Shpricha 27:1-27
27 Braekk nett veyyich vass du du zaylsht meiya,fa du vaysht nett vass en dawk foah bringd.
2 Loss en anrah dich preisa, un nett dei ayya maul;loss es en fremdah sei, un nett dei aykni leftz.
3 En shtay is shveah, un sand hott gvicht,avvah da druvvel es en unksheidah macht is shveahrah es si awl zvay.
4 Zann is veesht, un bays vadda nemd ebbah ivvah,avvah veah kann ufshtay zu fagunsht?
5 Uffenah shtrohf is bessah es vifashtekkeldi leevi.
6 Du kansht en freind drauwa es dich recht setzt,avvah da kuss funn en feind fafiaht.
7 En mann es satt is drayt hunnich nunnah,avvah zu en mann es hungahrich is, is even biddah sach sees.
8 Vi en fokkel es faloahra vekk fleekt funn sei nesht,is en mann es vekk lawft funn sei haus.
9 Goot-shmakkich ayl un insens macht’s hatz froh,un en mann sei roht is sees zu sei freind.
10 Faloss dei freind adda dei faddah sei freind nett,un gay nett zu deim broodah sei haus uf em dawk funn druvvel.’Sis bessah fa zu deim naykshtah nochbah gay,es vi zu deim broodah es veit ab is.
11 Grikk veisheit, mei sohn, un bring frayt zu meim hatz,no habb ich en goot andvat zu selli es geyyich mich shvetza.
12 En mann es denkt, saynd di kfoah un fashtekkeld sich,avvah di dumma gayn on un missa leida difoah.
13 Vann ebbah fashprocha hott fa goot shtay fa en fremdah sei shuld,dann nemm sei glayt un hald’s biss di shuld betzawld is.
14 Vann ebbah sei nochbah laut saykend free meiyets,dann vatt’s gnumma fa en fluch.
15 En zannichi fraw is vi vassaham ohhalda drobsa uf en reyyahrichah dawk;
16 fa see shtobba is vi broviahra da vind shtobba,adda fa broviahra ayl hayva in dei rechtsi hand.
17 Eisa is shauf gmacht mitt eisa,so dutt ay mann en anrah mann shauf macha.
18 Veah-evvah es acht gebt uf en feiya-bohm zayld sei frucht essa,un veah-evvah es acht gebt uf sei meishtah vatt hohch-geaht.
19 Vi du dei ksicht sayna kansht in vassah,so kansht du dich selvaht sayna in deim hatz.
20 Da doht un’s grawb vella immah noch may einemma,un so vella di awwa fumm mensh.
21 Vi gold un silvah broviaht is bei feiyah,so is en mann ausbroviaht vann eah gepreist vatt.
22 Even vann du en unksheidah fashtambsht mitt en shtambahfunn em famawld frucht,doch kansht du sei dumhayda nett aus eem nemma.
23 Gebb goot acht uf dei shohf,un gukk noch deim fee;
24 fa reichheit bleibt nett fa’immahun en krohn vatt nett zu di nohch-kummashafta gevva fa’immah.
25 Vann’s graws abgmacht is fa hoi, un’s nei graws kumd uf,un vann’s hoi funn di hivla rei gebrocht is,
26 dann gevva di lemmah diah glaydah,un di gays diah genunk fa en feld kawfa.
27 Du zaylsht genunk gaysa millich havvafa dei family feedra,un aw fa dei mawda feedra.
