Ich habb sacha in nature reeli geglicha ever siddah’s ich en glay kind voah. Mei family hott oft enjoyt zeit shpenda in da bush un bei di shayni lakes in di area vo ich ufgvaxa binn, in Jyväskylä, in Central Finland. Ich gleich aw animals en latt. Vann ich en kind voah havvich vella alli hund un katz hayva es ich ksenna habb! Di eldah es ich vadda binn hott’s mich reeli sad gmacht fa sayna vi veesht es leit animals gyoost henn. Mitt zeit, voah ich part funn en animal-rights organization. Datt, havvich leit ohgedroffa es saym kfeeld henn es ich habb.

Miah henn en latt gedu fa animals protekta. Miah henn information naus gevva un henn protests katt geyyich leit es animal haut fakawft henn, un aw geyyich selli es animals gyoost henn fa sacha testa. Miah henn even en neiyah animal-protection organization kshteaht. Koss es miah so determined voahra fa di animals protekta sinn ma oft in druvvel kumma mitt di police. Ich voah edlichi moll arrest un zu court gnumma.

Ich voah nett yusht gwohrit veyyich di animals, avvah aw veyyich anri problems in di veld. Shpaydah, havvich human-rights organizations support un anri groups es boviaht henn di eaht protekta. Ich habb awl mei zeit kshpend fa si supporda. Ich habb boviaht selli protekta es nett genunk katt henn fa essa un anri es hilf gebraucht henn.

Mitt zeit havvich auskfunna es ich nett di veld tshaynsha habb kenna. Even vann selli organizations edlichi glenni problems kfixt henn, di grohsi problems henn yusht kseemd fa shlimmah vadda. Es hott kseemd vann leit yusht evil gedenkt henn di gans zeit, un nimmand hott ennich ebbes drumm gevva veyyich vi shlimm es sacha voahra. Ich habb kshpiaht vi ich nix du habb kenna diveyya.

Koss es ich sad voah veyyich nett able sei fa helfa, havvich kshteaht denka veyyich Gott un di Bivvel. An ay zeit havvich kshtoddit katt mitt Jehova Sei Witnesses. Ich habb gvist es di Witnesses goodi leit sinn koss si voahra shay un henn ebbes drumm gevva veyyich mich. Avvah ich voah yusht noch nett reddi fa tshaynshes macha in mei layva. Avvah dessamohl, voahra sacha diffand.

Ich habb kshteaht mei Bivvel laysa. Dess hott mich so feel kamfirt gevva. Ich habb ksenna di Bivvel teetsht es ma sett shay sei zu animals. Fa’n example, Shpricha 12:10 sawkt “en gerechtah mann gebt acht uf sei” animals. Ich habb aw gland es Gott nett di shuld is funn di problems in di veld. Avvah, unsah problems vadda yusht shlimmah koss feel leit doon nett heicha zu een. Ich voah impressed vann ich gland habb veyyich Jehova sei leevi un patience.​—Psalm 103:8-14.

Baut an di saym zeit havvich en coupon kfunna fa’s buch What Does the Bible Really Teach?, un ich habb’s nei kshikt. Glei sinn zvay Witnesses kumma, un si henn kfrohkt eb ich di Bivvel shtodya vill, un ich habb ksawt es ich vill. Ich habb aw kshteaht zu di fasamlinga gay. Koss funn sell, havvich reeli geglicha vass ich am lanna voah funn di Bivvel.

Koss funn di Bivvel voah ich able fa en latt tshaynshes macha. Ich habb kshtobt shmohka un zu feel drinka. Ich habb mich ufgebutzt un habb kshtobt flucha. Un habb gland es ich respekt havva sett fa leit es authority henn. (Römer 13:1) Di Bivvel hott mich kolfa sayna vi Gott feeld veyyich immorality, koss dess voah ebbes es ich nett feel drumm gevva habb diveyya.

‘S hatsht ding fa mich voah fa tshaynsha in vi ich gedenkt habb veyyich di human un animal-rights organizations. Es hott nett kaebbend ivvah-nacht. Fa shteahra mitt, havvich kshpiaht vi ich geyyich selli organizations am gay veah vann ich shtobba dayt si helfa. Avvah ich habb gland es Gott Sei Reich is di aynsisht recht hofning. Ich habb diseiyt fa awl mei energy yoosa fa sell Reich supporda un anri helfa lanna diveyya.​—Matthäus 6:33.

Ich habb als gedenkt es’s yusht zvay sadda leit voahra, eedahs goot adda shlecht, un ich voah immah reddi fa geyyich selli shaffa es ich gmaynd habb es shlecht voahra. Because funn vass ich gland habb funn di Bivvel, du ich nimmi leit hassa. Ich boviah leevi havva fa alli-ebbah. (Matthäus 5:44) Ich veis dee leevi in diffandi vayya. Ayn is bei di goodi sacha sherra veyyich Gott Sei Reich. Ich binn frohwa fa sayna es di goodi sacha funn di Bivvel leit peace, happiness, un en rechti hofning gebt.

Ich habb peace nau koss ich habb alles in Jehova sei hend glost. Ich vays es eah nett di animals un mensha lossa zayld veesht gyoost sei fa’immah. Eah zayld aw nett unsah shayni eaht lossa distroit vadda. Avvah, eah zayld sei Reich yoosa fa alles fixa. (Jesoiya 11:1-9) Es macht mich so haebbi fa vissa veyyich di voahret in di Bivvel, un fa anri leit helfa lanna diveyya. Ich shpiah nimmi vi ich alles in di veld tshaynsha muss.