
14 Oh Gott, shtolsi leit henn sich ufketzt geyyich mich;en drubb unfashtendlichi mennah vella mei layva nemma,un si gevva nix um dich.
15 Avvah du, oh Hah, bisht en bamhatzichah un en gnaydichah Gott,un bisht geduldich mitt feel leevi un shtandhaftichkeit.
16 Dray dich zu miah un sei bamhatzich zu miah;gebb dei graft zu deim gnecht,un helf demm sohn funn dei mawt.
17 Veis miah en zaycha es du’s goot maynsht fa mich,so es selli es mich hassa sich shemma missa,veil du, oh HAH, miah bei shtaysht un mich drayshta dusht.
